ខេត្តកំពត ៖ ក្មេងស្រីម្នាក់កើតមកមានក្បាលធំចម្លែក មានដៃដូចមនុស្សធម្មតា តែជើងស្វិតដើរមិនរួច ដេកតែនៅលើកន្ទេលអស់រយៈ ពេល១៧ឆ្នាំហើយ គឺជាជីវិតដែលប្រៀបបីដូចទទួលទណ្ឌកម្មពីព្រហ្មលិខិតដែលកំណត់ឱ្យរស់ក្នុងស្ថានភាពបែបនេះ ដោយគ្មានក្តីមេត្តាបន្តិចណាសោះ ។ សួរថា តើគ្រប់គ្នាចង់រស់បែបនេះឬ? ជាចម្លើយ គ្មាននរណាចង់រស់បែបនេះឡើយ ។
ក្មេងស្រីក្បាលធំពីកំណើតនេះឈ្មោះ សុីម កែវអាយុ១៧ឆ្នាំ មានម្ដាយឈ្មោះ ផែន ថង អាយុ៣៥ឆ្នាំ ឪពុកឈ្មោះ សុប នីម អាយុ៣៧ឆ្នាំ មានកូនប្រុសស្រី៣នាក់ រស់នៅភូមិស្ដេចគង់ ឃុំស្ដេចគង់ខាងលិច ស្រុកបន្ទាយមាស ។ អ្នកស្រី ផែន ធេង អាយុ៥២ឆ្នាំ ជាអ្នកភូមិស្ដេចគង់បានប្រាប់ឱ្យដឹងថា ក្មេងស្រីដែលកើតមកហើយខុសប្លែកពីអ្នកដ៏ទៃនោះ គឺនាងមានក្បាលធំ ជើងស្វិត ដៃធម្មតា និយាយមិនសូវច្បាស់ ។ អ្នកភូមិរូបនេះបានប្រាប់ឱ្យដឹងទៀតថា ក្មេងស្រីនេះគួរឱ្យអាណិតណាស់ តាំងពីកើតមកដេកតែនៅលើកន្ទេលរយៈពេល១៧ឆ្នាំហើយ ក្រោមការមើលថែពីម្ដាយឪពុក ។
ស្ត្រីជាម្ដាយក្មេងស្រីបានរៀបរាប់ឱ្យដឹងថា កូនស្រីគាត់ជាកូនច្បងប៉ុន្តែកូនគាត់ពិតជាអភ័ព្វជាងក្មេងឯទៀត ពេលដែលកើតបានរយៈពេល២ខែ កូនស្រីគាត់មានអាការ:ក្ដៅខ្លួន ហើយក៏មានរូបរាងក្បាលធំជើងស្វិតតែម្ដង រហូតមកដល់សព្វថ្ងៃមានអាយុ១៧ឆ្នាំហើយ ។ ម្ដាយក្មេងស្រីរូបនេះ បាននិយាយត្អូញត្អែរថាគិតយូរៗទៅនៅតែអាណិតអាសូរ បើគ្នាដេកមួយថ្ងៃៗ មិនដែលឃើញពន្លឺព្រះអាទិត្យចាប់ពីកើតមក មានរយៈពេល១៧ឆ្នាំហើយ ពិតជាយូរណាស់ តែមិនដឹងធ្វើយ៉ាងណាទេ មានតែទ្រាំតាមកម្មទៅចុះ ។ ហូបបាយទឹក បត់ដៃបត់ជើង នៅលើម្តាយជាអ្នកទទួលបន្ទុក ។
លោក សៅ អ៊ក ប្រធានភូមិស្ដេចគង់បានប្រាប់ឱ្យដឹងថា ក្មេងស្រីក្បាលធំនេះពិតជាដេកនៅលើកន្ទេលអស់រយៈពេល១៧ឆ្នាំមែន ក្នុងនាមអាជ្ញាធរមូលដ្ឋាន មិនមានលទ្ធភាពជួយគ្រួសារនេះបានទេ ។ លោកមេភូមិក៏ដូចប្រជាពលរដ្ឋនៅភូមិស្ដេចគង់ បាននិយាយថា កុមារីក្បាលធំនេះ មិនធ្លាប់បានទទួលអំណោយពីស្ថាប័នណាម្ដងទេ ហាក់បីដូចមើលរំលងរហូតមក ជាមួយនឹងព្រហ្មលិខិតដែលគ្មានក្តីមេត្តា ៕
ចែករំលែកព័តមាននេះ