ទីក្រុងតេអេរ៉ង់៖ ប្រទេសអ៊ីរ៉ង់តែងតាំងមេបញ្ជាការឆ្មាំបដិវត្តថ្មីរបស់ខ្លួនជំនួសអ្នកចាស់ដែលបានស្លាប់ក្រោមស្នាដៃរបស់អ៊ីស្រាអែលកាលពីប៉ុន្មានថ្ងៃមុន។ លោកមហាម៉ាត់ បាហ្គើ ហ្សុលហ្កាដ័រ (Mohammad-Bagher Zolghadr) ជាអ្នកដាច់ខាតនិយមជើងចាស់ម្នាក់។ លោកត្រូវមកជំនួសតំណែងលោកអាលី ឡារីចានី…
ទីក្រុងតេអេរ៉ង់៖ ប្រទេសអ៊ីរ៉ង់តែងតាំងមេបញ្ជាការឆ្មាំបដិវត្តថ្មីរបស់ខ្លួនជំនួសអ្នកចាស់ដែលបានស្លាប់ក្រោមស្នាដៃរបស់អ៊ីស្រាអែលកាលពីប៉ុន្មានថ្ងៃមុន។ លោកមហាម៉ាត់ បាហ្គើ ហ្សុលហ្កាដ័រ (Mohammad-Bagher Zolghadr) ជាអ្នកដាច់ខាតនិយមជើងចាស់ម្នាក់។ លោកត្រូវមកជំនួសតំណែងលោកអាលី ឡារីចានី (Ali Larijani) ដែលត្រូវអ៊ីស្រាអែលធ្វើឃាតនៅក្នុងការវាយប្រហារតាមអាកាស។
លោកហ្សុលហ្កាដ័រត្រូវបានតែងតាំងជាប្រធានឧត្ដមក្រុមប្រឹក្សាសន្តិសុខជាតិអ៊ីរ៉ង់។ នេះបើយោងតាមការផ្សាយរបស់ទីភ្នាក់ងារព័ត៌មានអ៊ីរ៉ង់ហ្វាស (Fars)។ លោកធ្លាប់កាន់តំណែងជាមេបញ្ជាការរងឆ្មាំបដិវត្តឥស្លាម និងធ្លាប់ប្រឡូកនៅក្នុងវិស័យនយោបាយបន្ទាប់ពីក្លាយជាមន្ត្រីជាន់ខ្ពស់នៅក្រសួងមហាផ្ទៃកាលពីឆ្នាំ២០០៥។ ជំនួយការរបស់ប្រធានាធិបតីអ៊ីរ៉ង់ទទួលបន្ទុកខាងកិច្ចការទំនាក់ទំនងទូទៅក៏បានបង្ហោះសារនៅលើបណ្ដាញអ៊ិច អះអាងអំពីការតែងតាំងលោកហ្សុលហ្កាដ័រផងដែរ។
ឧត្ដមក្រុមប្រឹក្សាសន្តិសុខជាតិអ៊ីរ៉ង់ដែលពីមុននេះគ្រប់គ្រងដោយប្រធានាធិបតីអ៊ីរ៉ង់ លោកម៉ាស៊ុត ប៉េហ្សេស្គាន (Masoud Pezeshkian) ជាសេនាធិការអមរដ្ឋាភិបាលទទួលបន្ទុកផ្នែកសន្តិសុខ និងកិច្ចការបរទេស។ ស្ថាប័ននេះក៏រួមបញ្ចូលទាំងមន្ត្រីកំពូលៗផ្នែកយោធា, ផ្នែកស៊ើបការណ៍សម្ងាត់ និងផ្នែករដ្ឋាភិបាល បន្ថែមពីលើក្រុមអ្នកតំណាងរបស់មេដឹកនាំកំពូលអ៊ីរ៉ង់។ មេដឹកនាំកំពូល ឬអគ្គមគ្គុទ្ទេសក៍អ៊ីរ៉ង់ជាអ្នកមានសិទ្ធិសម្រេចកិច្ចការគ្រប់យ៉ាង។
លោកហ្សុលកាដ័រកាលពីអតីតកាលធ្លាប់ជាមេបញ្ជាការឆ្មាំបដិវត្តឥស្លាមដែលកាន់មុខតំណែងចម្រុះដូចជាតំណែងជាអនុរដ្ឋមន្ត្រី ក្រសួងមហាផ្ទៃ, ជាមេបញ្ជាការរងនៃអគ្គសេនាធិការដ្ឋានកងទ័ព និងជាទីប្រឹក្សាប្រធានផ្នែកយុត្តាធិការទទួលបន្ទុកខាងទប់ស្កាត់បទល្មើស។ លោកធ្លាប់ដឹកនាំស្នងការដ្ឋាននៃក្រុមអ្នកនយោបាយដាច់ខាតនិយមដែលមានឈ្មោះថា «រណសិរ្យប្រជាជនបដិវត្តឥស្លាម»។ ចាប់តាំងពីឆ្នាំ២០២២មក លោកកាន់តំណែងជាប្រធានក្រុមប្រឹក្សាដោះស្រាយវិវាទ (Expediency Discernment Council)។ នេះជាស្ថាប័នសម្របសម្រួលការខ្វែងគំនិតគ្នារវាងរដ្ឋសភា និងក្រុមប្រឹក្សាអ្នកឃ្លាំមើលដែលប្រមូលផ្ដុំដោយក្រុមបព្វជិតនិកាយស៊ីអាយ (Shi’ite) និងចៅក្រមដែលមានសិទ្ធិបោះឆ្នោតជំទាស់នឹងច្បាប់អ្វីមួយ និងមានសិទ្ធិរៀបចំការបោះឆ្នោត៕ ប្រភព៖ ប្រភព៖ រ៉យទ័រ (Reuters), ប៊្លូមបឺក (Bloomberg) និងប្រភពដទៃទៀត
ចែករំលែកព័តមាននេះ