ADផ្ទាំងផ្សព្វផ្សាយពាណិជ្ជកម្ម

Picture

វិភាគ ៖ នៅ​ភ្នំពេញ ​មិន​មាន​ទេ​ ផ្ទះបន​បើកចំហរ ដូច​ជា​តំបន់​ទួល​គោក កាលពី​អតីត​កាលនោះ ប៉ុន្តែ​មិនមែន​មាន​ន័យ​ថា ទីក្រុង​មួយ​នេះ ​គ្មាន​សេវា​ផ្លូវភេទ​នោះ​ទេ​។…

វិភាគ ៖ នៅ​ភ្នំពេញ ​មិន​មាន​ទេ​ ផ្ទះបន​បើកចំហរ ដូច​ជា​តំបន់​ទួល​គោក កាលពី​អតីត​កាលនោះ ប៉ុន្តែ​មិនមែន​មាន​ន័យ​ថា ទីក្រុង​មួយ​នេះ ​គ្មាន​សេវា​ផ្លូវភេទ​នោះ​ទេ​។ សេវា​ផ្លូវភេទ បាន​កំពុង​ដំណើរការ​យ៉ាង​សកម្ម​ ទោះបី​នៅ​ក្នុង​កាលៈទេសៈ​ ជំងឺកូ​វី​ដ-​១៩​រាតត្បាត​នេះ​ក្តី​។ ការ​រក​ទទួលទាន​ដោយ​ប្រយោលនូវសេវាកម្ម​ផ្លូវភេទ​នេះ ត្រូវ​គេ​ដឹង​ថា​ បាន​ជ្រក​ក្រោមស្លាក​មុខរបរ​សេវា​កម្សាន្ត​មួយ​ចំនួន មាន​ដូច​ជា ៖ ​បៀរហ្គាឌិន ខារ៉ាអូខេ ហាង​ម៉ាស្សា​ និងនៅ​តាម​ផ្ទះសំណាក់ ឫសណ្ឋាគារ​ តែ​ម្តង ​។

ទោះបីជា​មាន​នារី​រកស៊ី​ផ្លូវភេទ​មួយ​ចំនួន ​បាន​ចេញ​មុខ​រក​ទទួលទាន​របរ​នេះ ដើម្បីចិញ្ចឹមជីវិត​ដោយ​ចំហរ នៅ​រមណីយដ្ឋាន​វត្ត​ភ្នំ ឬ​នៅ​តាម​តំបន់​មួយ​ចំនួន​ ដូច​ជា​នៅម្តុំ​ស្ទឹង​មាន​ជ័យ ស្វាយប៉ាកជាដើម​នោះ​ក្តី​។ តែ​នៅ​តាម​តំបន់​នោះ​ ជា​ញឹកញាប់​ត្រូវ​បាន​បង្ក្រាប ដោយសមត្ថកិច្ច ហាក់​មិន​មាន​សុវត្ថិភាព ​ដូច​ការ​លាក់​មុខ​នោះ​ទេ ទោះបីជា​ពួក​គាត់ តែងតែ​តស៊ូ​មតិ ទាមទារ​ទៅ​សមត្ថ​កិច្ច​ថា​នោះជា​សិទ្ធិ​ និង​ការ​ជ្រើសរើស​ដោយ​ស្ម័គ្រចិត្ត​ ដើម្បី​ក្រពះ​យ៉ាង​ក្តី​ ។

អ្នករក​ទទួលទាន​ដោយ​ចំហរ​ ទំនង​មិន​បាន​ថ្លៃ​សេវាកម្ម​ខ្ពស់ ​ដូច​អ្នក​ដែល​រកស៊ី​ដោយ​ប្រយោល​នោះ​ទេ​។ អ្នករក​ស៊ី​ផ្លូវភេទ ​ដោយ​ប្រយោល​ ជា​ទូទៅ​មាន​រូបរាង​ស្អាត ស្រស់​សោភា និង​នៅ​វ័យក្មេង​។ ចំណែក​អ្នក​រកស៊ី​ ដោយ​ចំហរ មាន​វ័យ​ចំណាស់ ហើយ​ពួក​គាត់​ បាន បញ្ជាក់​ថា​ ការ​ជ្រើសរើស​របរ​នេះ ​ដោយសារ​ពូក​គាត់​ទាល់​ខ្លាំង​ផ្នែក​ជីវភាព​។ លើស​ពី​នេះ ភាគច្រើន​ពួក​គាត់​ជា​អ្នក​រង​គ្រោះ​ពី​បញ្ហា​សង្គម មាន​អំពើហិង្សា​ក្នុង​គ្រួសារ និងការ​ចាប់រំលោភ​។ មួយ​ចំនួន​ក្នុង​ចំណោម​ពួក​គាត់ មាន​បន្ទុកគ្រួសារ​ត្រូវ​ចិញ្ចឹម មានកូន ឬ​ឪពុក​ម្តាយជរា​ជាដើម ​។

