ខេត្តកណ្តាល ៖ លោក ជា សុខហៀង ចៅក្រមស៊ើបសួរសាលាដំបូងខេត្តកណ្តាល នៅល្ងាចថ្ងៃទី១៤ ខែធ្នូ ឆ្នាំ២០២២ បានសម្រេចចេញដីកាឃុំខ្លួនចោរម្នាក់ប្រើល្បិចទៅពិនិត្យសុខភាព…
ខេត្តកណ្តាល ៖ លោក ជា សុខហៀង ចៅក្រមស៊ើបសួរសាលាដំបូងខេត្តកណ្តាល នៅល្ងាចថ្ងៃទី១៤ ខែធ្នូ ឆ្នាំ២០២២ បានសម្រេចចេញដីកាឃុំខ្លួនចោរម្នាក់ប្រើល្បិចទៅពិនិត្យសុខភាព បែរទៅលួចកាបូប និងសម្ភារមានតម្លៃ ដាក់ពន្ធនាគារបណ្តោះអាសន្នពីបទ «លួចមានស្ថានទម្ងន់ទោសដោយប្រព្រឹត្តអំពើហិង្សា និងប្រើប្រាស់ដោយខុសច្បាប់នូវសារធាតុញៀន»តាមមាត្រា៣៥៣,៣៥៧នៃក្រមព្រហ្មទណ្ឌ និងមាត្រា៤៥ច្បាប់ស្តីពីការត្រួតពិនិត្យគ្រឿងញឿន ដែលប្រព្រឹត្តនៅថ្ងៃទី១៣ ខែធ្នូ ឆ្នាំ២០២២ វេលាម៉ោង១៧និង១៥នាទី នៅចំណុចភូមិពន់ចាន ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល ។
ជនរងគ្រោះទាំង០២នាក់ ទី១-ឈ្មោះ ហេង វាសនា ភេទស្រី អាយុ៣០ឆ្នាំ មានទីលំនៅភូមិពន់ចាន ឃុំព្រែកស្លែង ស្រុក កណ្ដាលស្ទឹង ខេត្តកណ្ដាល ជាគ្រូពេទ្យ ទី២-ឈ្មោះ ហង់ កែវកណ្ណិកា ភេទស្រី អាយុ៣៤ឆ្នាំ មានទីលំនៅភូមិ ស្វាយមីង ឃុំបារគូ ស្រុកកណ្ដាលស្ទឹង ខេត្តកណ្ដាល មុខរបរជាគ្រូពេទ្យ ។ ដោយឡែក ជនត្រូវចោទទី១-ឈ្មោះ ពៅ សុភ័ក្ត្រ ភេទប្រុស អាយុ២៥ឆ្នាំ មានទីលំនៅភូមិ ថ្នល់ទស្សិណ ឃុំ ក្រាំងធ្នង់ ស្រុកបាទី ខេត្តតាកែវ មុខរបរ មិនពិតប្រាក ។
បើតាមរបាយការណ៍របស់សមត្ថកិច្ចបានអោយដឹងថា នៅថ្ងៃទី១៣ ខែធ្នូ ឆ្នាំ២០២២ ជនសង្ស័យខាងបានធ្វើសកម្មភាពនៅក្នុងស្រុកកណ្ដាល ស្ទឹង០២លើ៖ ទី១-នៅចំណុចភូមិ ស្វាយមីង ឃុំបារគូ នៅថ្ងៃទី ១៣ ខែធ្នូ ឆ្នាំ២០២២ វេលាម៉ោង០៦និង៥១នាទី ជនសង្ស័យបានជិះម៉ូតូមួយគ្រឿងខាងលើ ចេញពីផ្ទះរបស់ខ្លួន មកម្តុំផ្សារកំពង់កន្ទួត រួចបានចូលពេទ្យឯកជនមួយកន្លែងយីហោ «បន្ទប់ពិព្រោះជម្ងឺ និងព្យាបាល សាន សុវណ្ណ» ពេលចូលទៅដល់ជនសង្ស័យ បានអោយជនរងគ្រោះពិនិត្យជំងឺរបស់ខ្លួន ពេលពិនិត្យរួចជនរងគ្រោះបានប្រាប់ថា អូនឯងលើសឈាមហើយ ។
