អណ្ដាតភ្លើងបានឆាបឆេះក្រុមហ៊ុនដឹកជញ្ជូនអីវ៉ាន់ជេខេមួយកន្លែងសន្ធោសន្ធៅ ហើយត្រូវបានសមត្ថកិច្ចនគរបាលប៉ុស្តិ៍រដ្ឋបាលសង្កាត់អូរជ្រៅ សម្រេច
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា អណ្ដាតភ្លើងបានឆាបឆេះក្រុមហ៊ុនដឹកជញ្ជូនអីវ៉ាន់ជេខេមួយកន្លែងសន្ធោសន្ធៅ ហើយត្រូវបានសមត្ថកិច្ចនគរបាលប៉ុស្តិ៍រដ្ឋបាលសង្កាត់អូរជ្រៅ សម្រេចកាត់សោរចូលពន្លត់អគ្គិភ័យទាន់ពេលវេលា ខណៈពេលម្ចាស់ផ្ទះបានចាក់សោរទៅជួបជុំបងប្អូនថ្ងៃបំណាច់ឆ្នាំ ហេតុការណ៍នេះកើតឡើងនៅវេលាម៉ោង៩និង៣០នាទីយប់ នៅថ្ងៃទី៣១ ខែធ្នូ ឆ្នាំ២០២២ នៅក្បែរសណ្ឋាគារ «ផេង ចិន្តា» ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
សេចក្តីរាយការណ៍បន្តថា ម្ចាស់ទីតាំងខាងលើមានឈ្មោះ ចន ចាន់ដារ៉ា ភេទប្រុស អាយុ៣០ឆ្នាំ ទីលំនៅបច្ចុប្បន្នភូមិក្បាលស្ពាន១ សង្កាត់អូជ្រៅ ក្រុងប៉ោយប៉ែត ខេត្ថបន្ទាយមានជ័យ ។ ហើយទីតាំងក្រុមហ៊ុនដឹកជញ្ជូនអីវ៉ាន់ជេខេ ដែលត្រូវអគ្គិភ័យបានឆេះនេះ ត្រូវបានប្រជាពលរដ្ឋរាយការណ៍ប្រាប់សមត្ថកិច្ចនគរបាលប៉ុស្តិ៍អូរជ្រៅ នៅពេលធំក្លិនឈ្ងៀម និងមានផ្សែងហ៊ុយចេញពីទីតាំងកើតហេតុ ខណៈពេលដែលផ្ទះត្រូវបានបិទទ្វារចាក់សោរជិតឈឹងតែម្តង។
លោកអនុសេនីយ៍ឯក ប៊ុន ឆាយដែន នាយប៉ុស្តិ៍នគរបាលរដ្ឋបាលសង្កាត់អូរជ្រៅ បានប្រាប់ថា ក្រោយពីទទួលព័ត៌មានថាភ្លើងឆេះនៅទីតាំងខាងលើ លោកក៏បានដឹកនាំកម្លាំងចុះដល់ទីតាំងកើតហេតុ ហើយឃើញប្រជាពលរដ្ឋនាំគ្នាយកទឹកជះនៅស័ង្គសីដែលឃើញផ្សែងហ៊ុយ បន្ទាប់មកលោកក៏បានដាក់កម្លាំងគ្រប់គ្រង និងសម្រេចកាត់សោរ ដើម្បីបាញ់ទឹកពន្លត់ ហើយភ្លើងក៏បានរលត់ជាស្ថាពរនៅវេលាម៉ោង២២និង០០នាទីយប់។
លោកនាយប៉ុស្តិ៍បានបញ្ជាក់ថា ក្រោយពេលភ្លើងរលត់នោះ ម្ចាស់ផ្ទះមកដល់ ហើយបានប្រាប់ថា គាត់បានបិទទ្វារផ្ទះនាំគ្នាទៅជួបជុំជាមួយបងប្អូននៅថ្ងៃបំណាច់ឆ្នាំ នៅភូមិសុខសាន្ត សង្កាត់និមិត្ត ក្រុងប៉ោយប៉ែត ដែលនៅចម្ងាយប្រហែល១០គីឡូម៉ែត្រ។ ហើយមូលហេតុដែលបណ្តាលឱ្យមានអគ្គិភ័យឆាបឆេះនេះ គឺដោយសារតែម្ចាស់ផ្ទះបានដុតធូបមូសនៅលើចានជ័រទុកចោលនៅលើតុ។ អគ្គិភ័យនេះត្រូវបានពន្លត់ទាន់ពេលវេលា គ្រាន់តែឆេះតែឯកសារខ្លះៗ តុ កុំព្យូទ័រអស់ចំនួន២គ្រឿង ក្រដាសកាយវិប័ត្រមួយចំនួន និងសម្ភារៈផ្សេងៗសម្រាប់បំរើសេវាកម្មទទួលបញ្ញើអីវ៉ាន់មួយចំនួនទៀតនៅទីតាំងសំយាបផ្ទះប៉ុណ្ណោះ មិនមានឆ្លងរីករាលដល់តួផ្ទះនោះទេ។
លោក វរសេនីយ៍ឯក សៅ សារឿន អធិការនគរបាលក្រុងប៉ោយប៉ែត ក៏បានណែនាំដល់កងកម្លាំងត្រូវធ្វើការប្រុងប្រយ័ត្នគ្រប់ពេលវេលា ដើម្បីអន្តរាគមន៍ជួយប្រជាពលរដ្ឋឲ្យបានទាន់ពេលវេលា ជាពិសេសនៅថ្ងៃបំណាច់ឆ្នាំដែលប្រជាពលរដ្ឋធ្វើដំណើរកំសាន្តច្រើន និងមានការអុចធូបទាន ដុតកាំជ្រួច បង្ហោះគោមជាដើម។ លោកក៏បានអំពាវនាវដល់ប្រជាពលរដ្ឋ សូមមានការប្រុងប្រយ័ត្ន ចំពោះការអុចធូបទាន និងទុកដាក់ទ្រព្យសម្បត្តិឲ្យល្អ ចៀសវាងគ្រោះថ្នាក់ហានីភ័យផ្សេងៗ និងបាត់បង់ទ្រព្យ៕
ចែករំលែកព័តមាននេះ