រាជធានីភ្នំពេញ ៖ យោងតាមការអះអាងរបស់មន្ត្រីពាក់ព័ន្ធកីឡាបាល់បោះដែលហាក់មិនសូវមានគេចាប់អារម្មណ៍ខ្លាំងក្លាដូចកីឡាតេក្វាន់ដូ បាល់ទាត់ និងប្រដាល់ កីឡាបាល់បោះ ក៏មានការរីកចម្រើនណាស់ដែរ ដោយមាន
រាជធានីភ្នំពេញ ៖ យោងតាមការអះអាងរបស់មន្ត្រីពាក់ព័ន្ធកីឡាបាល់បោះដែលហាក់មិនសូវមានគេចាប់អារម្មណ៍ខ្លាំងក្លាដូចកីឡាតេក្វាន់ដូ បាល់ទាត់ និងប្រដាល់ កីឡាបាល់បោះ ក៏មានការរីកចម្រើនណាស់ដែរ ដោយមានការបញ្ជូនកីឡាករចេញទៅប្រកួតនៅក្រៅប្រទេស និងមានការប្រកួតក្នុងស្រុកយ៉ាងសកម្មផងដែរ។
យ៉ាងណាក៏ដោយ មន្ត្រីទទួលបន្ទុកបានទទួលស្គាល់ថា កីឡាបាល់បោះមិនទាន់មានឱកាសទទួលបានមេដាយមាសជាអន្តរជាតិនៅឡើយទេ ទើបកីឡាប្រភេទនេះហាក់មិនសូវមានការចាប់អារម្មណ៍បើទោះជាមានការឈានឡើងក្តី ។
លោក វ៉ាត់ ចំរើន អគ្គលេខាធិការគណៈ កម្មាធិការជាតិអូឡាំពិកកម្ពុជា បានអះអាងថា មកទល់ពេលនេះសហព័ន្ធកីឡាបាល់បោះមានការឈានឡើងជាងមុន ថ្វីដ្បិតសកម្មភាពប្រកួតនៅខាងក្រៅសហព័ន្ធត្រូវអ្នកខ្លះថាស្ងប់ស្ងាត់ជាងមុនក្ដី ។ លោកថា មហាជនទូទៅដែលធ្លាប់និយមលេងបាល់បោះ បានងាកទៅលេងបាល់ទាត់ និងបាល់ទះ ដោយសារតែគេមានការបង្កើតតារាងច្រើនជាងមុន ប៉ុន្តែសម្រាប់សកម្មភាពប្រកួតថ្នាក់ជាតិ និងក្រោមការចាត់ចែងរបស់សហព័ន្ធគឺមានការឈានឡើង។
លោកនិយាយថា នៅតាមសាលារៀននៅតែមានសកម្មភាពលេងកីឡានេះនៅឡើយទេ ដោយខាងក្រសួងអប់រំក៏បានបំផុសជ្រើសរើសកីឡាករប្រចាំថ្នាក់មធ្យមសិក្សា និងប្រចាំកម្រិតវិទ្យាល័យឱ្យប្រកួតគ្នាជាលក្ខណៈទូទាំងរាជធានី និងទូទាំងខេត្តជារៀងរាល់ឆ្នាំមិនដែលខកខាន ឡើយ ។ ជាក់ស្ដែង នៅពាក់កណ្ដាលខែមិថុនានេះ ការប្រកួតក្នុងក្របខ័ណ្ឌវិទ្យាល័យទូទាំងប្រទេសនឹងត្រូវធ្វើឡើង ដោយមានកីឡាករមកពីបណ្ដាខេត្តក្រុងមិនតិចជាងរយនាក់ចូលរួម ។
