មានស្ត្រីម្នាក់បានជិះម៉ូតូមួយគ្រឿងតែម្នាក់ឯង លុះមកដល់ផ្លូវស្ងាត់ ក៏ត្រូវបានជនសង្ស័យចំនួន២នាក់ធ្វើសកម្មភាពឆក់កាបូបបានសម្រេច ហើយក៏ជិះ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មានស្ត្រីម្នាក់បានជិះម៉ូតូមួយគ្រឿងតែម្នាក់ឯង លុះមកដល់ផ្លូវស្ងាត់ ក៏ត្រូវបានជនសង្ស័យចំនួន២នាក់ធ្វើសកម្មភាពឆក់កាបូបបានសម្រេច ហើយក៏ជិះរត់គេចខ្លួនបាត់ស្រមោលដោយសុវត្ថិភាព បង្កឱ្យមានការភ្ញាក់ផ្អើលកាលពីវេលាម៉ោង១២និង៤០នាទីរំលងអធ្រាត្រឈានចូលថ្ងៃទី២៨ ខែធ្នូ ឆ្នាំ២០២២ នៅត្រង់ចំណុចទល់មុខវិទ្យាស្ថានស្រាវជ្រាវព្រៃឈើ តាមបណ្ដោយផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញស្ត្រីម្នាក់ជិះម៉ូតូមួយគ្រឿងម៉ាក ZOOMER-X ពណ៌ប្រផេះ ពាក់ស្លាកលេខ ភ្នំពេញ1FY-9504 ធ្វើដំណើរតាមបណ្ដោយផ្លូវហាណូយ ទិសដៅពីត្បូងទៅជើង លុះមកដល់ចំណុចកើតហេតុ ដែលជាផ្លូវមានសភាពស្ងាត់ ក៏ស្រាប់តែលេចមុខជនសង្ស័យមានគ្នា២នាក់ ជិះម៉ូតូមួយគ្រឿងម៉ាកហុងដាឌ្រីម មិនចាំស្លាកលេខ បានជិះតាមពីក្រោយជនរងគ្រោះ រួចក៏បានធ្វើសកម្មភាពឆក់កាបូបរបស់ជនរងគ្រោះបានសម្រេចតែម្តង បណ្តាលឲ្យជនរងគ្រោះដួលម៉ូតូរងរបួសថ្លោះចង្កេះ។
ប្រភពដដែលបន្តថា ចំណែកឯជនសង្ស័យវិញ ក៏បានបន្ថែមល្បឿនជិះរត់គេចខ្លួនបាត់ស្រមោលភ្លាមៗតែម្ដងទៅ ហើយនៅក្នុងកាបូបដែលជនសង្ស័យបានឆក់យកនោះ មានទូរស័ព្ទដៃមួយគ្រឿង និងលុយមួយចំនួនផងដែរ។
ក្រោយពេលកើតហេតុ ក៏មានសាច់ញាតិរបស់ជនរងគ្រោះបានបើករថយន្តមកដឹកជនរងគ្រោះ និងជិះម៉ូតូរបស់ជនរងគ្រោះចេញទៅបាត់ ដោយមិនបានទៅដាក់ពាក្យបណ្ដឹងអ្វីនោះទេ៕
ចែករំលែកព័តមាននេះ