វៀតណាម ៖ វៀតណាមប្រកាសភាពអាសន្នពីកំហាប់ជាតិប្រៃនៅតំបន់ដីសណ្ដទន្លេមេគង្គ ក្រោយពីខេត្តដុងថាប់ឈានដល់កម្រិតហានិភ័យ ខណៈហូជីមិញត្រៀមផែនការសង្គ្រោះបន្ទាន់។ នៅថ្ងៃទី២៧ ខែមករា ឆ្នាំ២០២៦ សារព័ត៌មានកសិកម្ម និងបរិស្ថានវៀតណាម…
វៀតណាម ៖ វៀតណាមប្រកាសភាពអាសន្នពីកំហាប់ជាតិប្រៃនៅតំបន់ដីសណ្ដទន្លេមេគង្គ ក្រោយពីខេត្តដុងថាប់ឈានដល់កម្រិតហានិភ័យ ខណៈហូជីមិញត្រៀមផែនការសង្គ្រោះបន្ទាន់។
នៅថ្ងៃទី២៧ ខែមករា ឆ្នាំ២០២៦ សារព័ត៌មានកសិកម្ម និងបរិស្ថានវៀតណាម បានបញ្ជាក់ថា ចាប់តាំងពីពាក់កណ្ដាលខែមករា មកនេះការជ្រាបចូលនៃទឹកសមុទ្របានចាប់ផ្តើមលុកលុយចូលក្នុងតំបន់ដីសណ្ដទន្លេមេគង្គ សម្រាប់រដូវប្រាំងឆ្នាំ២០២៥-២០២៦ បើទោះបីជាកម្រិតនៃការជ្រាបចូលត្រូវបានព្យាករណ៍ថា មានសភាពស្រាលជាងឆ្នាំ២០២៥ ក៏ដោយ ប៉ុន្តែការប្រែប្រួលមិនប្រក្រតីនៃចរន្តទឹកពីផ្នែកខាងលើ បានកំពុងបង្កើតជាក្ដីបារម្ភយ៉ាងខ្លាំង ដល់ផលិតកម្មកសិកម្ម និងជីវភាពរស់នៅរបស់ប្រជាជនក្នុងតំបន់ ជាពិសេស គឺខេត្តដុងថាប់ ដែលកំពុងស្ថិតក្នុងសញ្ញាអាសន្ន ខណៈទីក្រុងហូជីមិញ ត្រៀមបើកយុទ្ធនាការប្រយុទ្ធប្រឆាំងគ្រោះរាំងស្ងួត ។
ប្រភពដដែលបន្តថា ខេត្តដុងថាប់ ដែលជាជង្រុកកសិកម្មដ៏សំខាន់មួយ កំពុងស្ថិតក្រោមការតាមដានយ៉ាងយកចិត្តទុកដាក់ ខណៈដែលកំហាប់ជាតិប្រៃកំពុងមានការកើនឡើង ។
យោងតាមរបាយការណ៍ពីក្រសួងកសិកម្ម និងបរិស្ថានវៀតណាម កម្រិតជាតិប្រៃ ៤ក្រាម/លីត្រ បានជ្រាបចូលយ៉ាងជ្រៅទៅក្នុងដីគោក ដែលអាចប៉ះពាល់ដល់ប្រព័ន្ធស្រោចស្រព និងគុណភាពដីកសិកម្ម ។ ហានិភ័យនៃការខ្វះខាតទឹកសាប ក្នុងមូលដ្ឋានកំពុងលេចរូបរាងឡើង ដែលតម្រូវឱ្យកសិករក្នុងខេត្តដុងថាប់ ត្រូវប្រុងប្រយ័ត្នខ្ពស់បំផុត ជាពិសេសក្នុងការត្រួតពិនិត្យជាតិប្រៃមុនពេលស្រោចស្រពដំណាំ ដើម្បីការពារការខូចខាតដែលមិនអាចស្តារបាន ។ ស្របពេលជាមួយគ្នានេះ ទីក្រុងសេដ្ឋកិច្ចដ៏ធំបំផុតរបស់វៀតណាម គឺទីក្រុងហូជីមិញ បានប្រកាសដាក់ចេញនូវផែនការសកម្មភាពយ៉ាងច្បាស់លាស់ ដើម្បីប្រយុទ្ធប្រឆាំងនឹងគ្រោះរាំងស្ងួត និងការជ្រាបចូលទឹកប្រៃ ។
ផែនការនេះរួមមាន ការគ្រប់គ្រងប្រភពទឹក ដើម្បីធានាការផ្គត់ផ្គង់ទឹកស្អាតសម្រាប់ជីវភាពប្រចាំថ្ងៃរបស់ពលរដ្ឋរាប់លាននាក់ និងការទប់ស្កាត់ផលប៉ះពាល់ ដោយរៀបចំប្រព័ន្ធការពារទឹកប្រៃមិនឱ្យហូរចូលជ្រៅក្នុងតំបន់ផលិតកម្មជាយក្រុង ។
យ៉ាងណាមិញ យោងតាមលោក Nguyen Hong Khanh អនុប្រធាននាយកដ្ឋានគ្រប់គ្រងសំណង់ធារាសាស្ត្រ ការជ្រាបចូលទឹកប្រៃអាចនឹងបន្តអូសបន្លាយ និងកើនឡើងកម្ដៅរហូតដល់ ខែមេសា ឆ្នាំ២០២៦ ប្រសិនបើគ្មានភ្លៀងធ្លាក់ ។ ចំណុចដែលត្រូវប្រុងប្រយ័ត្ន ៖ នៅតាមតាមមាត់ទន្លេមេគង្គ ទឹកប្រៃនឹងឡើងដល់ចំណុចកំពូលនៅពាក់កណ្ដាល និងចុងខែមីនា ។ ចំណែកទន្លេវ៉ាំកូ និងទន្លេកៃឡឺន កំហាប់ជាតិប្រៃអាចជ្រាបចូលជ្រៅរហូតដល់ ៦០-៦៥ គីឡូម៉ែត្រពីមាត់សមុទ្រ ។
ដើម្បីឆ្លើយតបនឹងវិបត្តិនេះ ក្រសួងកសិកម្ម និងបរិស្ថានវៀតណាម បានដាក់ចេញនូវអនុសាសន៍សង្គ្រោះបន្ទាន់ រួមមាន ៖ – ការស្តុកទឹកសាប៖ បង្កើនការបូមទឹកសាបទុកក្នុងស្រះ បឹង នៅពេលមានទឹកសាបហូរមកដល់ (ជាពិសេស ៥-៧ ថ្ងៃមុនពេលទឹកជោរ)។ – បច្ចេកវិទ្យាសន្សំសំចៃ៖ អនុវត្តការស្រោចស្រពបែបទំនើបដែលប្រើប្រាស់ទឹកតិចបំផុតសម្រាប់ស្រូវ និងឈើហូបផ្លែដែលមានតម្លៃសេដ្ឋកិច្ចខ្ពស់។ – ការតាមដានព័ត៌មាន៖ កសិករត្រូវតាមដានព្រឹត្តិបត្រព័ត៌មានជាតិប្រៃរៀងរាល់សប្តាហ៍ ដើម្បីសម្រេចចិត្តលើការដាំដុះ៕
ចែករំលែកព័តមាននេះ