ADផ្ទាំងផ្សព្វផ្សាយពាណិជ្ជកម្ម

Picture
  • ភ្នំពេញ

ភ្នំពេញ​៖ រាជរដ្ឋាភិបាល ​តាម​រយៈ​ក្រសួងមហាផ្ទៃ​កំពុង​តាក់តែង​ច្បាប់​ស្ដី​ពី ចរាចរណ៍​ផ្លូវគោក​ថ្មី​។​ច្បាប់​ថ្មី​នេះ​នឹង​កំណត់​ឱ្យ​អ្នកបើកបរ​ទាំងអស់​ជាប់​កាតព្វកិច្ច​មួយ​ចំនួន ដើម្បី​ធានា​សុវត្ថិភាព​ចរាចរណ៍​។ ក្នុង​នោះ​មាន​ដូច​ជា ការ​តម្រូវ​ឱ្យ​មាន​វិញ្ញាបនបត្រ​បញ្ជាក់​សុខភាព​ថា គ្មាន​សារធាតុ​ញៀ​.​ន​ក្នុង​ខ្លួន សម្រាប់​អ្នក​ដែល​ចង់​ចូល​ធ្វើ​ការងារ​ជា​អ្នក​បើករថយន្ត​មិន​ថា រថយន្ត​ដឹក​អ្នកដំណើរ…

ភ្នំពេញ​៖ រាជរដ្ឋាភិបាល ​តាម​រយៈ​ក្រសួងមហាផ្ទៃ​កំពុង​តាក់តែង​ច្បាប់​ស្ដី​ពី ចរាចរណ៍​ផ្លូវគោក​ថ្មី​។​ច្បាប់​ថ្មី​នេះ​នឹង​កំណត់​ឱ្យ​អ្នកបើកបរ​ទាំងអស់​ជាប់​កាតព្វកិច្ច​មួយ​ចំនួន ដើម្បី​ធានា​សុវត្ថិភាព​ចរាចរណ៍​។ ក្នុង​នោះ​មាន​ដូច​ជា ការ​តម្រូវ​ឱ្យ​មាន​វិញ្ញាបនបត្រ​បញ្ជាក់​សុខភាព​ថា គ្មាន​សារធាតុ​ញៀ​.​ន​ក្នុង​ខ្លួន សម្រាប់​អ្នក​ដែល​ចង់​ចូល​ធ្វើ​ការងារ​ជា​អ្នក​បើករថយន្ត​មិន​ថា រថយន្ត​ដឹក​អ្នកដំណើរ និង​រថយន្ត​ដឹក​ទំនិញ​នោះ​ទេ​។

Picture

ការ​ប្រកាស​ដូច្នេះ ត្រូវ​បាន​សម្តេច ឧបនាយករដ្ឋមន្ត្រី ស ខេ​ង រដ្ឋមន្ត្រី​ក្រសួងមហាផ្ទៃ​បាន​លើក​ឡើង​ក្នុង​ទិវា​អន្តរជាតិ​រំលឹក​ដល់​ជន​រង​គ្រោះ​ដោយ​គ្រោះថ្នាក់​ចរាចរណ៍​ផ្លូវគោក​លើក​ទី​១៧ ដែល​ប្រារព្ធ​នៅ​សួនច្បារ​មុខ​វត្ត​បុ​ទម​វ​តី រាជធានី​ភ្នំពេញ កាលពី​ព្រឹក​ថ្ងៃ​ទី​៧ ខែធ្នូ ឆ្នាំ​២០២២​។

សម្តេច​ក្រឡាហោម ស ខេ​ង បញ្ជាក់​ថា ការ​ដាក់​កាតព្វកិច្ច​បែប​នេះ​នឹង​ធ្វើ​ឱ្យ​អ្នក​ស្វែងរក​ការងារ​ធ្វើ​ក្នុង​វិស័យ​ដឹក​ជញ្ជូន និង​ការងារ​ពាក់ព័ន្ធ​នឹង​ការ​បើកបរ ប្រឈម​មុខ​នឹង​ភាព​គ្មាន​ការងារ​ធ្វើ ប្រសិនបើ​ពួក​គេ​មាន​សារធាតុ​ញៀ​.​ន​។ម្យ៉ាងទៀត ក៏​ដើម្បី​ទប់ស្កាត់​គ្រោះថ្នាក់​ចរាចរណ៍​ដែល​បង្ក​ឡើង​ដោយ​អ្នកបើកបរ​រថយន្ត​ធំ​ៗ​ដែល​កន្លង​មក​ត្រូវ​បាន​រក​ឃើញ​មាន​មួយ​ចំនួន​ប្រើប្រាស់​សារធាតុ​ញៀ​.​ន​។

