ខេត្តសៀមរាប ៖ កម្លាំងការិយាល័យនគរបាលប្រឆាំងបទល្មើសសេដ្ឋកិច្ចខេត្ត សហការជាមួយមន្ទីរសុខាភិបាលខេត្ត ដឹកនាំដោយលោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្ត បានឱ្យម្ចាស់ទីតាំង
ខេត្តសៀមរាប ៖ កម្លាំងការិយាល័យនគរបាលប្រឆាំងបទល្មើសសេដ្ឋកិច្ចខេត្ត សហការជាមួយមន្ទីរសុខាភិបាលខេត្ត ដឹកនាំដោយលោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្ត បានឱ្យម្ចាស់ទីតាំងមជ្ឈមណ្ឌលថែសម្ផស្ស ដាវី អារីយ៉ា ម៉ិញតាំ ដែលអត់ច្បាប់ធ្វើអាជីវកម្មនៅក្រុងសៀមរាប បករូបភាពផ្សាយពាណិជ្ជកម្ម កែសម្ផស្សដោយការវះកាត់ ចេញពីកន្លែងធ្វើអាជីវកម្មរបស់ខ្លួន ។ បន្ទាប់មកឱ្យម្ចាស់ទីតាំងធ្វើកិច្ចសន្យា ដើម្បីបញ្ឈប់ការបើកសេវាឯកជនខុសច្បាប់ និងផ្ទុកឱសថខុសច្បាប់ ដែលផ្ទុយពីច្បាប់ស្តីពីការគ្រប់គ្រងឱសថ និងច្បាប់ស្តីពីការប្រកបវិជ្ជាជីវៈឯកជន ក្នុងវិស័យវេជ្ជសាស្ត្រ អមវេជ្ជសាស្ត្រ និងជំនួយវេជ្ជសាស្ត្រ ។
ការបង្ក្រាបនេះធ្វើឡើងនៅរសៀលថ្ងៃទី២៦ មិថុនា នៅទីតាំងជិតក្រុមហ៊ុនជិះបាល់ឡុងមុខប្រាសាទអង្គរតូច ក្នុងភូមិវាល សង្កាត់គោកចក ក្រុងសៀមរាប ។ លោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្តបានឱ្យដឹងនៅវេលាម៉ោង១២និង៣០នាទីថ្ងៃទី២៧ មិថុនាថា ម្ចាស់ទីតាំងខាងលើ មានឈ្មោះ សូយ៉ូសីហ៊ ភេទប្រុស អាយុ៣៥ឆ្នាំ ។
លោកបន្តថា សមត្ថកិច្ចយើងបានរកឃើញវត្ថុតាងខុសច្បាប់មួយចំនួនមាន ទី១-ស៊ីរាំង Sering ៥ml ចំនួន៩៩ ស៊ីរាំង, ទី២-ឱសថ២មុខ ស្មើនឹង៩៦គ្រាប់ និងទី៣-ឱសថ ហួសកំណត់ប្រើប្រាស់ចំនួន៧ដប ព្រមទាំងឱ្យម្ចាស់ទីតាំងបករូបភាពផ្សាយពាណិជ្ជកម្មកែសម្ផស្ស និងវះកាត់កែសម្ផស្សដូចជា៖ កែច្រមុះ បបូរមាត់ កែត្របកភ្នែក២ជាន់ និងដាក់ចង្កាឱ្យស្រួច ដោយគ្មានច្បាប់អនុញ្ញាតឱ្យធ្វើអាជីវកម្ម ព្រោះទីតាំងនេះមានតែច្បាប់កែសម្ផស្សប៉ុណ្ណោះមានដូចជា ផាត់ត្របកភ្នែក ។ល។
លោកបានបញ្ជាក់ទៀតថា ម្ចាស់ទីតាំងខាងលើនេះមានច្បាប់អនុញ្ញាតឱ្យបើកតែកែសម្ផស្សប៉ុណ្ណោះ មិនមានច្បាប់ឱ្យធ្វើការវះកាត់កែសម្ផស្សឡើយ ។ លោកបានបញ្ជាក់បន្ថែមទៀតថា ចំពោះម្ចាស់ទីតាំងខាងលើកម្លាំងជំនាញបានឱ្យធ្វើកិច្ចសន្យា ដើម្បីបញ្ឈប់បើកសេវាឯកជនខុសច្បាប់ និងផ្ទុកឱសថខុសច្បាប់ ដែលផ្ទុយពីច្បាប់ស្តីពីការគ្រប់គ្រងឱសថ និងច្បាប់ស្តីពីការប្រកបវិជ្ជាជីវៈឯកជនក្នុងវិស័យវេជ្ជសាស្ត្រ ។
លោកបញ្ជាក់ទៀតថា ករណីនេះដែរ លោកបានសុំយោបល់ទៅតំណាងអយ្យការអមសាលាដំបូងខេត្តហើយ បានសម្រេចឱ្យម្ចាស់ទីតាំងបកស្លាកវះកាត់កែសម្ផស្សចេញព្រោះគ្មានច្បាប់ទម្លាប់ត្រឹមត្រូវទេ ប្រសិនបើពុំធ្វើតាមការណែនាំរបស់សមត្ថកិច្ចនោះទេ លោកព្រមានថាយើងនឹងអនុវត្តតាមច្បាប់ ។
ចែករំលែកព័តមាននេះ