ខេត្តបាត់ដំបង ៖ ក្រុមគ្រួសារជនរងគ្រោះ ដែលត្រូវក្រុមជនដៃដល់ព្រួតគ្នាបាញ់សម្លា.ប់យ៉ាងរន្ធ.ត់ នៅក្នុងសំណុំរឿង «ស្នេហាត្រីកោណ» កាលពី១០ថ្ងៃមុន កំពុងមានការព្រួយបារម្ភយ៉ាងខ្លាំងអំពីសុវត្ថិភាពនៅក្នុងគ្រួសារ ក្រោយពីមានជនអនាមិក ដែលគេសង្ស័យថា ជាបក្សពួកក្រុមជនដៃដល់ បានផ្ញើសារ (ឆាត) ជាបន្តបន្ទាប់គំរា.មផ្ដាច់អាយុជីវិតបន្ថែមទៀតទៅលើកូនប្រុសទី០២ និងក្មួយប្រុសម្នាក់ទៀត។ នេះបើតាមប្រភពច្បាស់ការណ៍ពីសមត្ថកិច្ច។
អ្នកស្រី អឿន ឆេន អាយុ៣៨ឆ្នាំ ជាម្ដាយជនរងគ្រោះឈ្មោះ រឿន សំរ៉ង បានរៀបរាប់អំពីរឿងនេះ ប្រាប់កោះសន្តិភាពតាមទូរស័ព្ទនៅព្រឹកថ្ងៃទី១៨ ខែធ្នូ យ៉ាងដូច្នេះថា «ក្រោយពីបាញ់សម្លា.ប់កូនប្រុសខ្ញុំ ហើយមិនទាន់បញ្ចប់ពិធីបុណ្យស្រួលបួលផង ស្រាប់តែមានជនមិនស្គាល់មុខបានផ្ញើសារតាមឆាតមកគំរា.មបាញ់សម្លា.ប់កូនប្រុសទី២ខ្ញុំ និងក្មួយប្រុសខ្ញុំម្នាក់បន្ថែមទៀត ដែលធ្វើឲ្យគ្រួសារខ្ញុំពេលនេះកំពុងមានការព្រួយបារម្ភយ៉ាងខ្លាំងពីសុវត្ថិភាពក្នុងគ្រួសារទាំងយប់ទាំងថ្ងៃ។ គ្រួសារខ្ញុំមិនហ៊ានធ្វើដំណើរទៅណាមកណាទេពេលនេះ»។
អ្នកស្រី អឿន ហេង បានប្រាប់ថា «ខ្ញុំយល់ថា ជនដែលផ្ញើសារគំរា.មបាញ់សម្លា.ប់កូនប្រុស និងក្មួយប្រុសខ្ញុំម្នាក់បន្ថែមទៀតនោះ មិនមែនជាគូរសត្រូវផ្ទាល់ឈ្មោះ តុង ដែលបាញ់សម្លា.ប់កូនខ្ញុំនោះទេ តែអាចជាបក្សពួករបស់ជនដៃដល់ឈ្មោះ តុង ហើយជននេះកំពុងរស់នៅក្នុងក្រុងបាត់ដំបងតែម្ដង»។ គាត់បញ្ជាក់ថា ជននោះបានបង្កើតអាក់ខោនហ្វេសប៊ុកក្លែងក្លាយ រួច «ឆាត» មកកូនប្រុសទី២ គាត់ឈ្មោះ រឿន លីហេង អាយុ១៥ឆ្នាំ និងឆាតទៅក្មួយប្រុសគាត់ឈ្មោះ ហុង អាយុ១៨ឆ្នាំ ជាបន្តបន្ទាប់ ដោយគំរា.មបាញ់សម្លា.ប់ពួកគេទាំង០២នាក់ទៀត។
បើយោងលើខ្លឹមសារសរសេរជាអក្សរ ដែលជនមិនស្គាល់អត្តសញ្ញាណផ្ញើតាម «ឆាត» គំរា.មសម្លា.ប់គ្រួសារជនរងគ្រោះបន្ថែមទៀតនោះ គឺជននោះបានគំរា.មបាញ់សម្លា.ប់ឈ្មោះ រឿន លីហេង (ប្អូនរបស់ជនរងគ្រោះ) និងបាញ់សម្លា.ប់ឈ្មោះ ហុង (ប្អូនជីដូនមួយជនរងគ្រោះ)។ មិនតែប៉ុណ្ណោះ ជនលាក់មុខនោះបានផ្ញើសារទៅបញ្ឍឺចិត្តម្ដាយជនរងគ្រោះថែមទៀត ដោយប្រើពាក្យថា « តើអ៊ីឃើញកូនប្រុសអ៊ីងា.ប់ចឹង អ៊ីសប្បាយចិត្តអត់?មិនបាច់គិតទេ អាកូនចឹង មិនបាច់ស្ដាយវាទេ»។ នេះជាការសម្រង់សម្ដីរបស់អ្នកស្រី អឿន ឆេន។
