ខេត្តកំពង់ឆ្នាំង ៖ សត្វស្លាបចំនួន៤ប្រភេទប្រមាណ២០០ក្បាល ត្រូវបានឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង យកទៅលែងនៅបឹងអភិរក្ស ក្នុងភូមិដំបូកកកោះ ឃុំក្រាំងដីមាស…
ខេត្តកំពង់ឆ្នាំង ៖ សត្វស្លាបចំនួន៤ប្រភេទប្រមាណ២០០ក្បាល ត្រូវបានឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង យកទៅលែងនៅបឹងអភិរក្ស ក្នុងភូមិដំបូកកកោះ ឃុំក្រាំងដីមាស ស្រុករលាប្អៀរ នាព្រឹកថ្ងៃទី២២ ធ្នូ នេះ ដែលការលែងសត្វស្លាបនេះ គឺជាលើកទី២ហើយ បន្ទាប់កាលពីថ្ងៃទី២១ ម្សិលមិញ ក៏បានលែងផងដែរ ។
ក្នុងឱកាសនោះ ឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំងបានបញ្ជាក់ថា សត្វស្លាបដែលបានយកមកលែងឲ្យមានសេរីភាព និងរស់នៅតាមតំបន់ធម្មជាតិពេលនេះ មានចំនួន៤ប្រភេទមានសត្វក្លុំ សត្វដុំដោ សត្វមាន់ទឹក និងសត្វកុក មានចំនួនប្រមាណ២០០ក្បាល ។
សត្វទាំងនេះ បានប្រទះឃើញគេដាក់លក់តាមផ្លូវជាតិលេខ៥ ម្ដុំភូមិទឹកហូត ឃុំទឹកហូត ស្រុករលាប្អៀរ ហើយដោយក្តីអាសូរដល់សត្វស្លាបទាំងនោះ និងចង់អប់រំឲ្យប្រជាពលរដ្ឋឱ្យចេះស្រឡាញ់សត្វព្រៃ ធម្មជាតិនិងស្គាល់ពីច្បាប់ស្តីពីការពារសត្វព្រៃផងនោះ ក៏ចំណាយថវិកាផ្ទាល់ខ្លួនទិញពីអ្នកលក់ហើយយកមកលែងដើម្បីឲ្យរស់នៅតាមធម្មជាតិវិញ ។
ឯកឧត្តម ព្រះរាជអាជ្ញា បានបន្តថា ការដោះលែងសត្វស្លាបទាំងនេះ ដើម្បីចូលរួមអភិរក្សសត្វស្លាប ឲ្យបានកើនឡើងក្នុងតំបន់ធម្មជាតិនៃទឹកដីខេត្តកំពង់ឆ្នាំង ដែលជាកត្តាទាក់ទាញភ្ញៀវទេសចរចូលមកទស្សនាកំសាន្តនូវវត្តមានសត្វស្លាបតាមដងទន្លេ ។
ជាមួយគ្នានេះ ឯកឧត្តម ក៏បានអំពាវនាវដល់ប្រជាពលរដ្ឋទាំងអស់កុំដាក់អន្ទាក់ចាប់សត្វព្រៃ ឬចាប់សត្វស្លាបគ្រប់ប្រភេទដែលច្បាប់ហាមឃាត់ ព្រោះសត្វស្លាបជាប្រភពដ៏មានសារសំខាន់សម្រាប់ភពដែនដីក្នុងការរក្សាលំនឹង។ វាធ្វើឱ្យយើងដឹងពីការប្រែប្រួលនូវប្រព័ន្ធអេកូឡូស៊ី និងជីវៈចម្រុះនៅក្នុងតំបន់ណាមួយ ដូច្នេះ អ្នកជំនាញងាយស្រួលមានវិធានការទប់ស្កាត់ជាមុន ។ សូមកុំកាប់បំផ្លាញព្រៃលិចទឹកដែលជាជម្រកសត្វគ្រប់ប្រភេទ និងជាបរិស្ថានធម្មជាតិ ដែលជាហេតុនាំឲ្យមានទោសទណ្ឌ និងបាត់បង់ផលប្រយោជន៍ដល់សង្គម ក៍ដូចជាគ្រួសារខ្លួនឯង ៕
ចែករំលែកព័តមាននេះ