ពេលនោះ ជនសង្ស័យបានប្រាប់ថា អត់អីទេក៏ចេញទៅបាត់ទៅ មួយសន្ទុះក្រោយមក ជនសង្ស័យបានជិះម៉ូតូត្រឡប់មកផ្ទះជនរងគ្រោះម្តងទៀតបាន ហើយបានធ្វើសកម្មភាពលួចយកកាបូបរបស់ជនរងគ្រោះ រួចជិះម៉ូតូរបស់ត្រឡប់មកផ្ទះវិញ ពេលជិះម៉ូតូមកតាមផ្លូវដល់ចំណុចតាមខ្នងប្រឡាយស្ថិតនៅភូមិឃ្លាំងសម្បត្តិ ឃុំពត់ស ស្រុកបាទី ខេត្តតាកែវ ជនសង្ស័យបានឈប់ម៉ូតូឆែកមើលកាបូបលុយរបស់ជនរងគ្រោះពុំឃើញមានលុយ មានតែឯកសារខាងលើក៏បោះកាបូបនោះចោលក្នុងព្រៃបាត់ទៅ រួចជិះម៉ូតូទៅដេកនៅផ្ទះរបស់ខ្លួនស្ថិតនៅក្នុងភូមិ ឃ្លាំងសម្បត្តិ ឃុំពត់ស ស្រុកបាទីខេត្តតាកែវ ។
លើកទី០២ នៅចំណុចភូមិឃុំកើតហេតុខាងលើ លុះដល់ម៉ោង១៦និង០០នាទីជនសង្ស័យបានជិះម៉ូតូចេញពីផ្ទះអ៊ុំរបស់ខ្លួនខាងលើ ដោយជិះមកតាមផ្លូវជាតិលេខ២ លុះដល់ចំណុចកើតហេតុខាងលើ ជនសង្ស័យបានជិះម៉ូតូចូលពេទ្យឯកជនមួយកន្លែងទៀតយីហោ «បន្ទប់ពិគ្រោះ និង ថែទាំជំងីទូទៅ ហេង វាសនា» ស្ថិតនៅភូមិឃុំកើតហេតុ។ ពេលចូលទៅដល់ក្នុងពេទ្យ ជនសង្ស័យបានប្រាប់ជនរងគ្រោះថា ខ្លួនចង់វាស់ឈាម ពេលនោះជនរងគ្រោះបានអោយ ជនសង្ស័យអង្គុយលើកៅអី រួចជនរងគ្រោះពិនិត្យឈាមអោយជនសង្ស័យចំនួនពីរដង ពេលពិនិត្យឈាមរួចជនសង្ស័យបានសួរជនរងគ្រោះរកទិញទឹកដោះគោកូនក្មេង និងទិញ ចានដែកងូតទឹកកូនក្មេង ។
ពេលជនរងគ្រោះឈោងយកចានដែកងូតទឹកកូនក្មេងនៅលើធ្នើរ ពេលនោះជនសង្ស័យបានស្ទុះទៅក្រៀក.ក និង យកដៃខ្ទប់មាត់ច្របាច់.កជនរងគ្រោះ បោកផ្តួលទៅនឹងដី បំណងចង់លួចយកលុយ ទូរស័ព្ទ និងសម្ភារផ្សេងៗ តែជនរងគ្រោះប្រឹងរើបំរះខាំដៃរបស់ជនសង្ស័យជាប់ ។ ពេលនោះ ជនសង្ស័យបានព្យាយាមរត់សំដៅទៅម៉ូតូ ដើម្បីជិះរត់គេចខ្លួនតែត្រូវបានជនរងគ្រោះ និងអ្នកជិតខាងបានជួយចាប់ជនសង្ស័យ ហើយរាយការណ៍ទៅសមត្ថកិច្ចប៉ុស្តិ៍នគរបាលរដ្ឋបាលព្រែកស្លែង ពេលទទួលបានពត៌មានភ្លាម កម្លាំងប៉ុស្តិ៍នគរបាលរដ្ឋបាលព្រែកស្លែងបានទៅដល់កន្លែងកើតហេតុឃាត់ខ្លួនជនសង្ស័យបញ្ជូនមកកាន់អធិការដ្ឋាននគរបាលស្រុកកណ្ដាលស្ទឹង ដើម្បីកសាងសំណុំរឿងតាមនីតិវិធីច្បាប់ ។
ចែករំលែកព័តមាននេះ