រាជធានីភ្នំពេញ ៖ ភាពស្របច្បាប់នៃរថយន្តដែលគ្មានពន្ធលែងមានឱកាសទៀតហើយ ចាប់ពីពេលនេះតទៅ សូមយើងទាំងអស់គ្នាចាំមើល តើចំណាត់ការរបស់អគ្គនាយកដ្ឋានគយ និងរដ្ឋាករកម្ពុជាលើបញ្ហារថយន្ត និងម៉ូតូ ជាពិសេស គឺពពួកម៉ូតូធំៗតម្លៃរាប់ម៉ឺនដុល្លារនឹងសម្រេចបានលទ្ធផលយ៉ាងណា?…
រាជធានីភ្នំពេញ ៖ ភាពស្របច្បាប់នៃរថយន្តដែលគ្មានពន្ធលែងមានឱកាសទៀតហើយ ចាប់ពីពេលនេះតទៅ សូមយើងទាំងអស់គ្នាចាំមើល តើចំណាត់ការរបស់អគ្គនាយកដ្ឋានគយ និងរដ្ឋាករកម្ពុជាលើបញ្ហារថយន្ត និងម៉ូតូ ជាពិសេស គឺពពួកម៉ូតូធំៗតម្លៃរាប់ម៉ឺនដុល្លារនឹងសម្រេចបានលទ្ធផលយ៉ាងណា?
លោក គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជាបានបញ្ជាក់ កាលពីថ្ងៃទី១២ ខែ មករា ឆ្នាំ២០២៣ យ៉ាងច្បាស់នៅក្នុងសន្និសីទសារព័ត៌មានថា គយនឹងមិនអនុញ្ញាតឲ្យម្ចាស់រថយន្តគ្មានពន្ធដែលកំពុងប្រើប្រាស់នៅក្នុងប្រទេសបង់ពន្ធនោះទេ ក្រោយផុតឱសាទវាទថ្ងៃទី៣១ ខែធ្នូ ឆ្នាំ២០២២។
លោកបានបញ្ជាក់ថា គយអត់មានគោលការណ៍អនុញ្ញាតឲ្យម្ចាស់រថយន្តកំពុងតែបើកបរប្រើប្រាស់នៅក្នុងប្រទេសគ្មានពន្ធចូលបង់ពន្ធទៀតទេ។ពោល គឺគោលការណ៍ ឬកិច្ចការរបស់គយ គឺធ្វើការនៅព្រំដែនចំពោះទំនិញនាំចូលត្រូវបំពេញកាតព្វកិច្ច ពន្ធអាករនៅមាត់ច្រក មិនមែនមកដល់ក្នុងស្រុកហើយបាននឹកឃើញថា មកបង់ពន្ធ គឺអត់ទេ ដូច្នេះសម្រាប់ម្ចាស់រថយន្តទាំងស្ដាំ-ទាំងឆ្វេង ដែលនៅសេសសល់កំពុងប្រើក្នុងស្រុក អត់មានជម្រើសទេពីព្រោះឱកាសបានផ្តល់ជូនបញ្ចប់ហើយ។
លោកបានបញ្ជាក់យ៉ាងច្បាស់ថា គោលការណ៍ គឺគយបានផ្តល់ជូនហើយមិនអាចបើកចំហរដោយអត់ឱសាទវាទបានទេពីព្រោះបើសិនជាបើកចំហរអត់ឱសាទវាទមានន័យថា ពិបាកទប់ស្កាត់ពាក់ព័ន្ធនឹងការនាំចូលរថយន្តខុសច្បាប់ចូលមកក្នុងប្រទេសកម្ពុជាជាបន្តបន្ទាប់។
