ជនសង្ស័យចំនួន២នាក់ ក្នុងចំណោមបក្សពួក៧នាក់ ត្រូវបានកម្លាំងនគរបាលស្រុកបាទី ស្រាវជ្រាវរហូតចាប់ខ្លួនបាន រួចកសាងសំណុំរឿងបញ្ជូនទៅសាលាដំបូងខេត្ត ដើម្បីកាត់ទោសទៅតាមច្បាប់ ខណៈពេលក្រុមជនសង្ស័យទាំងនេះបានធ្វើសកម្មភាពព្រួតគ្នា
ខេត្តតាកែវ ៖ ជនសង្ស័យចំនួន២នាក់ ក្នុងចំណោមបក្សពួក៧នាក់ ត្រូវបានកម្លាំងនគរបាលស្រុកបាទី ស្រាវជ្រាវរហូតចាប់ខ្លួនបាន រួចកសាងសំណុំរឿងបញ្ជូនទៅសាលាដំបូងខេត្ត ដើម្បីកាត់ទោសទៅតាមច្បាប់ ខណៈពេលក្រុមជនសង្ស័យទាំងនេះបានធ្វើសកម្មភាពព្រួតគ្នាដេញកា.ប់ទៅលើជនរងគ្រោះម្នាក់ បណ្តាលអោយរងរបួសយ៉ាងធ្ងន់ធ្ង រួចក៏នាំគ្នារត់គេចខ្លួនបាត់ស្រមោល។ ហេតុការណ៍ស្រាវជ្រាវចាប់ខ្លួនក្រុមជនសង្ស័យនាពេលនេះ បានកើតឡើងកាលពីថ្ងៃទី១២ ខែមករា ឆ្នាំ២០២៣កន្លងទៅនេះ ។
បើតាមលោកវរសេនីយ៍ឯក ឆាយ កែវមុន្នី អធិការនគរបាលស្រុកបាទី បានអោយដឹងថា ក្រោយពេលកើតហេតុដោយមានកាណែនាំពីលោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និងសម្របសម្រួលនីតិវិធីពីលោកព្រះរាជអាជ្ញាអមសាលាដំបូងខេត្តតាកែវផងនោះ លោកបានដឹកនាំកម្លាំងជំនាញស្រាវជ្រាវ រហូតឈានដល់ការឃាត់ខ្លួនជនសង្ស័យចំនួន២នាក់ ក្នុងនោះ ៖ ១- ឈ្មោះ ផាន់ណា សារ៉ា ហៅឆារ៉ា ភេទប្រុស អាយុ១៨ឆ្នាំ មានទីលំនៅភូមិពូនភ្នំ ឃុំត្រពាំងសាប ស្រុកបាទី ខេត្តតាកែវ និង២- ឈ្មោះ វ៉ន ណាត់ ហៅខ្នាត់ ភេទប្រុស អាយុ១៩ឆ្នាំ មានទីលំនៅភូមិតាស៊ូ ឃុំត្រពាំងសាប ស្រុកបាទី ខេត្តតាកែវ នៅត្រង់ចំណុចភូមិកាន់តំរ៉ា ឃុំជង្រុក ស្រុកគងពិសី ខេត្តកំពង់ស្ពឺ ជាបន្តបន្ទាប់ ចំណែកជនសង្ស័យចំនួន៥នាក់ទៀត បានរត់គេចខ្លួនបាត់។
លោកអធិការនគរបាលស្រុកបាទី បានបន្តទៀតថា ក្រុមជនសង្ស័យដែលកម្លាំងយើងបានស្រាវជ្រាវឈានដល់ការចាប់ខ្លួនបាន២នាក់ខាងលើនេះ គឺជាក្រុមដែលពាក់ព័ន្ធក្នុងករណីប៉ុនប៉ងមនុស្សឃា.តដោយចេតនា ដែលបានកើតឡើងកាលពីថ្ងៃទី០៩ ខែមករា ឆ្នាំ២០២៣ វេលាម៉ោង២១និង៤៨នាទីយប់ នៅត្រង់ចំណុចមន្ទីរពេទ្យពហុព្យាបាល និងសម្ភព អង្គរពេជ្រចំបក់ ស្ថិតនៅភូមិសីហា ឃុំចំបក់ ស្រុកបាទី ខេត្តតាកែវ បណ្តាលអោយជនរងគ្រោះឈ្មោះ គីម ឆៃឡេង ហៅចេ ភេទប្រុស អាយុ២១ឆ្នាំ មានទីលំនៅភូមិសីហា ឃុំចំបក់ ស្រុកបាទី ខេត្តតាកែវ រងរបួសធ្ងន់ធ្ងរនៅក្នុងថ្លុកឈា.ម ហើយត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យលោកសង្ឃ (ភ្នំពេញ)ដើម្បីសង្គ្រោះ និងកំពុងសម្រាកព្យាបាល រីឯជនដៃដល់ និងបក្សពួកផ្សេងទៀតកំពុងរត់គេចខ្លួន។ ហើយនៅចំពោះមុខកម្លាំងនគរបាល ជនសង្ស័យបាននិយាយសារភាពថា ពួកគេពិតជាបានធ្វើសកម្មភាពដេញកា.ប់ទៅទៅជនរងគ្រោះពិតប្រាកដមែន។
លោកអធិការនគរបាលស្រុកបាទី បានបញ្ជាក់ថា ចំពោះវត្ថុតាងដែលបានដកហូតបាននោះ រួមមាន ៖ ម៉ូតូ C125 ចំនួន១គ្រឿង ពណ៌ខ្មៅ ស៊េរី០១១ ពាក់ស្លាកលេខ ភ្នំពេញ១IJ 8891, ដាវសាំម៉ូរ៉ៃចំនួន៣ដើម, កាំបិតស្នៀតចំនួន១, កាំបិតចិតបន្លែចំនួន១ និងសម្ភារៈផ្សេងៗជាច្រើនទៀតផងដែរ។
លោកវរសេនីយ៍ឯក សែម សុជាតិ នាយការិយាល័យព្រហ្មទណ្ឌកំរិតធ្ងន់ខេត្ត បានអោយដឹងថា ជនសង្ស័យចំនួន២នាក់ រួចជាមួយនឹងវត្ថុតាង ត្រូវបានកម្លាំងជំនាញរបស់លោកកសាងសំណុំរឿងបញ្ជូនទៅសាលាដំបូងខេត្តរួចហើយនៅល្ងាចថ្ងៃទី១៤ ខែមករា ឆ្នាំ២០២៣ នេះដើម្បីកាត់ទោស ចំណែកក្រុមជនសង្ស័យចំនួន៥នាក់ផ្សេងទៀតដែលកំពុងរត់គេចខ្លួននោះ កម្លាំងជំនាញនឹងបន្តស្រាវជ្រាវ ដើម្បីចាប់ខ្លួនយកមកកាត់ទោសតាមច្បាប់បន្តទៀត។
ចែករំលែកព័តមាននេះ