របាយការណ៍ បង្ហាញ​ថា ក្នុង​រយៈពេល​៩​ខែ​ក្នុង​ឆ្នាំ​២០២២ គិត​ពី​ខែមករា ដល់​ខែកញ្ញា​គ្រោះថ្នាក់​ចរាចរណ៍​ផ្លូវគោក​នៅ​ទូ​ទាំង​ប្រទេស​បាន​កើតឡើង​ចំនួន ២២៨៦​លើក បណ្តាល​ឱ្យ​មាន​អ្នក​ស្លា​.​ប់​១៣៤២​នាក់ របួស​៣១៧៣​នាក់ ( របួសធ្ងន់​២០០៤​នាក់ របួសស្រាល​១១៦៩​នាក់​)​។ ក្នុង​ចំណោម​អ្នក​ស្លា​.​ប់ និង​របួស​នោះ គឺ​មាន​អ្នក​មិន​ពាក់មួក​សុវត្ថិភាព​ពេល​មាន​គ្រោះថ្នាក់​ចំនួន​២៣៩១​នាក់​។

Picture
រូបតំណាង

មូលហេតុ​ដែល​បង្ក​ឱ្យ​មាន​គ្រោះថ្នាក់​ក្នុង​រយៈពេល​៩​ខែ​ក្នុង​ឆ្នាំ​២០២២​នេះ រួម​មាន ៖ ល្បឿន​៣៨,៧% មិន​គោរព​សិទ្ធិ​អាទិភាព​២៤,២% មិន​ប្រកាន់​ស្តាំ ១០,៨% ជែង​ក្នុង​ស្ថានភាព​គ្រោះថ្នាក់​៩,៨% បត់​ក្នុង​ស្ថានភាព​គ្រោះថ្នាក់​៩% ស្រវឹង​៤% កត្តា​យាន ២% កត្តា​ផ្លូវ ០,២% មិន​គោរព​ភ្លើង​សញ្ញា​០,២% ងងុយ ១% និង​អាកាសធាតុ​០,១%​។

ទិន្នន័យ​គ្រោះថ្នាក់​ចរាចរណ៍​រយៈពេល​៩​ខែ​កន្លង​មកនេះ បង្ហាញ​ថា ក្នុង​១​ថ្ងៃ នៅ​ទូ​ទាំង​ប្រទេស​កម្ពុជា​យើង​មាន​អ្នក​ស្លា​.​ប់​ជា​មធ្យម​៥​នាក់ និង​របួស​ជាង ១០​នាក់ ដោយសារ​តែ​គ្រោះថ្នាក់​ចរាចរណ៍​។

ចំពោះ​មុខ​គ្រោះថ្នាក់​ចរាចរណ៍​ដែល​បាន​ស​ម្លា​.​ប់​ជីវិត​ពលរដ្ឋ​ខ្មែរ​យើង និង​បង្ក​របួស រួម​ទាំង​ការ​ខូចខាត ទ្រព្យ សម្បត្តិ​រៀងរាល់ថ្ងៃ​នេះ​ត្រូវ​បាន​អ្នកជំនាញ ប្រកាស​អំពាវនាវ​ដល់​ប្រជាពលរដ្ឋ​ឱ្យ​ចូលរួម​គោរព​ច្បាប់​ចរាចរណ៍​ផ្លូវគោក​ឱ្យ​បាន​ខ្ជាប់ខ្ជួន​បន្ថែម​ទៀត ដើម្បី​ការពារ​អាយុជីវិត​ខ្លួនឯង និង​អាយុជីវិត​អ្នក​ដទៃ​។

