មនុស្សភាគច្រើនពិតជាស្ទាក់ស្ទើរ នៅពេលមិត្តភក្ដិ ឬសាច់ញាតិបងប្អូនហៅទៅចូលរួមពិធីឡើងគេហដ្ឋានថ្មី ដោយមិនដឹងថា មានវត្ថុអ្វីកំដរដៃជាអំណោយឲ្យស័ក្ដិសម ។ បើអ្នកបានទទួលការអញ្ជើញទៅចូលរួម ហើយ មិនដឹងគួរទិញអ្វីធ្វើជាអំណោយដល់ម្ចាស់ផ្ទះនោះ ខាងក្រោមនេះ…
មនុស្សភាគច្រើនពិតជាស្ទាក់ស្ទើរ នៅពេលមិត្តភក្ដិ ឬសាច់ញាតិបងប្អូនហៅទៅចូលរួមពិធីឡើងគេហដ្ឋានថ្មី ដោយមិនដឹងថា មានវត្ថុអ្វីកំដរដៃជាអំណោយឲ្យស័ក្ដិសម ។
បើអ្នកបានទទួលការអញ្ជើញទៅចូលរួម ហើយ មិនដឹងគួរទិញអ្វីធ្វើជាអំណោយដល់ម្ចាស់ផ្ទះនោះ ខាងក្រោមនេះ ជាវត្ថុស័ក្តិសមបំផុតសម្រាប់អ្នកជ្រើសរើស ព្រោះមានវាអត្ថន័យល្អ ជួយបន្ថែមសិរីមង្គលដល់ម្ចាស់ផ្ទះ ឬក៏លោកអ្នកអាចទិញវត្ថុទាំងនេះទៅដាក់ក្នុងផ្ទះរបស់ខ្លួនបានដូចគ្នា ។
១-រូបចម្លាក់សត្វ ៖
ការយករូបចម្លាក់សត្វមង្គលមកធ្វើជាអំណោយឡើងផ្ទះថ្មី មិនថាជាចម្លាក់សត្វនាគ សិង្ហ សេះ អណ្តើក ឬដំរី គឺសុទ្ធតែមានអត្ថន័យល្អ ។ បើនិយាយជាទូទៅ វាសំដៅលើការជូនពរដល់ម្ចាស់ផ្ទះឲ្យមានក្តីសុខ ចម្រើនរុងរឿង សុខភាពរាងកាយរឹងមាំ អាយុវែង និងនាំអំណាចបារមី ជីវិតទទួលបានជោគជ័យគ្រប់បែបយ៉ាង ។
២-រូបក្ងោក ៖
ការយករូបសត្វក្ងោកសម្រាប់ជាអំណោយឡើងផ្ទះថ្មី វានឹងជួយលើកកម្ពស់កេរ្តិ៍ឈ្មោះ កិត្តិយស អំណាច និងបារមី តាមភាពដ៏ស្រស់ស្អាតរបស់ក្ងោក ។ ដូច្នេះ វាស័ក្តិសមនឹងប្រគល់ឲ្យទៅអ្នកដែលកំពុងឡើងផ្ទះថ្មី ។
៣-សម្ភារចងព្យួរ ៖
នៅពេលសម្ភារចងព្យួរនេះប៉ះជាមួយខ្យល់ វានឹងបង្កើតសំឡេងដ៏ពិរោះបែបធម្មជាតិ។ ហេតុនេះ វាសមនឹងត្រូវបាននាំយកមកធ្វើជាអំណោយឡើងផ្ទះថ្មី ដែលនឹងជួយបណ្តេញអ្វីមិនល្អឲ្យចេញពីផ្ទះ និងទទួលបានកម្លាំងថាមពលល្អចូលមកក្នុងផ្ទះផងដែរ។
៤-សំពៅ ៖
អំណោយឡើងផ្ទះថ្មី ឬហាងលក់ដូរថ្មីសម្រាប់ម្ចាស់ផ្ទះមានជំនួញនោះ យើងអាចយកសំពៅចិន ឬទូកកប៉ាល់សម្រាប់ជូនពួកគេ ព្រោះវានឹងជួយឲ្យមានការជំរុញលើកស្ទួយ ឧបត្ថម្ភគាំទ្រ កិច្ចការចម្រើនរុងរឿង រហ័សរហួន និងគ្មានឧបសគ្គមករាំងស្ទះ ។
