រាជធានីភ្នំពេញ ៖ កម្មវិធីដកពិន្ទុប័ណ្ណបើកបរ និងការបង់ប្រាក់ពិន័យអន្តរការណ៍ចំពោះអំពើល្មើសច្បាប់ស្ដីពីចរាចរណ៍ផ្លូវគោកបានចាប់ផ្តើមដាក់ឱ្យដំណើរការអនុវត្តពេញលេញជាផ្លូវការហើយ ចាប់ពីថ្ងៃទី០១ ខែមករា ឆ្នាំ២០២៣នេះតទៅ។ដូច្នេះសូមប្រុងប្រយ័ត្ន ដើម្បីកុំអោយពិន្ទុលើប័ណ្ណបើកបរអស់មិនដឹងខ្លួន។ គណៈកម្មាធិការជាតិសុវត្ថិភាពចរាចរណ៍ផ្លូវគោកបានអះអាងថា អ្នកបើកបរយានយន្តពិសេស…
រាជធានីភ្នំពេញ ៖ កម្មវិធីដកពិន្ទុប័ណ្ណបើកបរ និងការបង់ប្រាក់ពិន័យអន្តរការណ៍ចំពោះអំពើល្មើសច្បាប់ស្ដីពីចរាចរណ៍ផ្លូវគោកបានចាប់ផ្តើមដាក់ឱ្យដំណើរការអនុវត្តពេញលេញជាផ្លូវការហើយ ចាប់ពីថ្ងៃទី០១ ខែមករា ឆ្នាំ២០២៣នេះតទៅ។ដូច្នេះសូមប្រុងប្រយ័ត្ន ដើម្បីកុំអោយពិន្ទុលើប័ណ្ណបើកបរអស់មិនដឹងខ្លួន។
គណៈកម្មាធិការជាតិសុវត្ថិភាពចរាចរណ៍ផ្លូវគោកបានអះអាងថា អ្នកបើកបរយានយន្តពិសេស គឺរថយន្តគ្រប់រូបត្រូវយកតាមខ្លួននូវប័ណ្ណបើកបរច្បាប់ដើម ដើម្បីផ្តល់ជូនសមត្ថកិច្ចត្រួតពិនិត្យ និងអនុវត្តការដកពិន្ទុក្នុងករណីមានការប្រព្រឹត្តល្មើសច្បាប់។
ការដកពិន្ទុលើបណ្ណបើកបរ គឺធ្វើទៅតាមកម្រិតស្រាល ឬធ្ងន់ ឬបង្កគ្រោះថ្នាក់ពោល គឺបើកបង្កគ្រោះថ្នាក់ និងមានហានិភ័យខ្ពស់ គឺដកច្រើន។ពិន្ទុសរុបមានចំនួន១២ ហើយបើអស់ស្មើនឹងដកហូតប័ណ្ណបើកបរ។ ប្រសិនបើអ្នកបើកបរចង់បើកបរ គឺត្រូវទៅរៀន និងប្រឡងយកប័ណ្ណបើកបរមកវិញ ប៉ុន្តែនៅក្នុងករណីបើពិន្ទុត្រូវបានដកខ្លះ អ្នកបើកបរអាចទៅរៀន ដើម្បីបំពេញពិន្ទុមកវិញ។
នីតិវិធីនៃការបន្ថែម និងការបំពេញពិន្ទុឡើងវិញសម្រាប់ប័ណ្ណបើកបរ ក្នុងករណីដែលពិន្ទុត្រូវកាត់បន្ថយមួយចំនួន ហើយអ្នកបើកបរចង់បង្កើនពិន្ទុឡើងវិញត្រូវរៀនបំប៉នទ្រឹស្តីរយៈពេល២ថ្ងៃ ដើម្បីប្រឡងយកពិន្ទុបន្ថែមដែលមានចំនួនមិនលើសពី៤ពិន្ទុ រីឯការបន្ថែមពិន្ទុមិន អនុញ្ញាតឱ្យមានចំនួនលើសពី១១ពិន្ទុឡើយ។
អ្នកបើកបរអាចរៀនបំប៉នផ្នែកទ្រឹស្តី និងប្រឡងយកពិន្ទុបន្ថែមបានច្រើនដង ប៉ុន្តែការរៀន និងប្រឡងនេះត្រូវប្រព្រឹត្តទៅយ៉ាងតិចក្នុងរយៈពេល៦ខែម្តងៗ។ក្នុងករណីដែលពិន្ទុត្រូវបានកាត់បន្ថយមួយចំនួនហើយ ប៉ុន្តែក្នុងរយៈពេល៣ឆ្នាំ បន្ទាប់ពីការកាត់បន្ថយពិន្ទុចុងក្រោយ អ្នកបើកបរពុំមានបទល្មើសចរាចរណ៍អ្វីមួយបន្ថែមទៀត ដែលនាំឱ្យមាន ការកាត់បន្ថយពិន្ទុនោះទេ អ្នកបើកបរត្រូវទទួលបានការបំពេញពិន្ទុឡើងវិញដោយ ស្វ័យប្រវត្តិដែលមានចំនួន១២ពិន្ទុ។