Picture
រូបតំណាង

ជា​ការ​ពិត​គ្រោះថ្នាក់​ចរាចរណ៍​នៅ​តែ​បន្ត​កើត​មាន​ឡើង និង​បាន​បន្ថែម​នូវ​បន្ទុក​ដល់​សង្គម​ជាតិ​។​ហេតុនេះ គណៈកម្មាធិការ​ជាតិ​សុវត្ថិភាព​ចរាចរណ៍​ផ្លូវគោក បាន​ប្រកាស​តាំងពី​ឆ្នាំ​២០២០ រហូត​ដល់​បច្ចុប្បន្ន ដោយ​ប្រកាន់​យក​វិធានការ​រឹត​បន្តឹង​នូវ​ការ​អនុវត្ត​ច្បាប់​ស្ដី​ពី​ចរាចរណ៍​ផ្លូវគោក​ជា​អាទិភាព​ក្នុង​ការ​ទប់ស្កាត់ និង​កាត់​បន្ថយ​កំណើន​គ្រោះថ្នាក់​ចរាចរណ៍​ផ្លូវគោក​។

ក្នុង​នោះ គណៈកម្មាធិការ​ជាតិ​បាន​សម្រេច​ធ្វើ​វិសោធនកម្ម​អនុក្រឹត្យ​ស្តី​ពី​ការ​ពិន័យ​អន្តរការណ៍ ចំពោះ​អំពើ​ល្មើស​នឹង​ច្បាប់​ស្តី​ពី​ចរាចរណ៍​ផ្លូវគោក ហើយ​បាន​បង្កើន​ប្រសិទ្ធភាព​នៃ​ការ​រឹត​បន្តឹង​អនុវត្ត​ច្បាប់​។ ពោល គឺ​បង្កើន​ចំនួន​ប្រាក់​ផាកពិន័យ​លើ​អ្នក​ល្មើសច្បាប់​ចរាចរណ៍​ដូច​ជា ពី​មុន​អ្នកបើកបរ​ម៉ូតូ​ដែល​ល្មើសច្បាប់​ដោយ​បើកបរ​មិន​មាន​មួក​សុវត្ថិភាព​ត្រូវ​បាន​ផាកពិន័យ​ត្រឹមតែ​៥​ពាន់​រៀល​ប៉ុណ្ណោះ តែ​នៅ​ក្នុង​ច្បាប់​ចរាចរណ៍​ថ្មី​បាន​បង្កើន​រហូត​ដល់​៦០០០០​រៀល ចំពោះ​អ្នកបើកបរ និង​អ្នក​រួម​ដំណើរ​តាម​ម៉ូតូ ដែល​មិន​មាន​មួក​សុវត្ថិភាព ម៉ូតូ​មិន​មាន​កញ្ចក់​មើល​ក្រោយ​ជាដើម​។​រីឯ​អ្នកបើកបរ និង​អ្នក​ធ្វើ​ដំណើរ​តាម​រថយន្ត ដែល​មិន​ពាក់​ខ្សែ​ក្រ​វ៉ា​ត់​សុវត្ថិភាព ក៏​ត្រូវ​បាន​បង្កើន​ការ​ផាកពិន័យ​ដល់​៨​ម៉ឺន​រៀល​ផង​ដែរ​។

