ខេត្តព្រៃវែង ៖ ដោយមានទឹកចិត្តសទ្ធាជ្រះថ្លា អ្នកឧកញ៉ាថុង អ៊ុយប៉ាង ស្ថាបនិកសារព័ត៌មានកោះសន្តិភាពនិងលោកជំទាវឧកញ៉ា យីន ផានី្ន , ឯកឧត្តមបណ្ឌិតជា…
ខេត្តព្រៃវែង ៖ ដោយមានទឹកចិត្តសទ្ធាជ្រះថ្លា អ្នកឧកញ៉ាថុង អ៊ុយប៉ាង ស្ថាបនិកសារព័ត៌មានកោះសន្តិភាពនិងលោកជំទាវឧកញ៉ា យីន ផានី្ន , ឯកឧត្តមបណ្ឌិតជា ហ្គារ៉ូដា និងលោកជំទាវថុង សុវណ្ណរង្សីយ៍ ព្រមទាំងបុត្រ បានចំណាយថវិកាផ្ទាល់ខ្លួន ដោយចូលរួមកសាងខ្លោងទ្វារវត្តកោងទន្លេ រួមនិងសមិទ្ធផលនានា ត្រូវបានកាត់ខ្សែបូដាក់សម្ពោធឱ្យប្រើប្រាស់ នាព្រឹកថ្ងៃទី០៧ មករា ឆ្នាំ២០២៣ នេះ ។ ជាមួយគ្នានោះ ក៏មានការចូលរួមពីសហការី ព្រមទាំងសប្បុរសជនជាច្រើនរូបទៀតផងដែរ ។
ព្រះតេជគុណយុន ល័ក្ខ ព្រះគ្រូសូត្រស្តាំ វត្តកោងទន្លេមានថេរៈដីការំលឹកថា កាលពីមុន ផ្លូវចូលមកកាន់បរិវេណវត្តកោងទន្លេ មានការលំបាកស្មៅដុះទ្រុបទ្រុល ហើយតូចចង្អៀតផងនោះ ត្រូវបានលោកតាយីន ត្រូវជាឪពុកបង្កើតរបស់លោកជំទាវយីន ផានី្ន បានបរិច្ចាគធនធានផ្ទាល់ខ្លួនស្ថាបនាផ្លូវលំមួយខ្សែចូលមកកាន់បរិវេណវត្ត និងសាលាបុណ្យមួយខ្នងផង ដើម្បីបង្កលក្ខណៈដល់ពុទ្ធបរិស័ទចំណុះជើងវត្តជិតឆ្ងាយងាយស្រួលយកចង្ហាន់មកប្រគេនព្រះសង្ឃក្នុងរដូវបុណ្យទាន ។
ព្រះតេជគុណគ្រូសូត្រស្ដាំវត្តកោងទន្លេ មានថេរដីការបន្តថា តាមរយៈការធ្វើបុណ្យដាក់ទានពីសំណាក់លោកតាយីន រួមនិងសមាជិកក្រុមគ្រួសារ ធ្វើឲ្យទីអារាមវត្តកោងទន្លេ មានការរីកចម្រើនជាបន្តបន្ទាប់ ។ ជាមួយនោះអ្នកឧកញ៉ាថុង អ៊ុយប៉ាង និងលោកជំទាវឧកញ៉ា យីន ផានី្ន បានចលនាសប្បុរសជនទាំងនៅទីជិតទីឆ្ងាយបានថវិកាក្រាស់ក្រែល មកកសាងព្រះវិហារមួយថ្មីស្រឡាង នៅចំកណ្ដាលបរិវេណវត្តដោយចំណាយថវិកាអស់ជាច្រើនម៉ឺនដុល្លារ ។
ដោយមានការបិណ្ឌបាតពីសំណាក់ព្រះចៅអធិការវត្តលោកឧកញ៉ាទាំងពីរ ព្រមទាំងសមាជិកក្រុមគ្រួសារ
បានបរិច្ចាគថវិកាកសាងខ្លោងទ្វារថ្មីស្រឡាងដែលមើលទៅស្អាតគួរឱ្យចាប់ចិត្តចំណាយថវិការអស់ចំនួន ១៥,៥០៩ដុល្លារ ដោយបានរៀបចំបុណ្យកាន់អង្គរយៈពេល៣ថ្ងៃ គឺនៅថ្ងៃទី០៦ ដល់០៨ មករា ឆ្នាំ២០២៣។ ឆ្លៀតឱកាសទំនេរពីការងារអ្នកឧកញ៉ាថុង អ៊ុយប៉ាង ព្រមទាំងសហការី បានចំណាយពេលអញ្ជើញមកចូលរួមកាត់ខ្សែបូ នាព្រឹកថ្ងៃទី៧មករា ។
ព្រះអង្គពិតជាសប្បាយព្រះទ័យព្រោះអ្នកឧកញ៉ា និងក្រុមគ្រួសារតែងតែបរិច្ចាគថវិកា ជាហូរហែដើម្បីរួមចំណែកកសាងសមិទ្ធផលនានាក្នុងទីអារាមវត្តកោងទន្លេ ស្ថិតនៅស្រុកស៊ីធរកណ្ដាលខេត្តព្រៃវែង។ បន្ទាប់ពីការខ្សែបូ រួចបានរាប់បាត្រដល់ព្រះសង្ឃជាច្រើនអង្គ ជាមួយនោះអ្នកឧកញ៉ានិងលោកជំទា វក៏បានបរិច្ចាគ
ថវិកាដាក់ទានដល់ពលរដ្ឋ ដែលមានជីវភាពខ្វះខាតផងដែរ។ ក្រៅពីខ្លោងទ្វារថ្មីស្រឡាងនេះ នាពេលកន្លងមកអ្នកឧកញ៉ា និងលោកជំទាវ ក៏បានបរិច្ចាគកសាងខ្លោងទ្វារចាស់ ដែលនៅមិនឆ្ងាយប៉ុន្មានពីគ្នានោះទេ ។
សូមបញ្ជាក់ថា អ្នកឧកញ៉ានិងលោកជំទាវ អញ្ជើញមកលេងស្រុកកំណើត ជាមួយនោះក៏បានបរិច្ចាគអំណោយដល់អ្នកភូមិជាច្រើននាក់ផងដែរ ក្នុងមនោសញ្ចេតនាគួរឲ្យស្រឡាញ់ និងរាក់ទាក់ទៀតផង ។
ចែករំលែកព័តមាននេះ