រាជធានីភ្នំពេញ ៖ ពេជ្រជាវត្ថុមានតម្លៃមហាសាលមួយ នៅលើទីផ្សារអន្តរជាតិ ប៉ុន្តែមកដល់ពេលបច្ចុប្បន្ននេះនៅកម្ពុជាវាកំពុងតែក្លាយទៅជាទំនិញមួយដែលមានលក់នៅលើបណ្តាញសង្គម។ដូច្នេះ សូមប្រុងប្រយ័ត្ន។
នៅលើទីផ្សារអន្តរជាតិពេជ្រមានតម្លៃថ្លៃបំផុតពោល គឺត្រឹមទំហំ០,៥០ ការ៉ាត វាមានតម្លៃពី៦១០ដុល្លារទៅ២.៩០០ ដុល្លារ ខណៈដែលទំហំមួយការ៉ាត់មានតម្លៃពី២.៥០០ដុល្លារទៅដល់១៨.០០០ដុល្លារ ហើយត្រឹម១.៥០ ការ៉ាត់ គឺវាមានតម្លៃពី៤.៤០០ដុល្លាទៅ៣២.០០០ ដុល្លារ ហើយជាទូទៅវាអាចមានទំហំរហូតដល់៥ការ៉ាត់ ដែលមានតម្លៃពី៤៨.០០០ ដុល្លារទៅ៣៣៧.៥០០ដុល្លារឯណោះ។ដូច្នេះតម្លៃនេះ គឺថ្លៃខ្លាំងណាស់។
តាមឯកសារបានឲ្យដឹងថា តម្លៃនៃពេជ្រ គឺវាប្រែប្រួលខ្លាំងទៅតាមទំហំគិតជាការ៉ាត់ ហើយបន្ទាប់មក គឺពាក់ព័ន្ធនឹងពណ៌ និងគុណភាពផ្សេងៗទៀត ដែលយើងពិបាកនឹងមើលហើយពន្យល់ដោយភ្នែកទទេបាន ពីព្រោះពេលខ្លះពេជ្រនិងអំបែងកែវបើយើងមិនចេះមើលយើងគិតថា អាចដូចគ្នាក៏ថាបានដែរ។
មុននឹងទិញពេជ្រវាមានសារៈសំខាន់ណាស់ក្នុងការយល់ដឹងអំពីចំណុចសំខាន់ៗនៃពេជ្រ។ ដូច្នេះយើងខ្ញុំមិនផ្តល់អនុសាសន៍ឲ្យទាំងអស់គ្នាទៅទិញពេជ្រនោះទេ ពីព្រោះវាងាយខាតបង់ងាយរងនូវការបោកបញ្ឆោត ជាពិសេស គឺនៅលើគុណភាពនៃពេជ្រនោះតែម្តង។ អស់លោក លោកស្រីអាចទិញខ្លះដើម្បីជាគ្រឿងលំអរលើខ្លួន ប៉ុន្តែបើទិញហើយរក្សាទុក ដើម្បីដោះដូរ គឺវាមិនប្រសើរជាងទិញមាស ឬយកប្រាក់ទៅផ្ញើនៅធនាគារយកការប្រាក់នោះទេ។
នៅពេលដែលលោកអ្នកសម្រេចចិត្តថា ទិញគ្រឿងពេជ្រអ្វីដែលយើងខ្ញុំអាច ចែករំលែកបាននោះ គឺចូរព្យាយាមពិភាក្សាអំពីតម្លៃ និងពិនិត្យមើលកិច្ចព្រមព្រៀងព្រមទាំងប័ណ្ណធានាឲ្យបានត្រឹមត្រូវ។ក្រៅពីនោះហាងពេជ្រ ដែលទិញនោះទៀតសោត គឺត្រូវតែមានប្រវត្តិមានឈ្មោះមានអស័យដ្ឋានទីតាំងត្រឹមត្រូវទាំងអស់។ពោល គឺអស់លោក/លោកស្រីគួរតែដឹងពីអ្វីដែលអ្នកចង់បាន និងរបៀបធ្វើឱ្យប្រាកដថា អ្នកកំពុងទទួលបានអ្វីដែលអ្នកកំពុងចំណាយឲ្យវាសាកសម។ អ្នកត្រូវតែប្រាកដថា អ្នកកំពុងអនុវត្តតាមដំណើរការនៃការទិញនេះ ដើម្បីធានាថា អ្នកមិនត្រូវបានគេបោកប្រាស់។