ប៉ុន្តែ​ការ​បង្កើន​ចំនួន​ប្រាក់​ផាកពិន័យ​កាន់តែ​ច្រើន​នេះ​ហាក់ដូចជា មិន​បាន​ធ្វើ​ឱ្យ​ជនល្មើស​ច្បាប់​ចរាចរណ៍​រាងចាល​នោះ​ទេ​។​ច្បាប់​កំណត់​ផាក​ច្រើន​ៗ​ដូច្នេះ​មែន​។​តែ​ជាក់ស្តែង​មាន​ប៉ូលិស​ចរាចរណ៍​មួយ​ចំនួន​មិន​បាន​អនុវត្ត​ច្បាប់​ឱ្យ​បាន​ត្រឹមត្រូវ​ឡើយ​។​ពោល គឺ​បើ​អ្នក​ជិះ​ម៉ូតូ​ខុសច្បាប់​ដែល​កំណត់​ផាក​តិច​បំផុត​៦​ម៉ឺន​រៀល​នោះ​ព្រម​សម្រួល​ជាមួយ​ប៉ូលិស​នៅ​កន្លែង​ផាក​តាម​ផ្លូវ​នោះ​អាច​បង់លុយ​តិច​ជាង​៦​ម៉ឺន​រៀល ហើយ​អាច​បន្តដំណើរ​ទៅ​មុខ​ទៀត​បាន​ហើយ​។​ឡាន​ក៏​ដូច​គ្នា​។ ច្បាប់​កំណត់​ផាក​យ៉ាងតិច​៨​ម៉ឺន​រៀល តែបើ​សម្រួល​ជាមួយ​ប៉ូលិស គឺ​អស់​តិច​ជាង​នេះ​។ ករណី​នេះ ប៉ូលិស​មិន​ចេញ​វិ​ក័យ​ប​ត្រ​ឱ្យ​ទេ ហើយ​លុយ​ទាំងនោះ​ចូល​ហោប៉ៅ​ប៉ូលិស​ចែក​គ្នា​ចាយ​យ៉ាង​ពិតប្រាកដ​។

ដោយសារ​តែ​ការ​អនុវត្ត​ច្បាប់ ហាក់ដូចជា មិន​ម៉ឺងម៉ាត់​ដូច្នេះ​ហើយ​នាំ​ឱ្យ​មានការ​បារម្ភ​ថា នៅ​ពេល​កែ​ច្បាប់​ចរាចរណ៍​ថ្មី​រួច​ហើយ ដែល​មាន​កំណត់​ថា អ្នកបើកបរ​រថយន្ត​ដឹក​ជញ្ជូន​សុទ្ធតែ​មាន​លិខិតបញ្ជាក់​ថា មិន​មាន​ផ្ទុក​សារធាតុ​ញៀ​.​ន​នោះ​អាច​នឹង​មានការ​ត្រូវរ៉ូវ​រវាង​មន្ត្រី​ជំនាញ​ខាង​ចេញ​លិខិតបញ្ជាក់ និង​ក្រុមហ៊ុន​ដឹក​ជញ្ជូន ឬ​ក៏​អ្នកបើកបរ​រថយន្ត​ដឹក​ជញ្ជូន ហើយ​ចេះ​តែ​ចេញ​លិខិត ជា​ថ្នូរ​នឹង​លុយ​ក្រោម​តុ​។

Picture
រូបតំណាង

កន្លង​មក​មាន​រួច​មក​ហើយ​អ្នកបើកបរ​ទិញ​ប័ណ្ណបើកបរ​។​ករណី​ទាំង​អស់នេះ​ហើយ​អាច​បង្ក​គ្រោះថ្នាក់​ចរាចរណ៍​ដែល​រាជរដ្ឋាភិបាល និង​មន្ត្រី​ជំនាញ​ខិតខំ​ទប់ស្កាត់ ដោយ​កែ​ច្បាប់​ផង និង​រឹត​បន្តឹង​ការ​អនុវត្ត​ច្បាប់​ផង​។​តែ​លទ្ធផល​មិន​បាន​កាត់​បន្ថយ​គ្រោះថ្នាក់​ទាល់តែ​សោះ​។

ម្យ៉ាងទៀត អ្នកបើកបរ​ឡាន​ម៉ូតូ ក្នុង​ស្ថានភាព​ស្រវឹង ហើយ​បង្ក​គ្រោះថ្នាក់​ជា​រឿយ​ៗ ក៏​នៅ​តែ​បន្ត​កើតឡើង​។ បើកឡាន​បុក​មនុស្ស​របួសធ្ងន់ ឬ​ក៏​ស្លា​.​ប់ ហើយ​ចុង​ក្រោយ​រត់ការ​សម្របសម្រួល​បង់​សំណង់​ត្រឹម ២៥០០​ដុល្លារ​ក៏​រួចខ្លួន​។ បើ​ចាប់​ដាក់​ពន្ធនាគារ​ក៏​ជាប់​មិន​បាន​យូរ​។

