ក្រុមហ៊ុនមួយកន្លែងឃើញមានហុយផ្សែងមកក្រៅធ្វើឱ្យប្រជាពលរដ្ឋស្មានថា មានអគ្គិភ័យ ហើយក៏ប្តឹងសមត្ថកិច្ចហៅរថយន្តមកជួយពន្លត់ជាង១០គ្រឿង បង្កអោយមានការភ្ញាក់ផ្អើល
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ក្រុមហ៊ុនមួយកន្លែងឃើញមានហុយផ្សែងមកក្រៅធ្វើឱ្យប្រជាពលរដ្ឋស្មានថា មានអគ្គិភ័យ ហើយក៏ប្តឹងសមត្ថកិច្ចហៅរថយន្តមកជួយពន្លត់ជាង១០គ្រឿង បង្កអោយមានការភ្ញាក់ផ្អើលកាលពីវេលាម៉ោង៧និង១០នាទីយប់ថ្ងៃទី១៥ ខែមករា ឆ្នាំ២០២៣ នៅចំណុចក្រុមហ៊ុន DHL ដឹកជញ្ជូនអីវ៉ាន់ក្នុងស្រុកនិងក្រៅប្រទេស ដែលស្ថិតនៅខាងក្រោយផ្សារព្រីនថោន ក្នុងភូមិក្បាលដំរីទី២ សង្កាត់កាកាបទី២ខណ្ឌពោធិ៍សែនជ័យ ។
តាមប្រភពព័ត៌មានពីនគរបាលប៉ុស្តិ៍បាននិយាយប្រាប់ថា បន្ទាប់ពីប្រជាពលរដ្ឋឃើញមានហុយផ្សែងចេញពីក្រុមហ៊ុន DHL ដឹកជញ្ជូនអីវ៉ាន់ក្នុងស្រុកនិងក្រៅប្រទេស ភ្លាមៗ លោកនាយប៉ុស្តិ៍កាកាបទី២ បានទាក់ទងទៅជំនាញផ្នែកពន្លត់អគ្គិភ័យមកជាង១០គ្រឿង ដើម្បីជួយបាញ់ទឹកពន្លត់។ បន្ទាប់មក កម្លាំងសមត្ថកិច្ច រួមជាមួយអាជ្ញាធរភូមិ-សង្កាត់ ព្រមទាំងខណ្ឌបានចូលទៅរុករកទីតាំងជាច្រើនកន្លែង តែរកមិនឃើញនោះទេ។
ប្រភពដដែលបន្តថា លោកនាយប៉ុស្តិ៍ និងអាជ្ញាធរមូលដ្ឋាន រួមទាំងជំនាញផ្នែកពន្លត់អគ្គិភ័យបានសុំឃ្លាំងជាច្រើនកន្លែង ដោយមានឃ្លាំងខ្លះជាប់សោក៏បានវា.យកម្ទេច ដើម្បីចូលត្រួតពិនិត្យ ប៉ុន្តែនៅតែរកមិនឃើញ ហើយរថយន្តពន្លត់អគ្គិភ័យជាង១០គ្រឿងដែលមកដល់ចំណុចកើតហេតុ ក៏បានត្រឡប់ទៅវិញភ្លាមៗជាបន្តបន្ទាប់៕
ចែករំលែកព័តមាននេះ