ក្នុងករណីដែលអស់ពិន្ទុបណ្ណបើកបរត្រូវទុកជាមោឃៈ ហើយបើអ្នកបើកបរចង់បានប័ណ្ណបើកបរថ្មីត្រូវរៀនបំប៉ន និងប្រឡងយកប័ណ្ណបើកបរឡើងវិញក្នុងរយៈពេលយ៉ាងតិច៦ខែ ចាប់ពីថ្ងៃដែលប័ណ្ណបើកបរត្រូវទុកជាមោឃៈ លើកលែងតែអ្នកបើកបរបង្កឱ្យមានរបួសដល់អ្នកដទៃដោយអចេតនា ហើយបណ្តាលឱ្យអ្នករងគ្រោះអសមត្ថភាពធ្វើការងារ ក្នុងរយៈពេលស្មើ ឬលើស៨ថ្ងៃ គិតពីថ្ងៃកើតហេតុ ឬស្លា.ប់ អ្នកបើកបរអាចរៀនបំប៉ន និងប្រឡងយកប័ណ្ណបើកបរជាថ្មីឡើងវិញក្នុងរយៈពេលយ៉ាងតិច៥ឆ្នាំ គិតចាប់ពីថ្ងៃដែលប័ណ្ណបើកបរត្រូវទុកជាមោឃៈ។
ការដាក់ឱ្យដំណើរការនូវកម្មវិធីដកពិន្ទុបណ្ណបើកបរ និងការបង់ប្រាក់ពិន័យចំពោះអំពើល្មើសច្បាប់ស្ដីពីចរាចរណ៍ផ្លូវគោកនេះត្រូវបានគណៈកម្មាធិការជាតិសុវត្ថិភាពចរាចរណ៍ផ្លូវគោករៀបចំឡើងក្នុងគោលបំណងបង្កើនប្រសិទ្ធភាពនៃការរឹតបន្តឹងការអនុវត្តច្បាប់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ឱ្យបានជាអតិបរិមាក៏ដូចជាបង្កលក្ខណៈងាយស្រួលជូនប្រជាពលរដ្ឋក្នុងការបង់ប្រាក់ពិន័យល្មើសច្បាប់។ម្យ៉ាងវិញទៀត ការដកពិន្ទុបណ្ណបើកបរ និងការពិន័យអន្តរការណ៍ចំពោះអំពើល្មើសច្បាប់ស្តីពីចរាចរណ៍ផ្លូវគោកនេះត្រូវបានអនុវត្តដោយឧបករណ៍បច្ចេកទេស ដើម្បីកត់ត្រាព័ត៌មាន រក្សាទុកក្នុងប្រព័ន្ធ។
មុនពេលដែលកម្មវិធីដកពិន្ទុប័ណ្ណបើកបរ និងការបង់ប្រាក់ពិន័យអន្តរការណ៍ចំពោះអំពើល្មើសច្បាប់ស្ដីពីចរាចរណ៍ផ្លូវគោកបានចាប់ផ្តើមដាក់ឱ្យដំណើរការអនុវត្តពេញលេញកម្មវិធីនេះបានដាក់ឱ្យដំណើរការអនុវត្តសាកល្បងទូទាំងប្រទេសបួនខែមកហើយ គឺចាប់តាំងពីថ្ងៃទី០១ ខែកញ្ញា ឆ្នាំ២០២២មក។
យោងតាមក្រសួងសាធារណការបានបញ្ជាក់ថា នៅក្នុងរយៈពេល៤ខែនៃការដាក់ឱ្យដំណើរការអនុវត្តសាកល្បងនូវកម្មវិធីដកពិន្ទុប័ណ្ណបើកបរនៅតាមគោលដៅមួយចំនួន គឺមានប័ណ្ណបើកបរប្រមាណ ២៣.០១៥ប័ណ្ណ ត្រូវបានដកពិន្ទុ។
សូមគោរពច្បាប់ចរាចរណ៍ ហើយប្រសិនបើយើងម្នាក់ៗមិនគោរពទេ នោះ គ្រោះថ្នាក់ចរាចរណ៍នៅក្នុងប្រទេសរបស់យើង គឺនៅតែមានកំណើនកើនឡើង។សូមធ្វើដំណើរប្រកាន់ខ្ជាប់នូវច្បាប់ចរាចរណ៍ជានិច្ចជាក់ស្តែងគ្រោះថ្នាក់ចរាចរណ៍ផ្លូវគោកទូទាំងប្រទេសដែលកើតឡើងត្រឹមតែនៅថ្ងៃទី០១ ខែមករា ឆ្នាំ២០២២ ដែលជាថ្ងៃឈប់សម្រាកឆ្លងឆ្នាំមានមនុស្សគ្រោះថ្នាក់ចរាចរណ៍សរុបដល់ទៅ១៣ ករណីសម្លា.ប់មនុស្សរហូតដល់ចំនួន៨នាក់របួសធ្ងន់ចំនួន១២នាក់ និងរបួសស្រាលចំនួន៩នាក់។
ដូច្នេះយើងទាំងអស់គ្នា បង្កើនការប្រុងប្រយ័ត្ននៅក្នុងការបើកបរ ដើម្បីកុំអោយមានគ្រោះថ្នាក់តាមដងផ្លូវផង និងដើម្បីរក្សាពិន្ទុនៅក្នុងប័ណ្ណបើកបររបស់ខ្លួនផង។បើប័ណ្ណបើកបរអស់ពិន្ទុត្រូវរៀនឡើងវិញ ដែលនឹងនាំអោយខាតពេលវេលា និងលុយកាក់។ ដូច្នេះសូមរក្សាពិន្ទុនៅក្នុងបើកបររបស់ខ្លួនអោយនៅល្អ ដើម្បីកុំអោយខាតពេលទៅរៀនបើកបរឡើងវិញ៕ដោយៈ ហេង ចេស្តារ
ចែករំលែកព័តមាននេះ