ជាមួយ​គ្នា​នោះ អ្នកបើកបរ​ម៉ូតូ​ភាគច្រើន​នៅ​ប្រទេស​យើង​ហាក់​មិន​ចេះ​មិនដឹង​ពី​ច្បាប់​ចរាចរណ៍​។​ក្មេង​ៗ មិន​ទាន់​គ្រប់​អាយុ​អាច​ជិះ​ម៉ូតូ​បើក​លឿន​ៗ​មិនដឹង​ទិស​តំបន់​ក៏​កើតជា​គ្រោះថ្នាក់​។ ដូច្នេះ​ទាមទារ​ឱ្យ​មានការ​យកចិត្តទុកដាក់​ឡើង​វិញ​លើ​ក្រុម​អ្នកបើកបរ និង​ធ្វើ​ដំណើរ​តាម​ម៉ូតូ​ព្រោះថា គ្រោះថ្នាក់​ចរាចរណ៍​ភាគច្រើន​កើត​លើ​អ្នក​ធ្វើ​ដំណើរ​តាម​ម៉ូតូ​នេះឯង​។

ដូច្នេះ​សរុប​មក ទោះបីជា​កែ​ច្បាប់​ដល់​កម្រិត​ណា​ក៏​ដោយ តែបើ​អ្នកបើកបរ​មួយ​ចំនួន​មិន​កែ​ទម្លាប់ បើកបរ​លឿន​ៗ​បើកបរ និង​ធ្វើ​ដំណើរ​តាម​ម៉ូតូ​មិន​ពាក់មួក​សុវត្ថិភាព ព្រមទាំង​មិន​ចេះ និង​មិន​យល់​ពី​ច្បាប់​ចរាចរណ៍ ហើយ​ពិសេស​អ្នកបើកបរ​ឡាន​ក្នុង​ស្ថានភាព​ស្រវឹង គឺ​នឹង​មិន​អាច​កាត់​បន្ថយ​គ្រោះថ្នាក់​ចរាចរណ៍ ដែល​គិត​ជា​មធ្យម ក្នុង​១​ថ្ងៃ នៅ​ទូ​ទាំង​ប្រទេស​មាន​អ្នក​ស្លា​.​ប់​៥​នាក់ និង​របួស​ជាង​១០​នាក់​បាន​ឡើយ​។

យើង​ប្រយ័ត្ន តែបើ​ជនល្មើស​ដែល​ស្រវឹងស្រា បើកឡាន​មក​បុក​ស្រស់​ៗ​ពីក្រោយ​ម៉ូតូ ឬ​ក៏​បើក​បុក​បញ្ច្រាសទិស​គ្នា​ឆ្លង​គន្លង​ផ្លូវ ដោយសារ​តែ​ស្រវឹង​ធ្លាក់​ភ្នែក​ក៏​អ្នកបើកបរ​ដោយ​ប្រុង​ប្រយ័ត្ន នៅ​តែ​រងគ្រោះថ្នាក់​ដដែល​។

រាល់​ការ​ដោះស្រាយ គេ​ចាំបាច់​ត្រូវ​រក​អោយ​ឃើញ​មូលហេតុ​ជាដើម​ចម​។​បើ​ពុំនោះ​ទេ​គេ​នឹង​មិន​អាច​ដោះស្រាយ​បញ្ហា​គ្រោះថ្នាក់​ចរាចរណ៍​តាម​ដងផ្លូវ​បាន​ឡើយ​។ បើសិនជា​នៅ​តែ​អេស​មិន​ចំ​រមាស់​ទេ​នោះ ការ​ស្លា​.​ប់រ​បួស និង​ការ​ខូចខាត​ទ្រព្យសម្បត្តិ​នឹង​នៅ​តែ​កើត​មាន​ដោយសារ​តែ​ការ​បើកបរ​រញ៉េរញ៉ៃ​មិន​គោរព​ច្បាប់ ហើយ​ជាង​នេះ​ទៀត គឺ​មិន​មានការ​ពង្រឹង​ការ​គោរព​ច្បាស់​អោយ​មាន​ប្រសិទ្ធភាព ៕

SEA Game 2023

ព្រឹត្តិការណ៍ស៊ីហ្គេម លើកទី៣២

SEA Game 2023