ព្រឹត្តិការណ៍រត់ចម្ងាយឆ្ងាយលើកទី៦នៅតំបន់អង្គរឆ្នាំ២០២៣មានអ្នកចូលរួមរត់កើនឡើងទេ្វដង
- ភ្នំពេញ
រាជធានីភ្នំពេញ ៖ ព្រឹត្តិការណ៍រត់ចម្ងាយឆ្ងាយឆ្លងកាត់ឧបសគ្គលើកទី៦ដែលគ្រោងធ្វើឡើងនៅថ្ងៃទី
រាជធានីភ្នំពេញ ៖ ព្រឹត្តិការណ៍រត់ចម្ងាយឆ្ងាយឆ្លងកាត់ឧបសគ្គលើកទី៦ដែលគ្រោងធ្វើឡើងនៅថ្ងៃទី៤ ខែកុម្ភះ ឆ្នាំ២០២៣នៅខេត្តសៀមរាប ទោះបីជាមានការខកខានអស់រយៈពេល២ឆ្នាំដោយសារជំងឺកូវីដ-១៩ក្ដី ប៉ុន្តែ លើកនេះមានអ្នកចូលរួមរត់កើនឡើងទេ្វដងលើសពីអ្វីដែលយើងរំពឹងទុក ។ នេះបើតាមការឱ្យដឹងពីឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា នៅក្នុងសន្និសីទសារព័ត៌មានកាលពីព្រឹកថ្ងៃទី៦ មករា ឆ្នាំ២០២៣។
ឯកឧត្តមវ៉ាត់ ចំរើន បានមានប្រសាសន៍ថា ព្រឹត្តិការណ៍រត់ចម្ងាយឆ្ងាយឆ្លងកាត់ឧបសគ្គឆ្នាំ២០២៣ ថ្វីត្បិតតែមានការខកខានអស់រយៈពេល២ឆ្នាំគឺកាលពីឆ្នាំ២០២១និង២០២២ដោយសារការឆ្លងរាលដាលនៃជំងឺកូវីដ-១៩ក្ដី ក៏នៅឆ្នាំ២០២៣ គឺជាឱកាសស្ដារឡើងវិញដើម្បីស្រូបយកភ្ញៀវទេសចរ ។
គិតមកត្រឹមថ្ងៃនេះយើងទទួលបានអ្នកមកចុះឈ្មោះរត់មកពីបណ្ដាប្រទេសតំបន់អឺរ៉ុបកើនឡើងជិត៩០០នាក់ទៅហើយ ។ ឯកឧត្តមរដ្ឋលេខាធិការរូបនេះបានឱ្យដឹងទៀតថា សម្រាប់វិញ្ញាសាដែលត្រូវរត់គឺវិញ្ញាសារត់ចម្ងាយ១០០គីឡូមែត្រ ៦៤គីឡូមែ៉ត្រ រត់៤២គីឡូម៉ែត្រ រត់៣២គីឡូម៉ែត្រ រត់ចម្ងាយ១៦ម៉ែត្រនិង៨គីឡូម៉ែត្រ ។ ឯកឧត្តមមានប្រសាសន៍លើកឡើងទៀតថា ព្រឹត្តិការណ៍កីឡាទេសចរណ៍មួយនេះខ្លឹមសាររបស់វាមិនមែនការប្រកួតប្រជែងយកឧត្តមភាព ដើម្បីចាញ់ឈ្នះនោះទេគឺជាលក្ខណៈកំសាន្តសប្បាយៗប៉ុណ្ណោះ ចំណុចសំខាន់របស់វាធ្វើយ៉ាងណាត្រូវតែរត់ឱ្យដល់ទីទោះបីរត់កាន់ឈើច្រត់ក៏ដោយ។
កម្មវិធីរត់នេះគឺបានផ្ដល់ផលចំណេញច្រើនដើម្បីផ្សព្វផ្សាយទៅកាន់ក្រៅប្រទេស ព្រោះថាតំបន់អឺរ៉ុបគឺជាទីផ្សារដ៏សំខាន់បំផុតរបស់យើង។
លោក Edouard GEORGE អ្នករៀបចំព្រឹត្តិការណ៍រត់នេះបានឱ្យដឹងផងដែរថា បច្ចុប្បន្នយើងនៅរង់ចាំភ្ញៀវទេសចរចិនបន្ថែមទៀត ព្រោះថាខាងចិននៅមិនទាន់បើកទ្វារចេញមកក្រៅប្រទេសនៅឡើយនោះទេ បើមានភ្ញៀវចិនមកទៀត គឺកាន់តែមានការកើនឡើង ។ ប៉ុន្តែយើងគិតថា កម្មវិធីមួយនេះជិតដល់ខាងចិនមកចុះឈ្មោះ យើងសង្ឃឹមថានឹងមានការកើនឡើង។
អ្វីដែលលោកមានការចាប់អារម្មណ៍ខ្លាំងដោយសារវិបត្តិកូវីដ ធ្វើឱ្យការធ្វើដំណើរជួបរឿងលំបាកខ្លះៗ ហើយយើងមិននឹកស្មានថា មានអ្នកមកចុះឈ្មោះកើនឡើងបែបនេះនោះទេ។សម្រាប់ប្រទេសដែលចូលរួមច្រើនជាងគេគឺបារាំង ចំណែកខ្មែរយើងក៏មានច្រើនដែរដែលមានរហូតដល់ទៅ២០០នាក់។
ព្រឹត្តិការណ៍រត់ប្រណាំងចម្ងាយឆ្ងាយនេះមានគោលបំណងសំខាន់ចំនួន៣គឺទី១-ដើម្បីធ្វើការផ្សព្វផ្សាយតំបន់ទេសចរណ៍របស់យើងឱ្យកាន់តែមានសកម្មភាពខ្លាំងក្លាឡើង។
ទី២-ដើម្បីជំរុញលើកកម្ពស់កីឡាករ-កីឡាការិនីក៏ដូចអ្នករត់កម្ពុជាយើង ដើម្បីបានថែរក្សា
សុខភាព និងមានការចូលរួមកាន់តែច្រើន ព្រមទាំងលើកកម្ពស់វិស័យកីឡាដែលជាវិស័យមួយ
ធានាបាននូវសុខភាពខ្លាំងបំផុត និងទី៣-ជាសន្ដានចិត្តរបស់លោកGEORGEដើម្បីយកកម្មវិធីរត់ប្រណាំងជួយទៅដល់សកម្មភាពសង្គមបានច្រើនដូចជាផលិតទឹកស្អាត និងកសាងស្ពានជាដើម ៕
ចែករំលែកព័តមាននេះ