- ភ្នំពេញ
រាជធានីភ្នំពេញ ៖ នៅរៀងរាល់ពេលមានពិធីជួបជុំមិនថា នៅទីសាធារណៈ ឬកន្លែងជួបជុំតាមរោងបុណ្យ ឬរោងការទេ គឺសំរាមកាកសំណល់ ពិសេសក្រដាសជូតមាត់ ថង់ផ្លាស្ទិក ដបទឹកសុទ្ធ…
រាជធានីភ្នំពេញ ៖ នៅរៀងរាល់ពេលមានពិធីជួបជុំមិនថា នៅទីសាធារណៈ ឬកន្លែងជួបជុំតាមរោងបុណ្យ ឬរោងការទេ គឺសំរាមកាកសំណល់ ពិសេសក្រដាសជូតមាត់ ថង់ផ្លាស្ទិក ដបទឹកសុទ្ធ កំប៉ុងទឹកក្រូច កំប៉ុងប៊ីយែ ជាដើម តែងតែត្រូវបានពង្រាយពាសវាលពាសកាល។
នេះជាទម្លាប់មិនល្អមួយដែលគួរតែប្រជាពលរដ្ឋខ្មែរយើង ពិសេសយុវជនជំនាន់ថ្មីរបស់យើងប្តូរចេញ ហើយទុកដាក់កាកសំណល់សំរាមទាំងនោះចងទុកក្នុងថង់ ឬក៏ដាក់ក្នុងធុងសំរាមឱ្យមានរបៀបរៀបរយ។
ជាក់ស្តែង កាលពីថ្ងៃអាទិត្យ ទី៤ ខែធ្នូ ឆ្នាំ២០២២ សំរាមត្រូវបានពង្រាយរប៉ាត់រប៉ាយនៅតាមដងផ្លូវក្នុងតំបន់ រមណីយដ្ឋានអង្គរក្រោយព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងអង្គរ។ នេះ គឺជាព្រឹត្តិការណ៍កីឡា «រត់ដើម្បីសុខភាព ដើម្បីសាមគ្គីភាព» ដែលការរៀបចំព្រឹត្តិការណ៍កីឡានេះមានភាពល្អប្រសើរ និងទទួលបានការចូលរួមយ៉ាងច្រើនកុះករពីសំណាក់ភ្ញៀវទេសចរជាតិ និងអន្តរជាតិ។
ក៏ប៉ុន្តែសំរាមប្លាស្ទិកជាច្រើនត្រូវបានបោះចោលនៅតាមដងផ្លូវនានា។សំណល់ប្លាស្ទិកទាំងនោះអាចបង្កផលប៉ះពាល់ទៅដល់អនាម័យបរិស្ថាននៅក្នុងតំបន់អង្គរទាំងមូល។ដើម្បីចូលរួមថែរក្សាអនាម័យ បរិស្ថាន ក្នុងតំបន់រមណីយដ្ឋានអង្គរ ក្រោយចប់ព្រឹត្តិការណ៍មានខាងក្រុមថែរក្សាអនាម័យ និងបរិស្ថានបានបោសស្អាត និងរើសកាកសំណល់ទាំងអស់នោះ។
ជាការពិតរៀងរាល់ពេលជួបជុំក្នុងពិធីនានាមិនថា នៅតាមទីសាធារណៈ ឬក៏នៅតាមរោងការ រោងបុណ្យ ឬពិធីជប់លៀងក្នុងហាងក្នុងរោងនោះទេ តែងតែមានអ្នកបោសសម្អាតតាមប្រមូល កើបសំរាម និងកាកសំណល់ទាំងអស់នោះ។ ប៉ុន្តែគេគួរតែធ្វើឱ្យស្អាតមុនជាជាងប្រឡាក់ហើយទើបទៅបោសជូតលាងសម្អាត។ នោះ គឺអ្នកចូលរួមពិធីជួបជុំម្នាក់ៗមិនចាំបាច់ថា ដល់ថ្នាក់ចូលរួមបោសសម្អាត និងរើសសំរាមកាកសំណល់នៅកន្លែងជួបជុំនោះទេ តែម្នាក់ៗ ត្រូវទទួលខុសត្រូវរៀងៗខ្លួនក៏បានហើយ។ ពោល គឺដបទឹកសុទ្ធកំប៉ុងទឹកក្រូច កំប៉ុងប៊ីយែ ឬក៏ក្រដាសជូតមាត់ ថង់ប្លាស្ទីកជាដើម ដែលអ្នកបានប្រើប្រាស់រួចហើយ គឺអ្នកនោះត្រូវតែទទួលខុសត្រូវដោយខ្លួនឯង តាមរយៈការទុកដាក់កាកសំណល់សំរាមទាំងនោះ នៅក្នុងធុងសំរាម ឬក៏វេចខ្ចប់ និងយកទៅបោះចោលនៅធុងសំរាម ឬកន្លែងសមគួរណាមួយ។