បើតាមអ្នកស្រី អឿន ឆេន បានបញ្ជាក់ថា ជននោះបាននិយាយបញ្ឍឺគាត់មិនអស់ចិត្ត ហើយថែមទាំងបានផ្ញើលេខទូរស័ព្ទមួយខ្សែ ទុកឲ្យអ្នកស្រីគ្រាន់ទំនាក់ទំនងជាមួយទៀតផង បើចង់ណាត់ជួបគេ។ អ្នកស្រីបានបន្ថែមថា អស់ពីឆាតទៅគំរា.មកូនប្រុស និងក្មួយប្រុសគាត់ ស្រាប់តែនៅថ្ងៃទី១២ ខែធ្នូ ជនមិនស្គាល់មុខនោះ បានឆាតមកគាត់ដោយគំរា.មផ្ដាច់ជីវិតគ្រួសារគាត់តែម្ដង។ ក្រោយពីមានសារគំរា.មបែបនេះកាន់តែខ្លាំង អ្នកស្រីក៏បានទៅដាក់ពាក្យបណ្ដឹងនៅការិយាល័យព្រហ្មទណ្ឌកំរិតធ្ងន់ នៃស្នងការខេត្ត នៅថ្ងៃទី១៥ ខែធ្នូ ដើម្បីសុំឲ្យសមត្ថកិច្ចជួយអន្តរាគមន៍ និងធ្វើការស្រាវជ្រាវស្វែងរកជនដែលគំរា.មផ្ដាច់ ជីវិតគ្រួសារគាត់នោះ។
ជុំវិញការផ្ញើសារគំរា.មសម្លា.ប់ក្រុមគ្រួសារជនរងគ្រោះពីសំណាក់ជនអនាមិក ពាក់ព័ន្ធក្នុងសំណុំរឿង «ស្នេហាត្រីកោណ» រហូតក្រុមគ្រួសារសម្រេចដាក់ពាក្យបណ្ដឹងបន្ថែមជាថ្មី សុំអន្តរាគមន៍ពីកម្លាំងការិយាល័យព្រហ្មទណ្ឌកំរិតធ្ងន់ខាងលើនេះ កោះសន្តិភាព បានព្យាយាមទំនាក់ទំនងច្រើនលើកច្រើនសារតាមទូរស័ព្ទ នៅព្រឹកថ្ងៃទី១៨ ខែធ្នូ ដើម្បីសុំការពន្យល់អំពីចំណាត់ការបែបណាពីសំណាក់លោក កោ ស៊ុនកាំង ប្រធានការិយាល័យព្រហ្មទណ្ឌកំរិតធ្ងន់នេះ តែលោកបានបិទទូរស័ព្ទមិនដំណើរការឡើយ។
ប៉ុន្តែបន្ទាប់មក លោក ពេជ្រ សារ៉ែន អធិការក្រុងបាត់ដំបង បានថ្លែងប្រាប់កោះសន្តិភាពថា គ្រួសារជនរងគ្រោះក៏បានដាក់ពាក្យបណ្ដឹងអំពីការគំរា.មកំហែងសម្លា.ប់ពីសំណាក់ជនអនាមិកនោះនៅអធិការក្រុងដែរ។ លោកបានបញ្ជាក់ថា បើយោងលើបណ្ដឹងជនរងគ្រោះ ជនគ្មានអត្តសញ្ញាណនោះ ពិតជាបាន «ឆាត» ទៅគំរា.មសម្លា.ប់បន្ថែមទៅលើគ្រួសារជនរងគ្រោះមែន។ ពេលនេះកម្លាំងរបស់លោកកំពុងធ្វើការស្រាវជ្រាវលើករណីនេះហើយ តែលោកមិនទាន់បង្ហើបឲ្យដឹងអំពីលទ្ធផលបែបណា នៃការស៊ើបអង្គេតនោះនៅឡើយទេ។
