កម្មករ២នាក់មកធ្វើការ តែបែកគំនិតលេងល្បិចដាក់ថៅកែច្រើនលើកច្រើនសារ ពេលនេះអស់លក្ខណ៍
- កណ្តាល
ជនសង្ស័យ២នាក់ដែលជាកម្មករឡឥដ្ឋ ត្រូវបាននគរបាលស្រុកមុខកំពូល ធ្វើការឃាត់ខ្លួន បន្ទាប់ពីធ្វើសកម្មភាពលួចជាច្រើនលើក។ ហេតុការណ័នេះ
ខេត្តកណ្តាល ៖ ជនសង្ស័យ២នាក់ដែលជាកម្មករឡឥដ្ឋ ត្រូវបាននគរបាលស្រុកមុខកំពូល ធ្វើការឃាត់ខ្លួន បន្ទាប់ពីធ្វើសកម្មភាពលួចជាច្រើនលើក។ ហេតុការណ័នេះបានកើតឡើងនៅថ្ងៃទី០៦ ខែធ្នូ ឆ្នាំ២០២២ វេលាម៉ោង១៧និង០០នាទីល្ងាច នៅចំណុចក្នុងឡឥដ្ឋ «វ៉េង លាងអេង» ស្ថិតក្នុងភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្ដាល។
ជនសង្ស័យ០២នាក់ខាងលើ ទី១- ឈ្មោះ រស់ រិទ្ធ ភេទប្រុស អាយុ២០ឆ្នាំ ជនជាតិខ្មែរ មុខរបរកម្មករឡឥដ្ឋ ទី២- ឈ្មោះអន តុលា ហៅឡា ភេទប្រុស អាយុ២៣ឆ្នាំ ជនជាតិខ្មែរ មុខរបរកម្មករឡឥដ្ឋ។ អ្នកទាំងពីរមានទីលំនៅសព្វថ្ងៃស្នាក់នៅក្នុងឡឥដ្ឋ «វ៉េង លាងអេង» ស្ថិតក្នុងភូមិឈើទាល ឃុំព្រែកអញ្ចាញ ស្រុកមុខកំពូល ខេត្តកណ្តាល។ ចំណែកជនរងគ្រោះឈ្មោះ វ៉េង លាងហ័ត ភេទប្រុស អាយុ៣៥ឆ្នាំ ជនជាតិខ្មែរ មុខរបរសិប្បកម្មឡឥដ្ឋ មានទីលំនៅភូមិក្រោម ឃុំព្រែកអញ្ចាញ ស្រុកមុខកំពូល ខេត្តកណ្តាល។
បើតាមនគរបាលស្រុកមុខកំពូល បានប្រាប់អោយដឹងថា កន្លងមក ជនសង្ស័យជាមុខសញ្ញាប្រើប្រាស់គ្រឿងញៀ.ន និងបានលួចសម្ភារៈរបស់ថៅកែក្នុងឡឥដ្ឋជាច្រើនលើកមកហើយ។ លុះនៅថ្ងៃ០៥ ខែធ្នូ ឆ្នាំ២០២២ វេលាម៉ោង១៧និង០០នាទីល្ងាច ជនសង្ស័យទាំងពីរនាក់បានធ្វើសកម្មភាពលួចយកដែកបន្ទះបិទមុខឡចំនួន០៥បន្ទះ ដែលទម្នង់សរុប៣៩.៥គីឡូក្រាម ដាក់ក្នុងរទេះគោយន្តដឹកយកទៅលក់អោយកន្លែងទិញលក់អេតចាយ នៅភូមិកោះរកា ឃុំព្រែកអញ្ចាញ បានប្រាក់ចំនួន៤០០០០ម៉ឺនរៀល រួចចែកគ្នាបាន២ម៉ឺនរៀលម្នាក់ បន្ទាប់មកក៏បើកគោយន្តត្រឡប់ទៅឡឥដ្ឋវិញ។
ប្រភពដដែលបន្តថា ភ្លាមៗនោះ ជនរងគ្រោះបានដឹងថា បាត់ដែកក៏បានជិះម៉ូតូសួរតាមកន្លែងទិញអេតចាយនៅភូមិកោះរកា ក៏បានឃើញដែកបន្ទះបិទមុខឡរបស់ខ្លួន ក៏សួរនាំ ហើយអ្នកទិញអេតចាយបានប្រាប់ថា បានទិញពីកម្មករឡឥដ្ឋដែលបានបើកគោយន្តដឹកយកមកលក់។ លុះព្រឹកថ្ងៃទី០៦ ខែធ្នូ ឆ្នាំ២០២២ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលព្រែកអញ្ចាញតែម្តង។
ក្រោយពីទទួលពាក្យបណ្តឹងពីជនរងគ្រោះភ្លាម សមត្ថកិច្ចប៉ុស្តិ៍បានបានចុះទៅកន្លែងកើតហេតុ ហើយក៏បាននាំខ្លួនយកជនសង្ស័យមកសាកសួរ។ ហើយនៅចំពោះមុខសមត្ថកិច្ច ជនសង្ស័យបានឆ្លើយសារភាពថា «ពួកខ្លួនពិតជាបានធ្វើសកម្មភាពលួចដែករបស់ជនរងគ្រោះប្រាកដមែន»។ ក្រោយការសាកសួរ ជនសង្ស័យត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលស្រុកមុខកំពូល។ ករណីនេះ សមត្ថកិច្ចកំពុងកសាងសំណុំរឿង ដើម្បីបន្តចាត់ការតាមនីតិវិធីច្បាប់។
ចែករំលែកព័តមាននេះ