៥-កញ្ចក់ ៖
គ្រប់ផ្ទះត្រូវតែមានកញ្ចក់សម្រាប់ប្រើប្រាស់ និងត្រូវបានគេចាត់ទុកជាវត្ថុមង្គលតុបតែងផ្ទះផងដែរ ។ ក្រៅពីកញ្ចក់ជួយកែប្រែភាពងងឹតនៅក្នុងផ្ទះហើយ វានឹងបន្ថែមថាមពលល្អចូលមកក្នុងផ្ទះ ។
ការរៀបចំឲ្យត្រូវទីតាំង គឺមិនត្រូវដាក់វាឲ្យបែរមុខរកគ្នាទេ, ហាមដាក់តាំងនៅលើគ្រែ ឬដាក់លើទ្វារផ្ទះ ។ ចំណែកទីតាំងដែលត្រឹមត្រូវ គឺដាក់កញ្ចក់ឲ្យបែរមុខចាំងត្រឡប់ជាមួយសម្ភារធ្វើពីប្រាក់ (ផ្តិល, ចាន) ព្រោះវានឹងជួយបង្កើនទ្រព្យសម្បត្តិ ឬមាសប្រាក់ ។
៦-ទ្រនាប់ជើងសេះ ៖
រាប់ថា ជាវត្ថុមង្គលជាទីបំផុត ហើយបើយើងយកវត្ថុនេះទៅឲ្យម្ចាស់ផ្ទះដែលស្រឡាញ់សេះនោះ នឹងរឹតតែល្អថែមទៀត ។ នៅពេលយកវាទៅតុបតែង ម្ចាស់ផ្ទះត្រូវដាក់ផ្ងារឡើងលើ ព្រោះនឹងជួយបើកផ្លូវឲ្យអ្វីល្អៗហូរចូលមក និងរក្សាទុកមិនឲ្យចេញទៅវិញបាន ។
៧-ដើមឫស្សី ៖
យើងអាចស្វែងរកដើមរកឫស្សីស្អាតៗ ប្រគល់ជូនម្ចាស់ផ្ទះក្នុងថ្ងៃឡើងផ្ទះថ្មី គឺធានាថា ម្ចាស់ផ្ទះនឹងចូលចិត្តអំណោយប្រភេទនេះខ្លាំងបំផុត ព្រោះនឹងបង្កើតភាពត្រជាក់ត្រជុំ ថែមទាំងជួយបើកផ្លូវឲ្យជោគលាភហូរចូលមកក្នុងផ្ទះផងដែរ ។
៨-គ្រីស្តាល់ ៖
ក្រៅពីគ្រីស្តាល់មានទម្រង់ស្រស់ស្អាត និងមើលទៅឆើតឆាយ គឺស័ក្តិសមនឹងយកវាមកតុបតែងផ្ទះ ។ បើយើងយកវាធ្វើជាអំណោយឡើងផ្ទះថ្មីដល់ក្រុមគ្រួសារដែលមានកូនចៅនៅក្នុងវ័យសិក្សា និងណែនាំឲ្យពួកគេព្យួរនៅទិសខាងជើងនៃផ្ទះ វានឹងធ្វើឲ្យកូនចៅក្នុងផ្ទះនោះទទួលបានជោគជ័យក្នុងការរៀនសូត្រ ។
៩-រូបតុក្កតាឆ្មា ៖
វត្ថុមង្គលប្រភេទនេះស័ក្តិសមនឹងយកទៅឲ្យផ្ទះដែលមានមុខជំនួញ ព្រោះនឹងជួយបង្កើនការលក់ដូរឲ្យចម្រើនរុងរឿង រលូន នាំមកនូវទ្រព្យសម្បត្តិ និងសិរីមង្គលចូលមក។ បន្ទាប់ពីនេះ នៅធ្វើឲ្យថាមពលល្អៗវិលជុំវិញផ្ទះទៀតផង ។
១០-យ័ន្តប្រាំបីទិស Pa Kua (យ័ន្តចិន) ៖
ទោះបីជាយន្ត Pa Kua មិនសូវត្រូវបានគេយកមកធ្វើជាអំណោយឡើងផ្ទះថ្មីប៉ុន្មានក្តី ប៉ុន្តែវាក៏ជារបស់មង្គលមួយប្រភេទ ដែលម្ចាស់ផ្ទះគួរមាននៅក្នុងផ្ទះផងដែរ ដើម្បីផ្តល់សំណាង ។
