រាជធានីភ្នំពេញ ៖យើងម្នាក់ៗសុទ្ធតែប្រាថ្នាជីវិតមួយដែលជោគជ័យ និងពោពេញដោយក្តីសុខ ប៉ុន្តែការស្វែងរកសេចក្តីសុខសម្រាប់ខ្លួននោះ គឺជារឿងមួយដ៏លំបាកសម្រាប់ជីវិតមនុស្សមួយចំនួនធំ។ សេចក្តីសុខ និងសេចក្តីចម្រើន គឺកើតឡើងចំពោះអ្នកលុះត្រាតែអ្នកជាបុគ្គលម្នាក់ដែលខិតខំធ្វើការរកស៊ីសុច្ចរិត មិនបំពានអ្នកដទៃ មិនធ្វើឲ្យអ្នកដទៃក្តៅក្រហាយដោយសារខ្លួន…
រាជធានីភ្នំពេញ ៖យើងម្នាក់ៗសុទ្ធតែប្រាថ្នាជីវិតមួយដែលជោគជ័យ និងពោពេញដោយក្តីសុខ ប៉ុន្តែការស្វែងរកសេចក្តីសុខសម្រាប់ខ្លួននោះ គឺជារឿងមួយដ៏លំបាកសម្រាប់ជីវិតមនុស្សមួយចំនួនធំ។
សេចក្តីសុខ និងសេចក្តីចម្រើន គឺកើតឡើងចំពោះអ្នកលុះត្រាតែអ្នកជាបុគ្គលម្នាក់ដែលខិតខំធ្វើការរកស៊ីសុច្ចរិត មិនបំពានអ្នកដទៃ មិនធ្វើឲ្យអ្នកដទៃក្តៅក្រហាយដោយសារខ្លួន ជាពិសេសត្រូវតែពេញចិត្តនូវអ្វីដែលខ្លួនកំពុងមាន។
ការរីករាយ និងពេញចិត្ត នូវអ្វីដែលខ្លួនកំពុងមាន និងអ្វីដែលខ្លួនកំពុងធ្វើនេះ គឺជាមាគ៌ាមួយដែលឆ្ពោះទៅរកសេចក្តីស្ងប់ និងសេចក្តីសុខផ្លូវចិត្តបានយ៉ាងពិតប្រាកដនៅក្នុងជីវិតរបស់យើងម្នាក់ៗ។ ដូច្នេះហើយយើងមិនត្រូវបណ្តោយខ្លួនឲ្យក្លាយជាមនុស្សម្នាក់ដែលពោពេញដោយការច្រណែន និងពោពេញដោយការប្រៀបធៀបទៅបុគ្គលដទៃឡើយ។
យើងត្រូវចំណាយពេលវេលាសម្រាប់ខ្លួន ដើម្បីកសាងសមត្ថភាព និងខិតខំប្រកបរបររកស៊ីឲ្យបានរឹងមាំ និងឲ្យរីកចម្រើនវិញប្រសើរជាង។មួយវិញទៀតបើយើងមានសុខភាពល្អ ក៏ធ្វើឲ្យយើងមានក្តីសុខដែរ។នៅពេលដែលជីវិតអ្នកទទួលជោគជ័យនោះ អ្នកនឹងអាចដឹងថាការមិនយកខ្លួនទៅប្រៀបធៀបជាមួយអ្នកដទៃ គឺជាគុណតម្លៃ និងគុណសម្បត្តិ កម្រិតណាសម្រាប់អ្នក។
បើនិយាយពីសេចក្ដីសុខមានសណ្ឋានច្រើនយ៉ាង មនុស្សខ្លះនិយាយថា មានទ្រព្យសម្បត្តិទើបមានសេចក្តីសុខ ឯខ្លះទៀតនិយាយថា មានស្នេហ៍ស្មោះទើបមានសេចក្តីសុខ តែបើនិយាយតាមទ្រឹស្តីព្រះពុទ្ធសាសនា «បុគ្គលគ្រប់រូបត្រូវចាំថា មិនមែនមានទ្រព្យជាមហាសេដ្ឋីហើយ បានសុខគ្រប់យ៉ាងនោះឡើយ។» បើដូច្នោះតើសុខកើតមកអំពីអ្វី ?
ព្រះសម្មាសម្ពុទ្ធទ្រង់ត្រាស់សម្ដែងថា អ្នកដែលសម្លា.ប់សេចក្ដីក្រោធបានរមែងដេកនៅជាសុខ នេះជាការពិតដែលយើងគ្រប់គ្នាត្រូវចាំកុំភ្លេច ហើយត្រូវបដិបត្តិកម្ចាត់ការខឹងក្រោធឱ្យបាន បើមិនបានទាំងស្រុង គ្រាន់តែរៀនបន្ថយការខឹងក៏ជាការល្អ។ យើងត្រូវយល់ថា បើយើងខឹងនឹងគេ ដូចដុតចិត្តខ្លួនឯងឱ្យក្តៅ បើយើងដុតចិត្តខ្លួនឯង យើងហ្នឹងឯងជាអ្នកក្តៅ ។ ខឹងនឹងគេ គឺអន់ជាងគេ អន់ជាងអ្នកដែលយើងខឹងនោះទៅទៀត ។
ខឹងនឹងគេព្រោះមិនយល់ពីការណ៍ពិត គឺយើងមិនយល់អំពីសន្តានរបស់បុថុជ្ជន ដែលតែងតែប្រព្រឹត្តទៅតាមអំណាចនៃចរិតធម្មជាតិរបស់គេ ចរិតល្អ ការប្រព្រឹត្តរបស់មនុស្សនោះក៏ល្អ តែបើចរិតមិនល្អក៏មានកាយវិការឆ្គាំឆ្គង ដូច្នេះបើយើងចង់បានសុខត្រូវរៀនលះវៀរការក្រោធខឹងពីឥឡូវនេះទៅ ៕
ចែករំលែកព័តមាននេះ