ផ្អើលឆោឡោ! អណ្ដាតភ្លើងឆាបឆេះរថយន្តបែនដឹកដីក្នុងឃ្លាំងយ៉ាងសន្ធោសន្ធៅ
- ភ្នំពេញ
រថយន្តបែនដឹកដីចំនួន២គ្រឿង ដែលចតនៅក្នុងឃ្លាំងសម្រាប់ជួលដាក់រថយន្តដឹកដី ត្រូវបានអណ្ដាតភ្លើងឆាបឆេះយ៉ាងសន្ធោសន្ធៅស្ទើរតែខ្ទេចអស់ទាំងស្រុង
រថយន្តបែនដឹកដីចំនួន២គ្រឿង ដែលចតនៅក្នុងឃ្លាំងសម្រាប់ជួលដាក់រថយន្តដឹកដី ត្រូវបានអណ្ដាតភ្លើងឆាបឆេះយ៉ាងសន្ធោសន្ធៅស្ទើរតែខ្ទេចអស់ទាំងស្រុង
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្តបែនដឹកដីចំនួន២គ្រឿង ដែលចតនៅក្នុងឃ្លាំងសម្រាប់ជួលដាក់រថយន្តដឹកដី ត្រូវបានអណ្ដាតភ្លើងឆាបឆេះយ៉ាងសន្ធោសន្ធៅស្ទើរតែខ្ទេចអស់ទាំងស្រុង តែសំណាងល្អមិនបណ្ដាលឲ្យមានមនុស្សរងរបួសឡើយ។ ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១២យប់រំលងអធ្រាត្រ ឈានចូលថ្ងៃទី១២ ខែមករា ឆ្នាំ២០២៣ នៅចំណុចឃ្លាំងជួលសម្រាប់ដាក់រថយន្តមួយកន្លែង ចំណុចផ្លូវចូលតាមស្ថានីយបូមទឹកបឹងទំពុន ស្ថិតក្នុងភូមិត្នោតជ្រុំ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញអណ្តាតភ្លើងឆាបឆេះចេញពីរថយន្តបែនដឹកដីមួយគ្រឿងនៅក្នុងចំណោមរថយន្តដឹកដីជាច្រើនគ្រឿង ដែលស្ថិតនៅក្នុងឃ្លាំងខាងលើ។ ភ្លាមៗនោះ អ្នកបើករថយន្តបែនដឹកដីម្នាក់ ដែលកំពុងគេងក្នុងរថយន្តមួយគ្រឿងទៀតបានឃើញភ្លើងឆាបឆេះសន្ធោសន្ធៅ ក៏បានស្រែកហៅគ្នីគ្នាអោយនាំគ្នាជួយពន្លត់ ប៉ុន្តែអណ្តាតភ្លើងឆាបឆេះខ្លាំងពេកមិនអាចគ្រប់គ្រងបាន ទើបនាំគ្នាផ្តល់ដំណឹងទៅកាន់សមត្ថកិច្ចមូលដ្ឋាន ដើម្បីសុំជំនួយពីរថយន្តពន្លត់អគ្គិភ័យតែម្តង។
តាមប្រភពព័ត៌មានពីអ្នកស្នាក់នៅក្បែងកន្លែងកើតហេតុវិញ បានអោយដឹងដែរថា មុនពេលកើតហេតុ ពួកគាត់កំពុងតែសម្រាន្តលក់លង់ លុះដល់ពេលកើតហេតុ ក៏ស្រាប់តែមានគេស្រែកឆោឡោថា «មានភ្លើងឆេះ» ទើបពួកគាត់ដែលស្នាក់នៅទីនោះនាំគ្នារត់ចេញទៅមើលស្រាប់តែឃើញភ្លើងឆេះយ៉ាងសន្ធោសន្ធៅចេញពីក្បាលរថយន្ដបែន ដោយមិនដឹងមូលហេតុនោះទេ។ ភ្លាមៗនោះដែរ ពួកគាត់បាននាំអូសទឹកបាញ់ និងខ្លះទៀតយកបំពង់ពន្លត់អគ្គិភ័យមកបាញ់អស់ជាច្រើនបំពង់ តែភ្លើងនៅតែមិនរលត់ ទើបរាយការណ៍ជូនកម្លាំងសមត្ថកិច្ចសុំជំនួយពីរថយន្ដពន្លត់បង្ការ និងពន្លត់អគ្គីភ័យរបស់ការិយាល័យចេញអន្តរាគមន៍ជួយបាញ់ទឹកពន្លត់ផងដែរ។
ក្រោយពេលទទួលដំណឹងខាងលើនេះភ្លាម ការិយាល័យនគរបាលបង្ការពន្លត់អគ្គិភ័យ និងសង្គ្រោះ បានចេញរថយន្តពន្លត់អគ្គិភ័យចំនួន០៣គ្រឿង មកកាន់ទីតាំងកើតហេតុ ដើម្បីធ្វើការអន្តរាគមន៍បាញ់ទឹកពន្លត់ភ្លាមៗផងដែរ លុះរហូតដល់ម៉ៅង១២និង៣០នាទីយប់ថ្ងៃដដែល ទើបអណ្ដាតភ្លើងរលត់ទៅវិញទាំងស្រុង។
គួរបញ្ជាក់ថា ក្នុងហេតុការណ៍អគ្គិភ័យខាងលើនេះ បានរលត់ទៅវិញទាំងស្រុង ក្រោយការអន្តរាគមន៍របស់មន្ត្រីជំនាញ ក្នុងនោះរថយន្តបែនដឹកដីចំនួន២គ្រឿងត្រូវបានឆាបឆេះស្ទើរទាំងស្រុង។ ហើយចំពោះមូលហេតុនៃការឆាបឆេះនេះ មន្ត្រីជំនាញបានសាកសួរទៅកាន់អ្នកម្ចាស់រថយន្តបែនដឹកដី និងបានបញ្ជាក់ថា សង្ស័យបណ្តាលមកពីការឆ្លងចរន្តនៃអាគុយរថយន្ត ទើបបង្កក្លាយជាអគ្គិភ័យឆាបឆេះតែម្តងទៅ៕ ដោយ ៖ រដ្ឋា
ចែករំលែកព័តមាននេះ