- ភ្នំពេញ
រាជធានីភ្នំពេញ ៖ ប្រសិនបើកម្ពុជា ពិតជាមានច្បាប់តម្រូវឲ្យអ្នកនយោបាយទាំងអស់ ត្រូវមានសញ្ជាតិតែមួយនោះ យើងគិតថា រាស្ត្រពិតជាកក់ក្តៅខ្លាំងណាស់ ហើយពួកគេពិតជាសាទរពីព្រោះ គ្រប់គ្នាស្មើភាព ហើយមានជាតិតែមួយដូចគ្នា…
រាជធានីភ្នំពេញ ៖ ប្រសិនបើកម្ពុជា ពិតជាមានច្បាប់តម្រូវឲ្យអ្នកនយោបាយទាំងអស់ ត្រូវមានសញ្ជាតិតែមួយនោះ យើងគិតថា រាស្ត្រពិតជាកក់ក្តៅខ្លាំងណាស់ ហើយពួកគេពិតជាសាទរពីព្រោះ គ្រប់គ្នាស្មើភាព ហើយមានជាតិតែមួយដូចគ្នា ខណៈដែលអ្នក នយោបាយខ្មែរយើងខ្លះ បារាំងខ្លះ អាមេរិកខ្លះ អូស្ត្រាលីជាដើមនោះ។
ការមានសញ្ជាតិតែមួយ ក៏ជាការឆ្លុះបញ្ចាំងអោយឃើញពីភាពជាតិនិយមដែលអ្នកនយោបាយទាំងអស់ គួរតែលើកកម្ពស់។មកដល់ពេលនេះ ទាំងអ្នកនៅក្នុងជួរគណបក្សកាន់អំណាច និងគណបក្សប្រឆាំងរួមទាំងអ្នកនយោបាយភៀសខ្លួននៅក្រៅប្រទេស សុទ្ធតែមានសមាសភាពដែលមានសញ្ជាតិពីរដូចគ្នា ហើយពួកគេកំពុងតែធ្វើការនៅក្នុងជួររដ្ឋាភិបាលផងដែរ។
នៅក្នុងពិធីសម្ពោធបើកការដ្ឋានពង្រីកផ្លូវជាតិលេខ៧ ពីស្គន់ទៅកាន់ទីរួមខេត្តកំពង់ចាម កាលពីថ្ងៃទី០៩ ខែមករា ឆ្នាំ២០២៣ សម្តេចតេជោ ហ៊ុន សែន នៅក្នុងនាមជាមេដឹកនាំគណបក្សកាន់អំណាច ហើយមានសញ្ជាតិតែមួយ គឺកម្ពុជាបានលើកជាថ្មីម្តងទៀតហើយអំពីបញ្ហាសញ្ជាតិនេះ។
នៅក្នុងពេលថ្លែងជាសាធារណៈនោះ សម្តេចក៏បានលើកឡើងហើយក៏ទទួលស្គាល់ផងដែរថា នៅក្នុងជួររដ្ឋាភិបាល មន្ត្រីរាជការ ជាពិសេសនៅក្នុងចំណោមមន្ត្រី គណបក្សប្រជាជនកម្ពុជា ក៏មានអ្នកដែលមានសញ្ជាតិពីរផងដែរ ប៉ុន្តែគណបក្សប្រជាជនកម្ពុជាអាចនឹងសម្រេចបានប្រសិនបើចាំបាច់។
កន្លងមក គណបក្សប្រជាជនកម្ពុជានៅក្នុងនាមជាគណបក្សដែលឈ្នះឆ្នោតបានសម្រេចម្តងរួចមកហើយ កាលពីថ្ងៃទី០៨ ខែ វិច្ឆិកា ឆ្នាំ២០២១ តាមយន្តការច្បាប់ដោយធ្វើវិសោធនកម្មរដ្ឋធម្មនុញ្ញដែលកំណត់ឱ្យប្រធានព្រឹទ្ធសភា ប្រធានរដ្ឋសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញជាដើមមានសញ្ជាតិខ្មែរតែមួយ។
នេះ គឺជាជំហ៊ានដំបូង ប៉ុន្តែប្រសិនបើកម្ពុជាធ្វើការសម្រេចចិត្តមួយជំហានទៀតលើបញ្ហាច្បាប់សញ្ជាតិនេះយើងខ្ញុំគិតថា កម្ពុជាអាចធ្វើទៅបានទោះបីជាមានការឡើងនូវទស្សនៈផ្ទុយគ្នា ខណៈដែលមន្ត្រី និងអ្នកនយោបាយទាំងសង្ខាងមួយចំនួនមានសញ្ជាតិលើសពីមួយក៏ដោយចុះ។