តាមបទពិសោធន៍នៅប្រទេសគេ ដើម្បីធានាភាពត្រឹមត្រូវទាំងតម្លៃ និងគុណភាព អស់លោក/លោកស្រី ត្រូវតែទទួលបានការបញ្ជាក់។ការបញ្ជាក់នេះ គឺជាជំហានសំខាន់បំផុត។ វាជារឿងចាំបាច់បំផុត ប្រសិនបើអ្នកចំណាយច្រើនជាង ១.000 ដុល្លារ លើពេជ្រមួយគ្រាប់។គោលបំណងនៃការទិញពេជ្រជាមួយនឹងវិញ្ញាបនបត្រ គឺដើម្បីធានាថាអ្នកកំពុងទទួលបានពេជ្រដែលសមនឹងតម្លៃរបស់វា។នៅស្រុកគេវិញ្ញាបនបត្រដែលទទួលស្គាល់អំពីគុណភាពពេជ្រ គឺមានមកពីមន្ទីរពិសោធន៍ GIA និង AGS។
GIA មកពីពាកពេញថា Gemological Institute of America វាជាអង្គការមិនរកប្រាក់ចំណេញដែលផ្តោតលើការស្រាវជ្រាវ និងការអប់រំអំពីត្បូង និងគ្រឿងអលង្ការត្បូងនៅអាមេរិក ចាប់តាំងពីឆ្នាំ១៩៣១ ហើយAGS វិញ មកពី American Gem Society ដែលជាសមាគមពាណិជ្ជកម្មមិនរកប្រាក់ចំណេញ អាមេរិកដែលប្រមូលផ្តុំដោយ អ្នកជំនាញគ្រឿងអលង្ការដ៏ល្អដែលឧទ្ទិសដល់ការកំណត់រក្សា និងលើកកម្ពស់ស្តង់ដារខ្ពស់បំផុតនៃក្រមសីលធម៌ និងអាកប្បកិរិយាវិជ្ជាជីវៈនៃពាណិជ្ជកម្មត្បូងមានតម្លៃ។
សរុបមកវិញពេជ្រ គឺជាទម្រង់ដ៏រឹងមាំនៃធាតុកាបូនជាមួយនឹងអាតូមរបស់វាដែលកើតឡើងនៅក្នុងរចនាសម្ព័ន្ធគ្រីស្តាល់ដែលហៅថា ពេជ្រគូប។ទម្រង់រឹងមួយទៀតនៃកាបូនដែលគេស្គាល់ថា ជាក្រាហ្វីត គឺជាទម្រង់កាបូនដែលមានស្ថេរភាពគីមីនៅសីតុណ្ហភាព និងសម្ពាធនៅក្នុងកម្រិតមួយ ប៉ុន្តែពេជ្រអាចរលាយបានហើយបំប្លែងរូបរាងខូចខាតទ្រង់ទ្រាយទៅតាមសំពាធសីតុណ្ហភាព និងលក្ខខណ្ឌផ្សេងៗដូច្នេះហើយក្រៅពីគ្រឿងលំអវាមិនមែនជាវត្ថុសម្រាប់ដោះដូរដ៏មានប្រសិទ្ធភាពនៅក្នុងការទូទាត់ដូចជាមាសឡើយ៕ដោយៈ ហេង ចេស្តារ
ចែករំលែកព័តមាននេះ