បុរសម្នាក់ជាសន្តិសុខម្នាក់បានអះអាងថា គ្រាន់តែជិះម៉ូតូចេញពីកន្លែងយាមដើរលេង១ភ្លេត ក៏ស្រាប់តែក្រុមជនសង្ស័យមួយក្រុមបានស្ទាក់ ដោយយកដាវមកភ្ជង់គំរា.មយក
រាជធានីភ្នំពេញ ៖ បុរសម្នាក់ជាសន្តិសុខម្នាក់បានអះអាងថា គ្រាន់តែជិះម៉ូតូចេញពីកន្លែងយាមដើរលេង១ភ្លេត ក៏ស្រាប់តែក្រុមជនសង្ស័យមួយក្រុមបានស្ទាក់ ដោយយកដាវមកភ្ជង់គំរា.មយកទូរស័ព្ទ និងលុយអស់មួយចំនួនថែមទៀត កាលពីនៅវេលាម៉ោង១និង២០នាទីរំលងអធ្រាត្រឈានចូលថ្ងៃទី១៦ ខែមករា ឆ្នាំ២០២៣ នៅចំណុចម្តុំផ្សារដីថ្មី ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ ។
ជនរងគ្រោះខាងលើមានឈ្មោះ ងុយ ចំរើន ភេទប្រុស អាយុ២៤ឆ្នាំ មុខរបរសន្តិសុខយាមនៅបុរីលឹមឈាងហាក់ ស្នាក់នៅរោងកម្មករកន្លែងធ្វើការ ម្តុំចំការដូង ស្ថិតក្នុងខណ្ឌដង្កោ នឹងមានស្រុកកំណើតនៅខេត្តពោធិ៍សាត់។ ដោយឡែករបស់ដែលជនសង្ស័យយកទៅមាន ៖ ទូរស័ព្ទដៃម៉ាក oppo មួយគ្រឿង និងលុយចំនួន២ម៉ឺនរៀល ចំណែកម៉ូតូហុងដាឌ្រីម ស៊េរីឆ្នាំ២០២២មួយគ្រឿងមិនបានបាត់បង់នោះទេ។
បើតាមសម្តីបុរសរងគ្រោះបាននិយាយអះអាងថា មុនពេលកើតហេតុ រូបគាត់បានជិះម៉ូតូហុងដាឌ្រីម ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ភ្នំពេញ 1JV 6756 ចេញពីកន្លែងយាម គោលបំណងដើរលេងបន្តិច លុះមកដល់ចំណុចកើតហេតុ ម្តុំផ្សារដីថ្មី ក៏ស្រាប់តែលេចមុខជនសង្ស័យមួយក្រុមមានគ្នា៤នាក់ បានមកធ្វើសកម្មភាពស្ទាក់ម៉ូតូរបស់គាត់។ ហើយពេលនោះ រូបគាត់បានឈប់ដកសោម៉ូតូចេញ ក៏ស្រាប់តែបក្សពួកជនសង្ស័យទាំងនោះបានយកដាវមកភ្ជង់គំរា.ម រួចហើយក៏បានយកទូរស័ព្ទម៉ាក oppo របស់គាត់ រួមទាំងលុយចំនួន២ម៉ឺនរៀល ហើយពេលនោះដែរ រូបគាត់ក៏បានសុំទូរស័ព្ទពីជនសង្ស័យ តែជនសង្ស័យមិនអោយ ហើយក៏បានវា.យរូបគាត់ចំនួន២ដៃបន្ថែមទៀត បន្ទាប់មកជនសង្ស័យក៏បាននាំគ្នាគេចទៅបាត់អស់តែម្ដង ។
ប្រភពដដែលបានបន្តទៀតថា បន្ទាប់ពីត្រូវជនសង្ស័យយកលុយ និងទូរស័ព្ទហើយ តែមិនបានយកម៉ូតូនោះទេ រូបគាត់ក៏បានជិះម៉ូតូមករកអោយគេជួយតែម្តងទៅ ។
ពាក់ព័ន្ធក្នុងករណីខាងលើនេះដែរ បន្តិចក្រោយមក ក៏មានកម្លាំងសមត្ថកិច្ចមូលដ្ឋានបានចុះទៅកន្លែងកើតហេតុ តែបែរជាសមត្ថកិច្ចមានមន្ទិលសង្ស័យឆ្ងល់ទៅវិញថា មូលហេតុអ្វីបានជាជនសង្ស័យមិនយកម៉ូតូ បែរជាយកលុយ២ម៉ឺនរៀល និងទូរស័ព្ទមួយគ្រឿងទៅវិញ?។
ក្រោយពេលកើតហេតុ ទោះបីជាយ៉ាង សមត្ថកិច្ចក៏បាននាំយកបុរសរូបនោះទៅប៉ុស្តិ៍នគរបាលរដ្ឋបាលស្ទឹងមានជ័យទី៣ ដើម្បីសួរនាំ និងដាក់ពាក្យបណ្ដឹងតាមសំណូមពររបស់ជនរងគ្រោះផងដែរ៕
ចែករំលែកព័តមាននេះ