សូមបញ្ជាក់ថា ជនរងគ្រោះឈ្មោះ រឿន សំរ៉ង ភេទប្រុស អាយុ២០ឆ្នាំ រស់នៅភូមិកន្ទូត សង្កាត់ក្ដុលដូនទាវ ក្រុងបាត់ដំបង ត្រូវក្រុមខ្មាន់កាំភ្លើ.ងដែលគេស្គាល់ថា ដឹកនាំដោយជនម្នាក់ឈ្មោះ តុង បានប្រើប្រាស់អាវុធខ្លីជាច្រើនដើមបាញ់ប្រ.ហារបណ្ដាលឲ្យស្លា.ប់ និងបក្សពួក០២នាក់ទៀតរងរបួសស្រាល នៅវេលាម៉ោង៤ទៀបភ្លឺ ថ្ងៃទី០៨ ខែធ្នូ នៅលើសួនច្បារមាត់ស្ទឹងជាប់ផ្លូវលេខ១ ត្រង់ចំណុចខាងមុខធនាគារ FTB ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។
សូមបញ្ជាក់បន្តថា បន្ទាប់ពីផ្ទុះអាវុធមានស្លា.ប់ មានរបួស និងក្រោយពីធ្វើការស្រាវជ្រាវមួយប្រាវដំបូង ប្រមូលបានព័ត៌មាននេះបានប្រហែល៥០% ទាំងសមត្ថកិច្ច ទាំងមហាជន បានចាត់ទុកការប្រើប្រាស់អាវុធបាញ់សម្លា.ប់គ្នាគ្មានប្រណីនេះ គឺជា «សង្គ្រាមស្នេហា» ដែលផ្ដើមចេញពីរឿង «ស្នេហាត្រីកោណ»។
ផ្អែកលើការបំភ្លឺពីសាក្សី និងភស្ដុតាងនានា ដែលសមត្ថកិច្ចប្រមូលបានក្នុងអំឡុងពេលស៊ើបអង្កេតក្នុងសំណុំរឿង «ស្នេហាត្រីកោណ»នេះ គឺគេឃើញមានតួអង្គប្រុសចំនួន០២នាក់ បានប្រជែងគ្នាដណ្ដើមយកតួឯកស្រីម្នាក់ ដើម្បីធ្វើជាស្រីកំណាន់ គឺតួអង្គម្នាក់ឈ្មោះ រឿន សំរ៉ង និងតួអង្គមា្នក់ទៀតឈ្មោះ តុង។ បើយោងលើសាច់រឿង «ស្នេហាត្រីកោណ» ដែលភាគីជម្លោះទាំង០២នេះ បានផ្ញើសារជាសម្លេងតបតគ្នា មុនពេលផ្ទុះសង្គ្រាម គេអាចស្ដាប់យល់ថា តួស្រីដែលស្គាល់ថា ឈ្មោះ លីណា នោះគឺជាស្រីកំណាន់របស់ឈ្មោះ សំរ៉ង តែត្រូវឈ្មោះ តុង ព្យាយាមតាមទាក់ទងយកធ្វើជាស្រីកំណាន់ខ្លួនដែរ។ ប៉ុន្តែតួអង្គឈ្មោះ តុង នេះបានបដិសេធថា ខ្លួនមិនបានប៉ះពាល់នារីឈ្មោះ លីណា នោះទេ គ្រាន់តែទាក់ទងរាប់អានគ្នាធម្មតាប៉ុណ្ណោះ។
យ៉ាងណាការបកស្រាយនេះមិនត្រូវបានឈ្មោះ រ៉ង ជឿជាក់លើឈ្មោះតុងឡើយ រហូតឈ្មោះ រ៉ង ទ្រាំមិនបានក៏បបួលឈ្មោះ តុង ណាត់បា.ញ់ប្រ.ហារគ្នាបង្កក្លាយជាសង្គ្រាមដណ្ដើមស្រីផ្អើលពេញក្រុងបាត់ដំបង នៅថ្ងៃទី០៨ ខែធ្នូ នាវេលាទៀបភ្លឺតែម្ដង។ ហើយសម្ដេចក្រឡាហោម ស ខេង ហាក់អស់សំណើចនៅក្នុងរឿង «ស្នេហាត្រីកោណ»នេះដែរ។ សម្ដេចក្រឡាហោម បានសួរដេញដោលអំពីសំណុំរឿង «ស្នេហាត្រីកោណ»នេះ ក្នុងគ្រាដែលសម្ដេចអញ្ជើញជាគណៈអធិបតីក្នុងពិធីក្រុងពាលីបញ្ចុះបឋមសិលាសាងសង់វិមានឯករាជ្យ និងផ្សាររាត្រី នៅក្នុងក្រុងបាត់ដំបង កាលពីថ្ងៃទី១៥ ធ្នូ។
