ខេត្តបាត់ដំបង ៖ ក្រុមចោរលួចកាត់ខ្សែភ្លើងចំនួន០៦នាក់ក្នុងចំណោមជាច្រើននាក់ ដែលបង្កអសន្តិសុខស្ទើររាល់យប់នៅក្នុងក្រុងបាត់ដំបង ហើយត្រូវកម្លាំងការិយាល័យព្រហ្មព្រហ្មទណ្ឌកំរិតស្រាលនៃស្នងការខេត្តឃាត់ខ្លួនបានជាបន្តបន្តាប់ ពេលនេះ ត្រូវបានកសាងសំណុំរឿងបញ្ជូនទៅកាន់សាលាដំបូងខេត្តហើយ នៅរសៀលថ្ងៃទី ២២ ធ្នូ នេះ ។ នេះបើតាមការផ្ដល់ព័ត៌មានពីមន្ត្រីការិយាល័យជំនាញ ។
យោងរបាយការណ៍នៃការិយាល័យព្រហ្មទណ្ឌកំរិតស្រាលបានឲ្យដឹងថា ក្រុមទីទុយដែលតែងធ្វើសកម្មភាពលួចខ្សែភ្លើងពេលយប់ទាំង០៦នាក់ ហើយពេលនេះត្រូវបានឃាត់ខ្លួននោះមាន ១-ឈ្មោះរឿម សុខ ហៅចៃ អាយុ២៤ឆ្នាំ ២-ឈ្មោះផេង លីហេង អាយុ១៧ឆ្នាំ ៣-ឈ្មោះនី មករា អាយុ២២ឆ្នាំ ៤-ឈ្នោះយ៉ា កក្កដា ហៅវែង អាយុ២៩ឆ្នាំ ៥-ឈ្មោះសាយ សុភាព អាយុ២៨ឆ្នាំ និង៦-ឈ្មោះសុខ ចិត្ត ហៅអាអេតចាយ អាយុ២៨ឆ្នាំ ។ ពួកគេទាំងអស់គ្នារស់នៅក្នុងស្ថានីយរថភ្លើង ក្នុងសង្កាត់ស្វាយប៉ោ ក្រុងបាត់ដំបង ។
លោក ឈឿង គឹមសុង នាយការិយាល័យព្រហ្មទណ្ឌកំរិតស្រាលបានប្រាប់ថា ក្រុមជនទាំង០៦នាក់នេះ ជាមុខសញ្ញាដែលតែងធ្វើសកម្មភាពលួចកាត់ខ្សែភ្លើងស្ទើររាល់យប់ គ្រប់ទីកន្លែងនៅក្នុងភូមិសាស្ត្រ ក្នុងក្រុងបាត់ដំបង ។ ក្រុមនេះ ត្រូវកម្លាំងរបស់លោកដែលល្បាតពេលយប់តាមដាន រហូតធ្វើការបង្ក្រាបបានជាបន្តបន្ទាប់ ក្នុងករណីដែលពួកគេកំពុងប្រព្រឹត្តជាក់ស្ដែងផ្សេងៗគ្នា នៅវេលារំលងអធ្រាត្រឈានចូលថ្ងៃទី២១ ធ្នូ ហើយថែមទាំងដកបាននូវត្ថុតាងមួយចំនួនផង។
សូមរំលឹកថា អំពើ «ចោរកម្ម លួចកាត់ខ្សែភ្លើង» ពេលយប់ ដែលបង្កឡើងដោយក្រុមទីទុយខាងលើនេះ បានកើតមានច្រើនឆ្នាំកន្លងមកហើយ ហើយសមត្ថកិច្ចក៏ធ្លាប់បង្ក្រាបបានជាបន្តបន្ទាប់ដែរ ប៉ុន្តែសកម្មភាពពួកនេះ គ្មានការថមថយទេ ។ ផ្ទុយទៅវិញ រឹតតែមានសន្ទុះកាន់តែខ្លាំងឡើងៗ នាប៉ុន្មានខែចុងក្រោយនេះ ដែលកើតឡើងស្ទើររាល់យប់ និងគ្រប់សង្កាត់ នៅក្នុងក្រុងបាត់ដំបង ។ រហូតបង្ខំឲ្យប្រជាពលរដ្ឋមួយចំនួនរិះរកគ្រប់មធ្យោបាយ ដើម្បីទប់ទល់ជាមួយក្រុមចោររកស៊ីយប់ដូចសត្វទីទុយនេះ។
