ខេត្តស្ទឹងត្រែង ៖ រថយន្តសាំងយ៉ុងដឹកឈើប្រភេទលេខ២ រួមជាមួយមនុស្សម្នាក់ត្រូវបានកម្លាំងកងរាជអាវុធហត្ថ សន្តិសុខ៧២២ភ្នំក្រហមឃាត់ និងបញ្ជូនមកបញ្ជាការដ្ឋានកងរាជអាវុធហត្ថខេត្ត
ខេត្តស្ទឹងត្រែង ៖ រថយន្តសាំងយ៉ុងដឹកឈើប្រភេទលេខ២ រួមជាមួយមនុស្សម្នាក់ត្រូវបានកម្លាំងកងរាជអាវុធហត្ថ សន្តិសុខ៧២២ភ្នំក្រហមឃាត់ និងបញ្ជូនមកបញ្ជាការដ្ឋានកងរាជអាវុធហត្ថខេត្ត ក្រោយរកឃើញការដឹកជញ្ជូនផលអនុផលព្រៃឈើពុំមានលិខិតអនុញ្ញាតកាលពីវេលាម៉ោង១១និង០៥នាទី ថ្ងៃទី១៣ មិថុនា ២០១៧។ រថយន្តខាងលើត្រូវគេបញ្ជាក់បានចេញក្នុងគោលដៅពីភូមិច្រប់ ឃុំក្បាលរមាស ស្រុកសេសាន ឆ្ពោះទៅកាន់ខេត្តត្បូងឃ្មុំ។ បុរសដែលត្រូវឃាត់ខ្លួនឈ្មោះ ថាត ម៉េងឡាយ ភេទប្រុស អាយុ២២ឆ្នាំ រស់នៅភូមិទួលថ្មី ឃុំជីគ ស្រុកត្បូងឃ្មុំ ខេត្តត្បូងឃ្មុំ។ ក្រោយហេតុការណ៍ឃាត់រថយន្តដឹកឈើពុំមានលិខិតអនុញ្ញាតខាងលើ កម្លាំងកងរាជអាវុធហត្ថខេត្តបានធ្វើកំណត់ហេតុរួមប្រគល់ជូនខណ្ឌរដ្ឋបាលព្រៃឈើភ្លាមដែរ។
ជាការកាត់សម្គាល់ក្រោមបទបញ្ជាគណៈបញ្ជាការឯកភាពខេត្តឲ្យមានការទប់ស្កាត់រាល់ការកាប់រានព្រៃយកដីធ្វើកម្មសិទ្ធិដែលផ្តើមឲ្យបាត់បង់ធនធានធម្មជាតិក្នុងខេត្តជាពិសេសរាល់ការជួញដូរបទល្មើសព្រៃឈើគឺមានបទបញ្ជាឲ្យកងកម្លាំងប្រដាប់អាវុធ និងអង្គភាពពាក់ព័ន្ធធ្វើការទប់ស្កាត់ជាប្រចាំ តែទាក់ទិនសកម្មភាពចរាចណ៍នៃបទល្មើសខាងនោះសមត្ថកិច្ចក៏មិនបានគ្រប់គ្រងឲ្យមានប្រសិទ្ធភាព ដោយសារមើលឃើញថាប្រជាពលរដ្ឋមួយចំនួនរកដើម្បីដោះដូរជីវភាពគ្រួសាប៉ុណ្ណោះ។
ទាក់ទិនករណីខាងលើនេះលោក សុខ សេដា មន្ត្រីខណ្ឌរដ្ឋបាលព្រៃឈើស្ទឹងត្រែង បានបញ្ជាក់ថា ឈើដែលទទួលពីបញ្ជាការដ្ឋានកងរាជអាវុធហត្ថមានចំនួន៤០៥សន្លឹក ស្មើ៤,៨៦០ម៉ែត្រគូបត្រីគុណ ជាប្រភេទឈើលេខ២(ខ្វាវ)។ លោកបន្តថា វត្ថុតាងទាំងនោះត្រូវបានរក្សាទុកនៅខណ្ឌរដ្ឋបាលព្រៃឈើខេត្តរួមរថយន្តសាំងយ៉ុងមួយគ្រឿងផងដែរ។ បច្ចុប្បន្នតៃកុងរថយន្តត្រូវបានធ្វើកំណត់ហេតុពាក់ព័ន្ធការដឹកជញ្ជូនផលអនុផលព្រៃឈើគ្មានលិខិតអនុញ្ញាតតាមច្បាប់ស្តីពីព្រៃឈើ៕
ចែករំលែកព័តមាននេះ