សង្ស័យឆ្លងចរន្តក្បាលអាគុយបណ្ដាលឲ្យមានការអគ្គិភ័យឆាបឆេះរថយន្តប្រមូលសំរាមរបស់ក្រុមហ៊ុនស៊ិនទ្រីយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់សមត្ថកិច្ចចេញរថយន្តពន្លត់អគ្គិភ័យអន្តរាគមន៍បា.ញ់ទឹកពន្លត់ភ្លាម
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា សង្ស័យឆ្លងចរន្តក្បាលអាគុយបណ្ដាលឲ្យមានការអគ្គិភ័យឆាបឆេះរថយន្តប្រមូលសំរាមរបស់ក្រុមហ៊ុនស៊ិនទ្រីយ៉ាងសន្ធោសន្ធៅ បង្កឱ្យមានការភ្ញាក់ផ្អើលដល់សមត្ថកិច្ចចេញរថយន្តពន្លត់អគ្គិភ័យអន្តរាគមន៍បាញ់ទឹកពន្លត់ភ្លាម កាលពីវេលាម៉ោង៦និង១០នាទីល្ងាច ថ្ងៃទី១១ ខែមករា ឆ្នាំ២០២៣ នៅចំណុចក្នុងការដ្ឋានរបស់ក្រុមហ៊ុនស៊ិនទ្រី ផ្លូវបេតុងបឹងតាម៉ាត ស្ថិតក្នុងភូមិម័ល សង្កាត់ដង្កោ ខណ្ឌដង្កោ ។
សេចក្តីរាយការណ៍បន្តថា ម្ចាស់ទីតាំងខាងលើនេះមានឈ្មោះ សេង សាវី ភេទប្រុស អាយុ៦៥ឆ្នាំ ជាប្រធានក្រុមហ៊ុនស៊ិនទ្រី។
យោងតាមប្រភពព័ត៌មានពីបុគ្គលិកដែលធ្វើការនៅទីនោះ បានអោយដឹងថា មុនពេលកើតហេតុ គឺមានរថយន្តប្រមូលសំរាមរបស់ក្រុមហ៊ុនស៊ិនទ្រី បានទុកតម្រៀបជាជួរច្រើនគ្រឿង និងគ្រោងចេញទៅប្រមូលសំរាមក្នុងរាជធានីភ្នំពេញនៅយប់នេះផងដែរ។
បុគ្គលិកដែលធ្វើការនៅទីនោះបានបន្តថា ហើយពេលនោះមិនដឹងថា តើយ៉ាងម៉េចនោះទេ? ក៏ស្រាប់តែអណ្ដាតភ្លើងបានឆាបឆេះចេញពីក្នុងកាប៊ីនរថយន្តដែលមានលេខសម្គាល់៥៧៩ យ៉ាងសន្ធោសន្ធៅតែម្តង ផ្អើលដល់បុគ្គលិកនៅទីនោះ នាំគ្នាយកបំពង់ពន្លត់អគ្គិភ័យមកបាញ់អស់ជាច្រើនបំពង់ តែមិនរលត់នោះទេ ទើបរាយការណ៍បន្តទៅសមត្ថកិច្ចសុំជំនួយរថយន្ដពន្លត់ និងបង្ការអគ្គិភ័យចេញទៅអន្តរាគមន៍ចំនួន៤គ្រឿង ក្នុងនោះមានរថយន្តរបស់ការិយាល័យបង្ការ និងអគ្គិសនីរបស់ស្នងការដ្ឋាននគរបាលរាជធានីភ្នំពេញចំនួន៣គ្រឿង និងរថយន្តជំនួយរបស់ក្រុមហ៊ុនស្រាបៀរកម្ពុជាចំនួន១គ្រឿង បានធ្វើបាញ់ទឹកអស់ចំនួន២គ្រឿង ទើបធ្វើអោយភ្លើងរលត់ទៅវិញនៅវេលាម៉ោង៦និង៤០នាទីយប់ថ្ងៃដដែលវិញផងដែរ ។
ពាក់ព័ន្ធក្នុងប្រតិបត្តិការខាងលើនេះ សមត្ថកិច្ចបានអោយដឹងថា មិនមានគ្រោះថ្នាក់ដល់មនុស្ស ក៏ដូចជារាលដាលឆេះដល់រថយន្តផ្សេងៗទៀតនោះទេ គឺគ្រាន់តែខូចខាតអស់រថយន្តចំនួន១គ្រឿង និងធ្វើអោយខ្លោចក្បាលរថយន្ដមួយគ្រឿងទៀតដែលនៅជិតគ្នានោះបន្តិចបន្តួចតែប៉ុណ្ណោះ។ ហើយចំពោះមូលហេតុវិញ គឺបណ្ដាលមកពីឆ្លងចរន្តក្បាលអាគុយ ទើបបង្កអោយក្លាយជាអណ្ដាតភ្លើងឆាបឆេះបែបនេះ៕
ចែករំលែកព័តមាននេះ