នេះ គឺជាសេចក្តីពិតដោយសារតែនៅពេលដែលកម្ពុជារួបរួមគ្នាកសាងសន្តិភាពរហូតដល់កើតមានការបោះឆ្នោត កាលពីឆ្នាំ១៩៩៣ដំបូង យើងខ្វះធនធានមនុស្សទើបអ្នកដែលមាន សញ្ជាតិពីរជាច្រើននាក់បានចូលមកប្រទេស ហើយកាន់តំណែងធំៗដោយរួមទាំងនាយករដ្ឋមន្ត្រី ប្រធានរដ្ឋសភា ព្រឹទ្ធសភា រដ្ឋមន្ត្រីជាដើមដើម្បីចូលរួមចំណែកជួយស្តា និងអភិវឌ្ឍន៍ប្រទេសបន្ទាប់ពីសង្គ្រាម។
ដោយសារតែទស្សនាទានបែបនេះទើបបញ្ហាសញ្ជាតិបានក្លាយទៅជាបញ្ហាធម្មតានៅក្នុងវប្បធម៌នយោបាយនៅកម្ពុជា។បញ្ហាកង្វះខាតធនធានមនុស្សនេះបានបង្ខំអោយកម្ពុជាទទួលយកសញ្ជាតិពីរ។ប៉ុន្តែមកដល់ពេលនេះ រឿងធនធានមនុស្សនេះ យើងខ្ញុំជឿជាក់ថា លែងជាបញ្ហាចោទទៀតហើយពីព្រោះតាំងពី ១៩៩៣ ឬក្រោយសន្តិភាពពិតប្រាកដ នៅចុងឆ្នាំ១៩៩៨ មកដល់ពេលនេះកម្ពុជាបានបញ្ជូនពលរដ្ឋក្មេងៗជាច្រើននាក់ចេញទៅសិក្សានៅក្រៅប្រទេស មានទាំងអាមេរិក បារាំង ជប៉ុន អូស្ត្រាលី កូរ៉េខាងត្បូង ។ល។
ក្រោមគោលនយោបាយដែលចាត់ទុកការអភិវឌ្ឈធនធានមនុស្ស គឺជាអទិភាពរបស់គណបក្សប្រជាជនកម្ពុជា និងរាជរដ្ឋាភិបាលដែលបានដឹកនាំដោយគណបក្សនេះតាំងពីបោះឆ្នោតតំបូងមក ដល់ពេលនេះវា២៥ ឆ្នាំហើយ ដូច្នេះបញ្ហាធនធានមនុស្សយើងខ្ញុំជឿជាក់ថា លែងចោទសម្រាប់ការសម្រេចចិត្តរបស់គណបក្សប្រជាជន កម្ពុជានៅក្នុងការសម្រេចចិត្តដ៏ពិត ប្រាកដលើបញ្ហាសញ្ជាតិពីរនេះហើយ ។
នៅលើពិភពលោកដែលមានប្រទេសឯករាជ្យចំនួនជាង១៩០ ប្រទេស មានប្រទេសប្រមាណជា៦០ប៉ុណ្ណោះ អនុញ្ញាតឲ្យពលរដ្ឋមានសញ្ជាតិពីរ ហើយប្រទេសដែលអនុញ្ញាតឲ្យមេដឹកនាំមានសញ្ជាតិពីរ គឺកាន់តែតិចថែមទៀតដោយសារតែវាពាក់ព័ន្ធ នឹងការទទួលខុសត្រូវភាពស្មោះស្ម័គ្រ បញ្ហាជាតិនិយម។
សរុបសេចក្តីទៅមកដល់ពេលនេះ កម្ពុជាក៏គួរតែដល់ពេលដែលត្រូវ បញ្ចប់បញ្ហាសញ្ជាតិនៅក្នុងមជ្ឈដ្ឋានអ្នកនយោបាយ និង ថ្នាក់ដឹកនាំប្រទេសកម្ពុជាហើយ។ប្រសិនបើអ្នកចង់ធ្វើអ្នកដឹកនាំ រដ្ឋមន្ត្រី តំណាងរាស្ត្រ ស្ថាប័នតុលាការ ស្ថាប័នច្បាប់ ការកំណត់អត្តសញ្ញណជាតិ ជាពិសេស គឺសញ្ជាតិនេះ គួរតែជាកាតព្វកិច្ច សម្រាប់តែពលរដ្ឋកម្ពុជា។នៅក្នុងករណីអ្នកចង់បានសញ្ជាតិពីរ អ្នកមិនហ៊ានលះបង់សញ្ជាតិបរទេសបាន គឺអាចធ្វើត្រឹមជាទីប្រឹក្សា មន្ត្រីមកបច្ចេកទេស ធុរជន និងពលរដ្ឋធម្មតាបានហើយ ។
អ្នកនយោបាយត្រូវតែមានស្មារតីជាតិនិយមខ្ពស់ ហើយហ៊ានបោះបង់សញ្ជាតិពីរ ដើម្បីជាការបង្ហាញជាតិនិយម និងការតាំងចិត្តពិតប្រាកដ ដើម្បីបម្រើប្រទេសកម្ពុជា៕ដោយៈ ហេង ចេស្តារ
ចែករំលែកព័តមាននេះ