លោកថា ការប្រកួតជារៀងរាល់ឆ្នាំតែងជម្រើសបានជើងខ្លាំងល្អៗឱ្យចេញទៅប្រកួតនៅក្រៅប្រទេស ជាពិសេសគឺក្នុងព្រឹត្តិការណ៍ស៊ីហ្គេមរៀងរាល់ពេលប្រកួត ។ លោកថា កីឡាករផ្នែកនេះមានឱកាសចេញប្រកួតមិត្តភាពនៅតាមបណ្ដាប្រទេសមួយចំនួននៅអាស៊ីអាគ្នេយ៍ច្រើន ដោយការប្រកួតម្ដងៗមានឈ្នះមានចាញ់ ហើយក៏ឧស្សាហ៍បានពានត្រឡប់មកវិញដែរ។ ប៉ុន្តែលោកថា អាចបណ្ដាលមកពីកីឡាករផ្នែកនេះមិនទាន់លេចធ្លោខ្លាំងទើបកីឡាបាល់បោះមានការឈានឡើងតែមហាជនភាគច្រើនមិនសូវចាប់អារម្មណ៍ បើធៀបនឹងកីឡាផ្សេងទៀតជាពិសេសគឺបាល់ទះ និងបាល់ទាត់ ។ លោកថា បាល់បោះជាប្រភេទកីឡាដែលមានការឈានឡើងក្នុងកម្រិតមួយនៅឡើយ ដូច្នេះខាងសហព័ន្ធត្រូវបង្កើនការផ្សព្វផ្សាយ និងបំផុសឱ្យបានច្រើនឡើងថែមទៀត ទើបមានការចាប់អារម្មណ៍ ។
លោកទទួលស្គាល់ថា ធៀបនឹងប៉ុន្មានឆ្នាំមុន អ្នកចូលចិត្តកីឡាបាល់បោះថយចុះទើបសភាពផុលផុសរបស់កីឡាមួយនេះមិនសូវគេមើលឃើញបើធៀបនឹងកីឡាបាល់ទាត់ និងបាល់ទះ ដែលយុវវ័យខាងក្រៅចូលចិត្តជុំគ្នាលេងភាគច្រើន ។ លោកថា នៅតាមវិទ្យាល័យ និងសាលាចំណេះទូទៅ នៅតែមានការបំផុសឱ្យលេងកីឡានេះជាប្រចាំ ដើម្បីស្វែងរកកីឡាករដែលមានសមត្ថភាពតំណាងឱ្យសាលាហ្វឹកហាត់ត្រៀមប្រកួតប្រចាំរាជធានី និងថ្នាក់ជាតិ ។ លោកនិយាយថា ដោយសារតែក្នុងមួយឆ្នាំយើងមានការប្រកួតបាល់បោះប្រចាំថ្នាក់មធ្យមនៅទូទាំងរាជធានីផង ប្រចាំវិទ្យាល័យនៅទូទាំងប្រទេសផង និងប្រកួតកីឡាមហាជនជម្រើសជើងឯករៀងរាល់ខែមិថុនាទៀត អ៊ីចឹងក្នុងមួយឆ្នាំកីឡាបាល់បោះប្រកួតជម្រើសជើងឯក៣ដង ធ្វើឱ្យកីឡាមួយនេះមានការឈានឡើងល្អជាងមុន ។ លោកថា អ្នកលេងកីឡាបាល់បោះនៅកម្ពុជា មិនខ្វះអ្នកមានបច្ចេកទេសល្អនោះទេ ប៉ុន្តែអាចមកពីកីឡាករទាំងនោះនៅមានកម្ពស់មិនខ្ពស់ល្អដូចបរទេស ទើបរាល់ការប្រកួតជាមួយកីឡាករបរទេសម្ដងៗទទួលបានផ្លែផ្កាមានកម្រិត ។ លោកថា កីឡាបាល់បោះមានការឈានឡើងឆ្ងាយណាស់បើធៀបនឹងរយៈពេលមុន ប៉ុន្តែវាអាចមកពីការនិយមលេងបាល់ទាត់ និងកីឡាផ្សេងៗមានសន្ទុះច្រើនជាង ទើបមនុស្សមួយចំនួនយល់ថា អ្នកលេងបាល់បោះថយចុះ និងថាកីឡាមួយនេះមិនមានសកម្មភាព ។