នាឱកាសនោះ លោកមេគយបានសង្កត់ធ្ងន់ថា ផុតពីយុទ្ធនាការប្រមូលពន្ធអាករលើរថយន្តគ្មានពន្ធមានស្រាប់ក្នុងប្រទេសនេះ គឺមានតែបង្ក្រាបហើយបង្ក្រាប គឺបន្ទុកធ្ងន់តែម្តង។លោកមិនបានលម្អិតថា និតិវិធីបង្ក្រាបរថយន្ត និងម៉ូតូខុសច្បាប់លំអិតនោះទេ ដោយគ្រាន់តែបញ្ជាក់អំពីការបញ្ចប់ឱសាន្តវាទខាងលើប៉ុណ្ណោះ។
វិធានការប្រឆាំងនឹងរថយន្តខុសច្បាប់ផ្តើមអនុវត្តជាថ្មីកាលពីខែកញ្ញា ឆ្នាំ២០២១ ប៉ុន្តែបានបន្តអនុគ្រោះជាបន្តបន្ទាប់ទៀត នៅខែមិថុនា ឆ្នាំ២០២២ ហើយក៏ពន្យាទៀតដល់ផុតថ្ងៃទី៣១ ខែធ្នូ ឆ្នាំ២០២២ នេះតែម្តង។ នៅក្នុងអំឡុងពេលនេះ រដ្ឋបានប្រមូលចំណូលបានប្រមាណជា១០៦លានដុល្លារពីរថយន្តប្រមាណជាជិត២០.០០០គ្រឿង។នេះ គឺពាក់ព័ន្ធនឹងស្ថានភាពរថយន្តខុសច្បាប់ ប៉ុន្តែចំពោះម៉ូតូវិញជាពិសេស គឺម៉ូតូធំក៏ត្រូវបានលោក គុណ ញឹម ព្រមានផងដែរថា ប្រភេទម៉ូតូធំៗគ្មានពន្ធ គឺជាមុខសញ្ញាដែលអគ្គនាយកដ្ឋានគយ និងរដ្ឋាករកម្ពុជាផ្ដោតលើការចុះបង្ក្រាប និងគ្រប់គ្រងពេលនាំចូល។
តាមតួរលេខនេះ យើងខ្ញុំជឿជាក់ថា សម្រាប់អ្នកដែលគ្មានខ្នង គ្មានខ្នាយ ដែលប្រើប្រាស់រថយន្ត និងម៉ូតូធំៗដែលគ្មានពន្ធ តែតម្លៃរាប់ម៉ឺនដុល្លារទំនងជាបានចូលបង់ពន្ធ និងធ្វើឲ្យយានយន្តនេះស្របច្បាប់អស់ហើយ។ប៉ុន្តែយានយន្តដែលនៅ គឺជាប្រភេទយានយន្តរបស់អ្នកដែល យើងនិយាយថា អាចពិបាកប៉ះ។ចូររង់ចាំមើលទៅមើលថា តើចំណាត់ការបន្ទាប់របស់គយក្តៅប៉ុណ្ណា មានប្រសិទ្ធភាពប៉ុណ្ណា ហើយ តើគយអាណត្តិលោក គុណ ញឹម អាចសម្រេចបានបញ្ហារឿងយានយន្តគេចពន្ធនៅក្នុងប្រទេសបានកម្រិតណា។
សរុបមកវិញ យើងខ្ញុំសង្ឃឹមថា អគ្គនាយកដ្ឋានគយ និងរដ្ឋាករកម្ពុជា នឹងសម្រេចបញ្ហានេះបានជោគជ័យ ដើម្បីបញ្ចប់បញ្ហាដ៏រ៉ាំរ៉ៃកើតមានឡើងម្តងហើយម្តងទៀតដែលចំណុចនេះ គឺកំពុងតែបង្កភាពមិនស្មើភាពនៅក្នុងសង្គម។ខណៈប្រទេសកំពុងជំរុញនិតិរដ្ឋបែរជាជនមួយចំនួនអាងសិទ្ធិ អាងឥទ្ធិពល អាងទ្រព្រនៅតែបន្តប្រើប្រាស់មធ្យោបាយ ឬឧបករណ៍ ឬយានយន្តដែលខុសច្បាប់ដដែល៕ដោយៈ ហេង ចេស្តារ
ចែករំលែកព័តមាននេះ