ខេត្តបាត់ដំបង ៖ បើទោះជាអាជ្ញាធរស្រុក-ខេត្ត និងមន្ត្រីការពារព្រំំដែនគ្រប់ស្ថាប័ន ធ្លាប់អួតអាងកាលពីពេលថ្មីៗកន្លងទៅនេះថា ពួកគេបាននិងកំពុងរឹតបន្តឹងដាក់ពង្រាយកម្លាំងកកកុញនៅតាមបន្ទាត់ព្រំដែនកម្ពុជា-ថៃ ដើម្បីទប់ស្កាត់ការរត់ពន្ធមនុស្ស ឬទំនិញឆ្លងដែន ចេញទីប្រទេសថៃយ៉ាងប្រទាក់ក្រឡាក្ដី ប៉ុន្តែបទល្មើសរត់ពន្ធមនុស្ស និងការលួចរត់ពន្ធទំនិញឆ្លងដែនពីកម្ពុជាចេញទៅប្រទេសថៃដោយខុសច្បាប់ ហាក់ដូចជាគ្មានការថមថយឡើយ ។
ជាពិសេស នៅតាមច្រករបៀងនានាក្នុងភូមិសាស្ត្រស្រុកកំរៀងតែម្ដង ដែលគេសង្កេតឃើញថា បទល្មើសរត់ពន្ធឆ្លងដែននេះ ហាក់មានការធូរលុងបំផុត ។ ជាក់ស្ដែង នៅវេលាម៉ោងប្រហែលជាង៨យប់ថ្ងៃទី២៣ មេសា កម្លាំងនគរបាលការពារដែន សហការជាមួយកម្លាំងយោធា បានឆ្មក់ទៅបង្ក្រាបទំនីញរត់ពន្ធ (បារី) ដែលពួកជនទុច្ចរិតប្រើប្រាស់មធ្យោបាយដឹកជញ្ជូនទៅស្ដុកទុកនៅក្បែរមាត់អូរព្រំដែនបម្រុងនាំឆ្លងដែនចេញទៅប្រទេសថៃ ត្រង់ចំណុច«ស្ពានឈើ ផ្ទះតាយូន» ដែលស្ថិតក្នុងភូមិអូរក្រូច ឃុំបឹងរាំង ស្រុកកំរៀង ។
យោងតាមសេចក្ដីរាយការណ៍បានឲ្យដឹងថា កិច្ចប្រតិបត្តិការដូចភ្លេកបន្ទោរនេះ កម្លាំងសមត្ថកិច្ចរឹបអូសបានតែវត្ថុតាងទេ រីឯក្រុមជនទុច្ចរិតហាក់ដឹងខ្លួនមុន ក៏រត់គេចខ្លួនបាត់អស់ភ្លាមៗ បន្សល់ទុកតែវត្ថុតាង ដូចជាបារី ម៉ូតូ រទេះរុញ និងកូនត្រាក់ទ័រ ដែលជាមធ្យោបាយដឹកជញ្ជូន ។
គេមិនបានបង្ហាញឲ្យដឹងពីអត្តសញ្ញាណមេឈ្មួញទំនិញបារីនេះ ឬឈ្មោះកម្មករដឹកជញ្ជូន ឬម្ចាស់មធ្យោបាយដឹកជញ្ជូនណាម្នាក់ទេ ។ នៅកន្លែងកើតហេតុ គេឃើញកម្លាំងនគរបាលវរៈការពារ និងកម្លាំងយោធា ជាអ្នកគ្រប់គ្រងសម្ភារ និងវត្ថុតាងដែលបានរឹបអូស ។ របាយការណ៍បឋមមួយដែលកោះសន្តិភាពទទួលបានបង្ហាញថា វត្ថុតាងដែលរឹបអូសយកបានរួមមាន៖ ១-បារីចំនួន៦០ប៊ិក ២-រទេះរុញចំនួន០៥គ្រឿង ៣-កូនត្រាក់ទ័រ០១គ្រឿង និង៣-ម៉ូតូចំនួន០៦គ្រឿង ប៉ុន្តែជនល្មើសបានរត់រួចទាំងអស់ ។
ប្រភពព័ត៌មានបានរាយការណ៍ថា នៅចំណុចដែលពួកជនទុច្ចរិតបំរុងនាំបារីឆ្លងដែននេះជា «ស្ពានឈើឆ្លងអូរព្រំដែន» ហើយវានៅមិនឆ្ងាយប៉ុន្មានទេ ពីចំណុចស្ពានឆ្លងដែលកម្លាំងសមត្ថកិច្ចបង្ក្រាបបទល្មើសរត់ពន្ធ«បារី»នេះ កាលពីខែមុន ។ កម្លាំងដែលចុះបង្ក្រាប ឬទប់ស្កាត់នូវទំនិញឆ្លងដែនខុសច្បាប់នេះបានឲ្យដឹងថា ក្រោយពីគ្រប់គ្រងវត្ថុតាងបានមួយដង្ហើមចង្រិត ពួកគេបានធ្វើកំណត់ហេតុប្រគល់ទំនិញ និងមធ្យោបាយដែលរឹបអូសបានទាំងអស់ប្រគល់ជូនទៅខាងអធិការស្រុកកំរៀង ដើម្បីចាត់ការបន្តហើយ ។
