ខេត្តកំពង់ចាម ៖ ប្រជាពលរដ្ឋរស់នៅភូមិទី៣ ស្ថិតក្នុងឃុំកោះសូទិន ស្រុកកោះសូទិន បាននាំគ្នាដាំដុះដំណាំជាច្រើនប្រភេទ ដើម្បីទ្រទ្រង់ជីវភាពគ្រួសារ។ ហើយនៅតំបន់នេះ ក្នុងរដូវវស្សា ត្រូវបានទឹកទន្លេមេគង្គឡើងមកជន់លិច ដោយមិនអាចបង្កបង្កើនផលបាននោះទេ។
បើតាមអ្នកស្រី សែម វ៉ាន់ថេន អាយុ៥៤ឆ្នាំ រស់នៅភូមិទី៣ បានរៀបរាប់ឲ្យដឹងនាព្រឹកថ្ងៃទី៥ខែមករា ឆ្នាំ២០២៣នេះថា ក្រោយពីរៀបអាពាហ៍ពិពាហ៍ គាត់ត្រូវបានឪពុកម្ដាយចែកដីឱ្យនៅក្នុងភូមិបានតែបន្តិចបន្តួច។ ក្រៅពីនេះ គាត់បានជួលដីគេមួយកន្លែង នៅចំណុចព្រែកតាឃ្លោក ដើម្បីដាំផ្លែម្រះសម្រាប់បេះលក់នៅនឹង រោងក្បែរចម្ការតែម្ដង។
អ្នកស្រី វ៉ាន់ថេន បានរៀបរាប់បន្តឱ្យដឹងទៀតថា ក្រោយពីទឹកទន្លេមេគង្គបានស្រកទៅវិញ ប្ដីរបស់គាត់បានភ្ជួររាស់ដី ដើម្បីឲ្យធូរងា.យដាំដុះដំណាំ។ ក្នុងពេលដែលបោះបង្គោលឬស្សីដាំម្រះនោះ នៅដើមទីមេឃបានបង្អល់ភ្លៀងធ្លាក់មកជាបន្តបន្ទាប់ជាច្រើនមេ ដែលជាហេតុធ្វើឲ្យមើមដើមម្រះមិនសូវល្អ។ ជាធម្មតា ការដាំដុះក្នុងរយៈពេលមួយខែកន្លះ និងហុចផលជាបណ្ដើរៗហើយ។
អ្នកស្រីបន្តថា ក្នុងមួយថ្ងៃ អាចបេះបានប្រមាណ៥០គីឡូក្រាម ហើយពេលបោះឱ្យគេបានមួយគីឡូចំនួន២៧០០រៀល។ ប្រសិនបើអាកាសធាតុអំណោយផលល្អ ផ្លែម្រះហុចផលច្រើនក្នុងមួយថ្ងៃអាចបេះបានជិត១០០គីឡូក្រាម ក៏មានដែរ។ ជារៀងរាល់ព្រឹក គាត់បានធ្វើដំណើរចេញពីផ្ទះមកបេះផ្លែម្រះ ដោយដាក់លក់នៅរោងក្រោមដើមឈើក្បែរចម្ការនៅព្រែកតាឃ្លោក ដែលអាចលក់បានមួយគីឡូក្រាមតម្លៃ៣០០០រៀលទៅ៤០០០រៀល ក្នុងនោះមានអ្នកភូមិក៏មកទិញ ហើយអ្នកធ្វើដំណើរឆ្លងកាត់ទៅវិញទៅមកច្រើន ក៏បានឈានចូលទិញយកទៅសម្រាប់ធ្វើម្ហូបពិសារផងដែរ។
អ្នកស្រីបន្តទៀតថា ក្រៅពីម្រះ ប្ដីរបស់គាត់បានដាំពោតបន្ថែម ដើម្បីបង្កើនប្រាក់ចំណូលក្នុងគ្រួសារ។ ក្នុងនោះកូនប្រុសបងបានរៀនចប់សាកលវិទ្យាល័យម្នាក់ និងកូនម្នាក់ទៀតរៀនសាកលវិទ្យាល័យឆ្នាំទី២ ដោយសារតែមុខរបរនេះហើយ បានជួយដល់គ្រួសាររបស់គាត់ឲ្យបានធូរធាគ្រាន់បើ។ ចំពោះការដាំម្រះនេះ គឺគាត់ចេះត.គ្នាពីឪពុកមកកូន ហើយក៏ចង់ឱ្យជំនាញបច្ចេកទេស នៃមន្ទីរកសិកម្មជួយបង្រៀនដល់កសិករផងដែរ ដើម្បីធ្វើយ៉ាងណាឱ្យទិន្នផលដែលបានមកច្រើន ហើយបន្លែដែលហុចផលគឺមិនប៉ះពាល់សុខភាព ដែលគេហៅថាបន្លែសុវត្ថិភាព។
ចំណែកលោក អ៊ុក គោរព មន្ត្រីបច្ចេកទេស នៃមន្ទីរកសិកម្មរុក្ខាប្រមាញ់ និងនេសាទខេត្ត បានបញ្ជាក់នៅរសៀលថ្ងៃទី៥ ខែមករា ថា ប្រសិនបើកសិករចង់រៀនអំពីបច្ចេកទេសនៃការដាំដុះបន្លែបង្ការ ត្រូវតែស្នើសុំលិខិតមកមេឃុំបញ្ជូនមកការិយាល័យកសិកម្មស្រុក និងបន្តបញ្ជូនមកមន្ទីរកសិកម្មខេត្តចាប់ពី១៥នាក់ឡើង ខាងបច្ចេកទេសនឹងចុះបង្រៀនដោយផ្ទាល់តែម្ដង។
ចែករំលែកព័តមាននេះ