បើតាមការកត់សម្គាល់របស់ប្រជាពលរដ្ឋដែលធ្លាប់ប្រទះឃើញសកម្មភាពក្រុមចោរកាត់ខ្សែភ្លើងនេះ បាននិយាយថា ជាទូទៅគេតែងប្រទះឃើញក្រុមចោរលួចកាត់ខ្សែភ្លើងពេលយប់ទាំងនេះ បន្លំខ្លួនធ្វើជាអ្នកជិះកង់កញ្ចាស់ៗមានដឹកកន្ត្រក ឬស្បោងដើររើសអេតចាយពេលយប់នៅតាមគំនរសំរាមដែលគេចាក់គរចោលតាមចិញ្ចើមថ្នល់ ។ សកម្មភាពក្រុមទីទុយនេះ នៅតាមគំនរកាកសំណល់ គេឃើញដៃរបស់ពួកគេច្បាមវែករកអេតចាយលើគំនរសំរាម តែភ្នែករបស់ពួកគេគឺសម្លឹងរកខ្សែភ្លើងនៅតាមបង្គោលភ្លើងសាធារណៈ ឬពីបង្គោលភ្លើងចេញទៅតាមផ្ទះពលរដ្ឋ។ ពួកគេបានប្រើកន្ត្រៃ ឬផ្លែកណ្ឌៀវតដងឲ្យវែងថ្ពក់ទាញផ្ដាច់ខ្សែភ្លើងតែម្ដង។ ក្រុមនេះលួចមិនសល់អ្វីទេ ឲ្យតែពួកគេប្រទះឃើញខ្សែភ្លើងក៏លួច មាន់ ទា ក្ងានក៏លួច។
លោកឈឿង គឹមសុង បាននិយាយថា ក្រោយពីប្រជាពលរដ្ឋចេះតែបាត់បង់ទ្រព្យសម្បត្តិមិនឈប់ឈរ ជាពិសេសរឿងបាត់ខ្សែភ្លើងនេះតែម្ដង ទើបលោកស្នងការខេត្តក៏បានចេញបញ្ជាឲ្យកម្លាំងរបស់លោក ចេញល្បាតពេលយប់ដើម្បីតាមឃ្លាំងមើលសកម្មភាពក្រុមចោរលួចកាត់ខ្សែភ្លើងនេះ រហូតឈានដល់ការបង្រាបបានចំនួន០៦នាក់ជាបន្តបន្តាប់ ព្រមទាំងដកហូតបានកង់ និងសម្ភារសម្រាប់កាត់ខ្សែភ្លើងទៀតផង ។
វត្ថុតាងដែកដកហូតរួមមាន កង់ចំនួន០២គ្រឿង កន្ត្រៃ០១ ដង្កាប់០១ កំណាត់ដែកអេតចាយ និងខ្សែភ្លើងមួយ ចំនួន។ ប៉ុន្តែលោកឈឿង គឹមសុង បានបញ្ជាក់ថា បើតាមការស្រាវជ្រាវ និងការផ្ដល់ចម្លើយពីក្រុមជនសង្ស័យ គឺ សមាសភាពក្រុមចោរលួចខ្សែភ្លើងមិនមានតែចំនួន០៦នាក់ដែលកម្លាំងរបស់លោកចាប់បាននេះទេ គឺពួកគេនៅមានគ្នាច្រើននាក់ទៀត តែពេលនេះពួកគេកំពុងសំងំលាក់ខ្លួន ។ ប៉ុន្តែយ៉ាងណា កម្លាំងរបស់លោកបាននិងកំពុង តាមរុករកក្រុមនោះបន្តទៀត ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