លោកថា សកម្មភាពមិនស្ថិតក្នុងការនិយមលេងកម្សាន្តរបស់មហាជននោះទេ ពោលគឺស្ថិតក្នុងការប្រកួតប្រជែងដែលរៀបចំដោយសហព័ន្ធ ដោយគណៈកម្មាធិការជាតិអូឡាំពិកកម្ពុជា និងការប្រកួតមិត្តភាព ឬការប្រកួតលក្ខណៈអន្តរជាតិជាដើមដែលមានកីឡាករជម្រើសជាតិតំណាងចេញទៅប្រកួត ។ លោកមានការរំពឹងថា មិនយូរមិនឆាប់កីឡាបាល់បោះនឹងដណ្ដើមបានភាពលេចធ្លោលើឆាកអន្តរជាតិ ដោយសារតែកីឡាករដែលបណ្ដុះបណ្ដាលគឺសុទ្ធតែមានសមត្ថភាព និងមានកាយសម្បទាអំណោយផល បើទោះជាកីឡាករខ្មែររាងនៅចាញ់មាឌ និងកម្ពស់កីឡាករបរទេសសម្រាប់វិស័យកីឡាមួយនេះបន្តិចក្ដី ។
លោក ស៊ាន បូរ៉ាត ប្រធានសហព័ន្ធកីឡាបាល់បោះកម្ពុជា បានអះអាងថា មិនត្រឹមតែបង្កើនសមត្ថភាពកីឡាករប៉ុណ្ណោះទេ សម្រាប់គ្រូបង្វឹក និងគណៈកម្មការផ្ដល់ពិន្ទុក៏មានការយកចិត្តទុកដាក់បណ្ដុះបណ្ដាលច្រើនណាស់ដែរនាពេលចុងក្រោយ ដោយលោកយល់ថា កីឡាបាល់បោះមានការឈានឡើងជាងមុន ។
ក្នុងនោះសកម្មភាពចូលរួមប្រកួតប្រជែងពីសំណាក់កីឡាករសម្រាប់ការប្រកួតកម្រិតរាជធានី និងកម្រិតជាតិម្ដងៗ ក៏មានយុវវ័យច្រើនឡើងចូលប្រកួតផងដែរ ដែលមានន័យថា កីឡាមួយនេះមានការចាប់អារម្មណ៍។ យ៉ាងណាមិញ លោកទទួលស្គាល់សកម្មភាពផ្សព្វផ្សាយអាចនៅមានកម្រិត ស្របគ្នាដែលកីឡាករដែលបានតំណាងឱ្យជាតិក្នុងការចេញប្រកួតថ្នាក់ជាតិ និងលើឆាកអន្តរជាតិមិនទទួលបានមេដាយលេចធ្លោដូចគ្នានឹងកីឡាតេក្វាន់ដូ ឬកីឡាប៉េតង់ផង ទើបអ្នកខ្លះមិនសូវចាប់អារម្មណ៍ជាមួយកីឡាបាល់បោះ ហើយយល់ថា កីឡាមួយនេះថយចុះសកម្មភាព ដែលតាមធាតុពិតគឺមួយឆ្នាំសហព័ន្ធបានរៀបចំការប្រកួតដល់ទៅ៣ដងឯណោះ ដោយការប្រកួតជ្រើសរើសជើងឯកថ្នាក់ជាតិនឹងត្រូវធ្វើឡើងនៅខែមិថុនានេះឯង ។ លោកថា សហព័ន្ធកីឡាបាល់បោះបានបណ្ដុះធនធាននិងត្រៀមរួចហើយសម្រាប់កីឡាស៊ីហ្គេមលើកទី៣២ ក្នុងឆ្នាំ២០២៣ដែលកម្ពុជាធ្វើជាម្ចាស់ផ្ទះខាងមុខ ៕
ចែករំលែកព័តមាននេះ