អធិការស្រុកកំរៀង លោក វេ គឹមចត់ មិនអាចសុំការបំភ្លឺបន្ថែមបានទេ ពាក់ព័ន្ធនឹងវត្ថុតាងបទល្មើស ដែលកម្លាំងការពារព្រំដែនចាប់ប្រគល់ជូនខាងលើនេះ ដោយលោកបានឆ្លើយតបយ៉ាងរដិបរដុបតាមទូរស័ព្ទថា «លោកស្ដាប់អត់បាន ឮសូរដាច់ៗ» ។
នេះមិនមែនជាលើកទី១ទេ ដែលលោកអធិការរូបនេះ «ឆ្លើយរដិបរដុប ធ្វើជាស្ដាប់មិនបាន» ឲ្យតែអ្នកសារព័ត៌មានសួរនាំប៉ះចំរឿងរសើបៗ ។ នេះជាទម្លាប់របស់លោក វេ គឹមចត់ ដែលតែងរកលេសផ្ដល់ចម្លើយបែបគ្មានការទទួលខុសត្រូវ ក្នុងនាម ខ្លួនជាអ្នកដឹកនាំក្នុងស្ថាប័ននីតិប្រតិបត្តិមួយនៅក្នុងស្រុកកំរៀង ។
សូមបញ្ជាក់ថា មួយរយៈចុងក្រោយនេះ គេសង្កេតឃើញបទល្មើសរត់ពន្ធមនុស្ស និងការរត់ពន្ធទំនិញឆ្លងដែនពីកម្ពុជាទៅប្រទេសថៃដោយខុសច្បាប់ ហាក់គ្មានការថមថយសោះ។ ជាពិសេស តាមបន្ទាត់ព្រំដែន ក្នុងភូមិសាស្ត្រ ស្រុកកំរៀងនេះតែម្ដង ដែលកំពុងលេចធ្លោរជាងគេ បើទោះជាត្រូវបានកម្លាំងការពារព្រំដែន តាមបង្ក្រាបបានជាបន្តបន្ទាប់ក្ដី ។
បទល្មើសរត់ពន្ធឆ្លងដែនខុសច្បាប់ដែលពួកជនទុច្ចរិតនាំចេញជាញឹកញាប់បំផុត គឺនាំមនុស្សឆ្លងដែន និងការរត់ពន្ធបារី ។ កន្លងទៅថ្មីៗនេះ រាជរដ្ឋាភិបាលកម្ពុជាបានចេញបទបញ្ជាយ៉ាងម៉ឺងម៉ាត់បំផុតឱ្យអាជ្ញាធរគ្រប់បណ្ដាខេត្ត កងកម្លាំងប្រដាប់អាវុធគ្រប់ស្ថាប័ន ដែលឈរជើងកាពារព្រំដែនកម្ពុជា-ថៃ ត្រូវបិទឱ្យជិតឈឹងគ្រប់ច្រកល្ហកទាំងអស់ មិនអនុញ្ញាតឲ្យមានទំនិញឆ្លងដែនឡើយ ។
លើសពីនេះ ក៏ត្រូវទប់ស្កាត់មិនឲ្យមានប្រជាពលរដ្ឋខ្មែរឆ្លងដែនខុសច្បាប់ចេញទៅប្រទេសថៃ ទោះក្នុងរូបភាពណាក៏ដោយ ។ ប៉ុន្តែផ្ទុយទៅវិញ បទបញ្ជារបស់រាជរដ្ឋាភិបាល«សាបដូចទឹកទន្លេ» ។ បទល្មើសកើនឡើងទ្វេដង ។ ក្រុមឈ្មួញរត់ពន្ធទំនិញ និងរត់ពន្ធមនុស្ស កាន់តែផ្គើននឹងបទបញ្ជា រីឯផែនការទប់ស្កាត់របស់អាជ្ញាធរស្រុក ខេត្ត ហាក់បង្ហាញនូវភាពទន់ខ្សោយ មិនច្បាស់លាស់ ។ និយាយកើត តែធ្វើមិនបាន ។ ខ្វះការទទួលខុសត្រូវចំពោះការប្ដេជ្ញាចិត្តនៅក្នុងអង្គប្រជុំ ដែលលោកប្រមុខខេត្តធ្លាប់ព្រមានថា «បើបទល្មើសដដែលៗនេះ កើតឡើងនៅក្នុងភូមិសាស្ត្រស្រុកណា លោកចៅហ្វាយស្រុកនោះ ត្រូវតែទទួលខុសត្រូវចំពោះមុខថ្នាក់ដឹកនាំ ឬចំពោះមុខច្បាប់» ។
ផ្ទុយទៅវិញ ការប្ដេជ្ញាចិត្ត និងការព្រមាននេះ គ្រាន់តែជាការនិយាយបែប «ប្រជាភិថុត» តែប៉ុណ្ណោះ ខណៈបទល្មើសដដែលៗនៅតែកើតឡើងដដែលៗយ៉ាងរលូនដូចមានអ្នកបើកផ្លូវ ។ ជាពិសេស នៅស្រុកកំរៀង ដែលគេមើលឃើញគ្រប់គ្នាថា បច្ចុប្បន្ននេះ ទាំងបទល្មើសរត់ពន្ធ «មនុស្ស» ទាំងបទល្មើសរត់ពន្ធទំនិញ «បារី» ត្រូវពួកឈ្មួញទុច្ចរិតព្យាយាមនាំឆ្លងដែនយ៉ាងគគ្លើន ប៉ុន្តែសំណាងល្អ មួយចំនួនធំត្រូវកម្លាំងការពារព្រំដែនបង្ក្រាបបាន ៕
ចែករំលែកព័តមាននេះ