ចេញពីសាលាមិនទៅផ្ទះនាំគ្នាដើរលេងជួបគ្រោះថ្នាក់

ថ្ងៃទី ១៣ ខែ កក្កដា ឆ្នាំ ២០១៧

ម៉ោង ១០:០៧

រាជធានីភ្នំពេញ ៖ យុវជនប្រុសស្រី៣នាក់ដែលសង្ស័យជាសិស្សសាលា ព្រោះសម្លៀកបំពាក់សិស្សដោះញាត់ក្រោមកែបម៉ូតូ និងមានទាំងកាតាប សៀវភៅទៀតនោះ បានជួបគ្រោះថ្នាក់ចរាចរណ៍២ដងផ្ទួនៗគ្នា កាលពីវេលាម៉ោង៧និង២០នាទីយប់ថ្ងៃទី១២ ខែកក្កដា នៅលើកំណាត់ផ្លូវជាតិលេខ៣ ។ លើកទី១ ជួបគ្រោះថ្នាក់នៅក្នុងភូមិទួលកី និងលើកទី២ នៅមុខខ្លោងទ្វារវត្តព្រៃស្ពឺ ក្នុងភូមិស្រែជម្រៅ សង្កាត់ចោមចៅ ខណ្ឌពោធិ៍សែនជ័យ ។

ពួកគេទាំង៣នាក់ ជិះម៉ូតូមួយគ្រឿងម៉ាកហ្សូ៊ម័រអុិច ពណ៌ទឹកក្រូចលាយស ពាក់ផ្លាកលេខ ភ្នំពេញ ១GC-២៩៣៨ បើកបរដោយយុវជនម្នាក់មិនប្រាប់ឈ្មោះ និងរួមដំណើរដោយយុវតី២នាក់ ។ មិនដឹងថាពួកគេទើបនឹងមកពីដើរលេងផឹកស៊ីនៅទីណាទេ ជិះម៉ូតូបោះពួយពីត្បូងទៅជើងជ្រុលទៅបុកជាមួយម៉ូតូស្គូពីម្តងហើយនៅភូមិទួលកី ។ លុះបន្តដំណើរទៅមុខទៀត ដោយរវល់តែប្រឡែងគ្នាក៏ជ្រុលទៅបុករថយន្តបែនពីក្រោយម្តងទៀតបណ្តាលឲ្យដួលរងរបួសជើងធ្ងន់ រីឯរថយន្តបន្ថែមល្បឿនបើកទៅមុខបាត់ទៅ ។

ក្រោយកើតហេតុ អ្នកភូមិបានជួយហៅរថយន្តសង្គ្រោះរបស់អង្គភាព៧១១ មកដល់ជួយលាងរបួសឲ្យនិងបម្រុងដឹកបញ្ជូនទៅមន្ទីរពេទ្យតែពួកគេមិនព្រមទៅឡើយ ដោយលើកហេតុផលខ្លាចឪពុកម្តាយដឹងថាពួកគេដើរលេងផឹកស៊ី នាំឲ្យមានបញ្ហាកាន់តែធំទៀត ៕