ក្រៅពីការទទួលខុសត្រូវរបស់បុគ្គលម្នាក់ៗដែលចូលរួមពិធីជួបជុំហើយនោះ អ្នករៀបចំកម្មវិធីមិនថា រោងបុណ្យ រោងការ ឬក៏ព្រឹត្តិការណ៍ជួបជុំណាទេត្រូវតែរៀបចំធុងសំរាម ឬក៏ថង់ កេសសម្រាប់ដាក់សំរាម ហើយដាក់ពង្រាយតាមតុ និងតាមកន្លែងជួបជុំទាំងនោះ។ព្រោះថា បើមិនមានធុងសំរាម ឬថង់ កេសសម្រាប់ដាក់សំរាមទេនោះក៏មិនដឹងថា អ្នកចូលរួមត្រូវយកសំរាមទៅបោះចោលនៅឯណាឡើយ។ ដូច្នេះមានតែបោះពង្រាយនៅក្រោមតុ ក្រោមកៅអី ឬក៏បោះពង្រាយនៅកន្លែងជួបជុំនោះជាមិនខាន។
ជាសរុបមកបញ្ហាសំរាម និងកាកសំណល់នេះត្រូវមានការទទួលខុសត្រូវទាំងអស់គ្នា។ទាំងអ្នកចូលរួមពិធីជួបជុំផង និងទាំងអ្នករៀបចំកម្មវិធីជួបជុំផង។ បើចូលរួមព្រឹត្តិការណ៍រត់ ដើម្បីសុខភាពក៏ត្រូវតែគិតពីបរិស្ថានផង។ បើបរិស្ថាន នៅកន្លែងជួបជុំរត់កីឡានោះបែរជាមានសំរាម កាកសំណល់រប៉ាត់រប៉ាយ តើបានសុខភាពមកពីណា? ដូច្នេះមិនចាំបាច់ដល់ថ្នាក់ដើររើសប្រមូលសំរាមគេទេ គ្រាន់តែយើងម្នាក់ៗកុំបោះចោលសំរាមផ្តេសផ្តាសមានន័យថា យើងបានចូលរួមសម្អាត និងការពារបរិស្ថានបានទៅហើយ។
រីឯនៅកន្លែងជួបជុំតាមរោងបុណ្យ រោងការវិញ ក៏អ្នកចូលរួមពិធី ត្រូវតែស្អាតដោយខ្លួនឯង និងទទួលខុសត្រូវខ្លួនឯង។ ពោល គឺត្រូវស្អាតដូចយើងតែងខ្លួនឡើងខ្ញង់ៗ ចូលរួមពិធីដូច្នោះដែរ។ថង់ផ្លាស្ទីក ដែលវេចខ្ចប់ចានចង្កឹះ ក្រដាសជូតមាត់ ឆ្អឹងមាន់ទា ឬឆ្អឹងត្រី សំបកដបទឹកសុទ្ធ កំប៉ុងទឹកក្រូច កំប៉ុងប៊ីយែ ជាដើម ត្រូវតែទុកម្តុំ ហើយបើអាចអ្នករៀបចំពិធីត្រូវតែមានកន្ត្រក់ ឬធុងសំរាមតូចៗ ដាក់តាមតុ ដើម្បីឱ្យភ្ញៀវចូលរួមពិធីបោះចោលកាកសំណល់ទាំងនោះឱ្យមានរបៀបរៀបរយ។
បើមិនមានទេ ក៏គួរតែមានអ្នកសម្អាត ដើម្បីមើលទៅកុំឱ្យពិបាកភ្នែកពេក។ រួមគ្នាសម្អាត រួមគ្នាទទួលខុសត្រូវទើបសង្គមយើងបានស្អាត។ ចូរយើងនាំគ្នាធ្វើឱ្យស្អាតមុន ប្រសើរជាងប្រឡាក់ហើយ ទើបនាំគ្នាដុសលាងសម្អាត៕
ចែករំលែកព័តមាននេះ