ចំណែក​នារី​រក​ផ្លូវភេទ​ដោយ​ប្រយោល​ ការ​ចាប់​របរ​នេះ ​ក៏​ដើម្បី​ក្រពះ​នោះ​ដែរ​។ នៅ​ប៉ុន្មានថ្ងៃនេះ មាន​ករណី​មួយ​បាន​កំពុង​ផ្អើល​ពេញ​បណ្តាញ​សង្គម គឺ​បុរស​ម្នាក់ ដែល​បានស្វែងរក​ការ​សប្បាយ​ជាមួយ​នារី​រកស៊ី​ផ្លូវភេទ​ម្នាក់ ប៉ុន្តែ​មិន​ព្រម​ចំណាយ​ប្រាក់ តាម​ការ​ច​ចារ​គ្នា ​នៅ​មុន​ពេល​ឡើងផ្ទះ​សំណាក់​នោះ​។ តាម​រយៈ​វី​ដេ​អូ​ខ្លី​មួយ បាន​បង្ហាញ​ឱ្យ​គេ​ដឹង​ថា ​តម្លៃ​សេវា​ផ្លូវភេទ​នោះ ថ្លៃ​៨០​ដុល្លារ​។
ក្រោយ​បែកធ្លាយ​វី​ដេ​អូ​នោះ​មក មានការ​លើក​ឡើង​ថា​ តម្លៃ​សេវា​ផ្លូវភេទ​នៅ​ភ្នំពេញ មិនធម្មតា​នោះ​ទេ ។ តម្លៃ​៨០​ដុល្លារ គឺជា​ចំនួន​មួយ​ខ្ពស់​ ។

បុរស​មួយ​ចំនួន ​ដែល​និយម​ការ​សប្បាយ​នៅ​ក្រៅ​ផ្ទះ ​បានឱ្យ​ដឹង​ថា ជា​មធ្យម​តម្លៃ​សេវា​ផ្លូវភេទនៅ​ភ្នំពេញ ដែល​គេ​អាច​រកបាន​នៅ​តាម​ហាង​ម៉ាស្សា ហាង​ខារ៉ាអូខេ ឬ​នៅ​បៀ​ហា្គ​ឌិន​នោះ មាន​តម្លៃ​ក្នុង​រង្វង់​១០០​ដុល្លារ​នេះឯង​ ។

នារី​រកស៊ី​សេវា​ផ្លូវភេទ ​ដោយ​ប្រយោល​ម្នាក់​ បាន​និយាយ​ថា ទោះបី​នៅ​ក្នុង​សម័យកូ​វី​ដ-​១៩ នេះ​ក្តី ក៏​ខ្លួន​គាត់​ចេញ​រក​ប្រាក់​នោះ​ដែរ​។ ស្ត្រី​រូប​នោះ​និយាយ​បន្តថា គ្មាន​អ្វី​សំខាន់ជាង​ក្រពះ​ឡើយ​។ ​ជំងឺ​ និង​ភាព​ខ្មាស់​អៀន​ជា​រឿង​មួយ ដែល​មិន​សំខាន់​ជាង​ប្រាក់ទ្រ​ទ្រង់​ការ​រស់នៅ​ប្រចាំ​ថ្ងៃ​ឡើយ ​។

នារី​រកស៊ី​ផ្លូវភេទ​ដដែល​នោះ បាន​បញ្ជាក់​ថា “​គ្មាន​នរណា​ចង់​ធ្វើ​អ៊ីចឹង ប៉ុន្តែ​បើ​យើងមិន​ធ្វើ បាន​អី​ហូប​ ? គ្មាន​ប្រាក់ ​លំបាក​ណាស់​! បទ​ពិសោធន៍​កាល​គេ​បិទ​តំបន់មួយ​ចំនួននៅ​ភ្នំពេញ សេវា​កម្សាន្ត​នានា​បាន​បិទ​។ ខ្ញុំ​បាន​ទៅ​ស្រុក ហើយ​គ្មាន​លុយ​ចាយ​ទេ​។ ដូច្នេះ ការ​បើកប្រទេស​ឡើង​វិញ​ បាន​ផ្តល់​ឱកាស​ឱ្យ​ខ្ញុំ​រក​លុយ​ចិញ្ចឹមជីវិត​ ហើយក៏គ្មាន​នរ​ណា​ចិញ្ចឹម​យើង ក្រៅពី​ខ្លួន​យើង​នោះ​ទេ​។ ខ្ញុំ​គ្មាន​អី​ហូប​ ទើបខ្ញុំ​លក់ខ្លួន​។ គ្មាន​នរណា​ចង់​ទេ​” ៕
ដោយ៖ សា​រ៉ា​ន់

អត្ថបទសរសេរ ដោយ

កែសម្រួលដោយ