ផ្ទះណាមានចំណុចធ្វេសប្រហែស ឬផ្ទះបែរមុខទៅរកទិសមិនត្រឹមត្រូវ បើយើងយកវាមកដាក់ក្នុងផ្ទះ នឹងជួយដោះស្រាយបញ្ហា បង្កើតភាពស្មើគ្នា ព្រមទាំងការពារអ្វីមិនល្អដែលបម្រុងចូលមក ។
១១-ថ្មទីបេ ៖
ថ្មទីបេជាវត្ថុមង្គលម្យ៉ាងដែលយើងធ្លាប់ឃើញ ធ្លាប់ស្គាល់ច្បាស់នោះ មានការយកមកដាក់ក្នុងផ្ទះឲ្យមើលទៅស្រស់ស្អាតឡើង។ វាសមនឹងយកមកធ្វើជាកាដូជូនម្ចាស់ផ្ទះថ្មី មានន័យថា ភាពស្រស់ស្អាត និងពន្លឺ នឹងជួយការពារក្តីអន្តរាយឲ្យឃ្លាតឆ្ងាយ និងធ្វើឲ្យការរស់នៅត្រជាក់ត្រជំ ។
១២-កាក់ចិន ៖
បើម្ចាស់ផ្ទះថ្មី ជាមនុស្សដែលចូលចិត្តរបស់បុរាណ ឬជាអ្នកសន្សំរបស់របរចាស់ៗ សូមណែនាំឲ្យរកកាក់ចិនបុរាណផ្តល់ដល់ពួកគេ។ ក្រៅពីវាជាវត្ថុបុរាណពិបាកស្វែងរក គឺនៅត្រង់ចំណុចកណ្តាលនៃកាក់នោះ ប្រៀបដូចជាកែវភ្នែកដែលកំពុងសម្លឹងឆ្ពោះទៅមុខ ។ វាជួយបន្ថែមលាភសំណាង មានអំណាចបារមី និងធ្វើឲ្យអ្នកសម្រេចជោគជ័យយ៉ាងជាក់លាក់ ។
១៣-នាឡិកាពណ៌មាស ៖
បើម្ចាស់ផ្ទះជាមនុស្សចូលចិត្តនាឡិកា យើងក៏អាចយកវាមកធ្វើជាអំណោយឡើងផ្ទះថ្មីបាន ប៉ុន្តែបើចង់ឲ្យល្អ គួរតែជានាឡិកាមានមុខមូល និងពណ៌មាស ព្រោះនឹងធ្វើឲ្យមានអ្នកឧបត្ថម្ភគាំទ្រ ស្រឡាញ់ មេត្តាករុណា ។ បន្ទាប់ពីនេះ វាអាចជួយតុបតែងផ្ទះឲ្យមានសម្រស់ឆើតឆាយទៀតផង ។
១៤-រូបត្រីជាគូ ៖
បើអ្នកមិនទាន់មានគំនិតក្នុងការស្វែងរកទិញអំណោយឡើងផ្ទះថ្មីទេ រូបត្រីជាគូ ក៏ចាត់ទុកថា ជារបស់ល្អសម្រាប់តុបតែងផ្ទះផងដែរ ព្រោះវាមានអត្ថន័យដ៏ពិសិដ្ឋជាមួយផ្ទះថ្មី។ វាជួយរក្សាប្រាក់ឲ្យគង់វង្ស មានហូប មានចុក មានរបស់របរប្រើប្រាស់មិនខ្វះ គឺធានាថា វាជាអំណោយដែលត្រូវចិត្តមនុស្សជាច្រើនយ៉ាងពិតប្រាកដ ។
ពេលនេះ តើអ្នកមានអំណោយពិសេសណាមួយដែលចាប់អារម្មណ៍យកទៅជូនម្ចាស់បផ្ទះថ្មីហើយឬនៅ ? បន្ទាប់ពីជូនអំណោយដល់អ្នកដទៃហើយ បើអ្នកណាចាប់អារម្មណ៍ចង់បន្ថែមភាពរុងរឿងដល់ផ្ទះរបស់ខ្លួន និងសមាជិកគ្រួសារ គឺអាចយកវត្ថុខាងលើនេះទៅតុបតែងផ្ទះរបស់ខ្លួនបាន ៕
ចែករំលែកព័តមាននេះ