សម្ដេចក៏បានចាត់ទុកសំណុំរឿងនេះថា ជារឿង«ស្នេហាត្រីកោណ» ដែលមិនធ្លាប់មានសោះពីមុនមកនៅខេត្តបាត់ដំបង។ សម្ដេច ស ខេង បានសួរនាំបន្ថែមអំពីរឿងនេះទៅកាន់លោក សាត គឹមសាន ស្នងការខេត្ត ដើម្បីចង់ដឹងអំពីចំណាត់ការលើជនដៃដល់ និងនីតិវិធីបន្ត។
ឆ្លើយតបនឹងសំណួរដែលសម្ដេចចង់ដឹងអំពីចំណាត់ការ លោក សាត គឹមសាន ស្នងការខេត្ត បានបញ្ជាក់ប្រាប់សម្ដេចថា «រហូតដល់ពេលនេះ សមត្ថកិច្ចឃាត់ខ្លួនជនដៃដល់បានម្នាក់ហើយ និងកំពុងធ្វើការស្រាវជ្រាវតាមចាប់បក្សពួកបន្ថែមទៀត»។ ប៉ុន្តែលោកស្នងការ មិនបានបញ្ជាក់ថា តើក្រុមជនដៃដល់មានគ្នាប៉ុន្មាននាក់នោះទេ ? ហើយមកដល់ពេលនេះ ការស៊ើបអង្កេតបន្តទទួលបានលទ្ធផលបែបណានៅឡើយដែរ ?
ប៉ុន្តែបើតាមអធិការក្រុងបាត់ដំបង លោក ពេជ្រ សារ៉ែន បានបញ្ជាក់ប្រាប់កោះសន្តិភាព នៅព្រឹកថ្ងៃទី១៨ ខែធ្នូនេះថា ពេលនេះកម្លាំងរបស់លោកកំពុងសហការជាមួយកម្លាំងការិយាល័យជំនាញ ធ្វើការស្រាវជ្រាវរកមុខសញ្ញាជនអនាមិក ដែលបានផ្ញើសារគំរា.មសម្លា.ប់បន្ថែមលើគ្រួសារជនរងគ្រោះ ដែលគេសង្ស័យអាចជាបក្សពួកក្រុមជនដៃដល់ ដែលកំពុងសម្ងំលាក់ខ្លួននៅក្នុងក្រុងបាត់ដំបង។
យ៉ាងណាក្ដី បើតាមក្រុមគ្រួសារជនរងគ្រោះ សំណុំរឿងនេះ បាននិងកំពុងធ្វើឲ្យពួកគាត់រងាយ៉ាងខ្លាំង ដោយសារតែការគំរា.មកំហែងជាបន្តបន្ទាប់ជាថ្មីពីសំណាក់ជនអនាមិកដែលប៉ុនប៉ងផ្ដាច់អាយុជីវិតក្រុមគ្រួសារគាត់។
អ្នកស្រី អឿន ឆេន បានបញ្ជាក់ប្រាប់កោះសន្តិភាពថា អ្នកស្រី និងក្រុមគ្រួសារកំពុងមានការព្រួយបារម្ភយ៉ាងខ្លាំងពីសុវត្ថិភាពនៅក្នុងគ្រួសារ។ ពេលនេះសមាជិកគ្រួសារអ្នកស្រីទាំងអស់មិនហ៊ានធ្វើដំណើរទៅណាមកណាទេ គឺសម្ងំនៅតែក្នុងផ្ទះទាំងយប់ទាំងថ្ងៃ រីឯកូនប្រុស និង ក្មួយប្រុស ក៏មិនបានទៅរៀនសូត្រដែរ ព្រោះបារម្ភពីសុវត្ថិភាព។ អ្នកស្រីសូមអំពាវនាវដល់ថ្នាក់ដឹកនាំ និងសមត្ថកិច្ចគ្រប់ស្ថាប័ន មេត្តាជួយការពារសុវត្ថិភាពដល់ក្រុមគ្រួសារអ្នកស្រី និង ជួយស្រាវជ្រាវចាប់ខ្លួនក្រុមជនដៃដល់ឲ្យបានឆាប់ៗផង ព្រោះជនមិនស្គាល់មុខនោះនៅតែផ្ញើសារគំរា.មអាយុជីវិតកូន ក្មួយ និងក្រុមគ្រួសារជាបន្តបន្ទាប់មិនឈប់ឡើយ៕
ចែករំលែកព័តមាននេះ