រាជធានីភ្នំពេញ ៖ បណ្តាញសង្គមដ៏ពេញនិយមមាន Facebook និងផ្សេងៗទៀតមិនត្រឹមជាធម្យោបាយទំនាក់ទំនងនោះទេ ប៉ុន្តែវាបានក្លាយជាទីលានមួយសម្រាប់មនុស្សមួយចំនួនបង្អួតគ្នាពីភាពមានបាន ភាពហ៊ឺហា និងការបង្អួតគ្នាពីសម្ភារៈ បុណ្យស័ក្តិ មាសប្រាក់…
រាជធានីភ្នំពេញ ៖ បណ្តាញសង្គមដ៏ពេញនិយមមាន Facebook និងផ្សេងៗទៀតមិនត្រឹមជាធម្យោបាយទំនាក់ទំនងនោះទេ ប៉ុន្តែវាបានក្លាយជាទីលានមួយសម្រាប់មនុស្សមួយចំនួនបង្អួតគ្នាពីភាពមានបាន ភាពហ៊ឺហា និងការបង្អួតគ្នាពីសម្ភារៈ បុណ្យស័ក្តិ មាសប្រាក់ ថែមទៀតផង។
នេះជាទិដ្ឋភាពមួយដែលចង្អុលបង្ហាញសង្គមកាន់តែអោយតម្លៃសំបកក្រៅ ជាជាងតម្លៃខាងក្នុងរបស់មនុស្សដែលជាចំណេះដឹង ការរស់នៅប្រកបដោយសីលធម៌ គ្មានការបៀតបៀនអ្នកដទៃ ភាពស្មោះត្រង់ និង ការទទួលខុសត្រូវខ្ពស់។
នៅលើបណ្តាញសង្គមគេសង្កេតឃើញអ្នកប្រើប្រាស់ភាគច្រើនបង្ហាញតែភាពស្រស់ស្អាតរបស់ខ្លួន។ គេបានខំញញឹម គេខំរកកន្លែងស្អាតៗដើម្បីថតបង្ហោះនៅលើបណ្តាញសង្គម។ អ្នកខ្លះបង្ហាញគេពេលខ្លួនបានចូលផ្សារទំទើប និងពេលខ្លួនបានចេញទៅក្រៅប្រទេស ឬនៅ ពេលបានចូលស្នាក់នៅក្នុងសណ្ឋាគារទំនើបៗជាដើម។ អ្នកខ្លះបានថតបង្ហោះពេលទិញរថយន្តថ្មី និងនៅពេលទិញផ្ទះថ្មី។
តាមពិតទៅទាំងនោះជាសិទ្ធិ និងសេរីភាពមនុស្ស ប៉ុន្តែសកម្មភាពទាំងនោះហាក់បានកំពុងជំរុញឱ្យមានគម្លាតសង្គមកាន់តែធំឡើងរវាងអ្នកមាន និងក្រ។ពិសេសវាហាក់កំពុងជំរុញ និងបណ្តុះឱ្យមាននិន្នាការសម្ភារៈនិយមកាន់តែខ្លាំងឡើង។ វាក៏បានបណ្តុះផ្នត់គំនិតមនុស្សមើលឃើញតែសំបកក្រៅ មិនបានគិតដល់តម្លៃជីវិតដែលប្រកបដោយគុណធម៌មេត្តា និងសច្ចភាពនោះឡើយ។
នៅពេលដែលមនុស្សទូទៅនាំគ្នាផ្តល់តម្លៃទៅលើតែរូបភាពខាងក្រៅ តែភ្លេចគិតពីខ្លឹមសារ សង្គមអាចនឹងបាត់បង់តម្លៃសីលធម៌ វប្បធម៌ និងនិរន្តរភាព ឬភាពរឹងមាំជីវិតទៅថ្ងៃអនាគត។និន្នាការនៃការផ្តល់តម្លៃមនុស្សដោយផ្អែកលើសំបកក្រៅហាក់បានធ្វើឱ្យសង្គមគោរពកោត ខ្លាចមនុស្សដែលមានទ្រព្យសម្បត្តិ បុណ្យស័ក្តិ ដែលគេមើលឃើញភ្លាមៗជាងសម្លឹងរកគុណធម៌ដែលកប់នៅក្នុងខ្លួន។គេបានកោតសរសើរអ្នកមានទ្រព្យ ដោយមិនបានដឹងថា ទ្រព្យនោះបានមកពីណា ឬមិនបានដឹងថា ការមានបាននោះដោយសារមុខរបរអ្វីនោះទេ។
នៅលើបណ្តាញសង្គម គេបានបង្ហោះពីបុណ្យស័ក្តិយស ប៉ុន្តែគេមិនបានសួរនាំ និងគិតថា អ្នកមានបុណ្យស័ក្តិនោះបានធ្វើអ្វី ដើម្បីសង្គមនិងប្រទេសជាតិនោះឡើយ។មិនខុគ្នានេះដែរ គេបានកោតសរសើរអ្នកមានសញ្ញាបត្រខ្ពស់នៅពេលអ្នករៀនចប់ឧត្តមសិក្សា ឬក្រោយឧត្តម សិក្សា ដែលបានបង្ហោះសញ្ញាបត្រនៅលើបណ្តាញសង្គម ប៉ុន្តែគេមិនបានសួរថា អ្នកមានសញ្ញាបត្រនោះបានចេះអ្វីខ្លះ និងបានប្រើប្រាស់ចំណេះដឹងរបស់ខ្លួនដល់សង្គមរបៀបណាទេ?។
ការផ្តល់តម្លៃទៅលើរូបភាពសំបកក្រៅបានធ្វើឲ្យសង្គមកាន់តែភ្លេចពីសីលធម៌ និងគុណធម៌របស់មនុស្សដែលជាទូទៅគេមិនអាចមើលឃើញដោយភ្នែកទទេភ្លាមៗនោះឡើយ។ មនុស្សខ្លះមានគុណធម៌ និងចំណេះដឹងខ្ពង់ខ្ពស់ ប៉ុន្តែគ្មានទ្រព្យសម្បត្តិ មិនមានភាពហ៊ឺហា គេមិនរាប់អាននោះទេ។
ការកើតមានច្រើននូវនិន្នាការឱ្យតម្លៃមនុស្សតែសំបកក្រៅ គេអាចនិយាយបានថា នេះបណ្តាលមកពីការស្រុតចុះនៃតម្លៃសង្គម។ដូច្នេះគេគួរនាំគ្នាគិតគូរពីភាពស្មោះត្រង់សណ្តានចិត្តល្អ មានមេត្តាធម៌ មានគុណភាព ប្រសិទ្ធភាព និងគុណធម៌របស់មនុស្សជំនួសការឲ្យតម្លៃតែសំបកក្រៅ ដើម្បីកាត់បន្ថយវប្បធម៌សម្ភារៈនិយមកាត់បន្ថយគម្លាត អ្នកមាន និងអ្នកក្រ និងជាការសុខដុមសង្គមឱ្យរឹងមាំឡើង៕
ចែករំលែកព័តមាននេះ