ហ៊ានមែន! ជិះម៉ូតូទៅផុតហើយ បត់ត្រឡប់ក្រោយ មកសកម្មភាពលើស្ត្រីម្នាក់ផ្អើលទាំងថ្ងៃ
- ភ្នំពេញ
ជនសង្ស័យម្នាក់ត្រូវបាននគរបាល និងប្រជាការពារចាប់ខ្លួនបានភ្លាមៗ រីឯ២នាក់ទៀតរត់គេចខ្លួនរួច ក្រោយពេលធ្វើសកម្មភាព
រាជធានីភ្នំពេញ ៖ ជនសង្ស័យម្នាក់ត្រូវបាននគរបាល និងប្រជាការពារចាប់ខ្លួនបានភ្លាមៗ រីឯ២នាក់ទៀតរត់គេចខ្លួនរួច ក្រោយពេលធ្វើសកម្មភាពឆក់ខ្សែ.កពីស្ត្រីម្នាក់តាមផ្លូវ ស្ថិតក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង១រសៀល ថ្ងៃទី៣០ ខែវិច្ឆិកា ឆ្នាំ២០២២ ។
ជនសង្ស័យខាងលើមានឈ្មោះ ប៉ុក រតនា ហៅវាសនា អាយុ១៧ឆ្នាំ ជាសិស្សរៀនថ្នាក់ទី៩ នៃវិទ្យាល័យភ្នំពេញថ្មី មានទីលំនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។ ចំណែកស្ត្រីរងគ្រោះឈ្មោះ អៀន ផល្លី អាយុ៤០ឆ្នាំ មុខរបរកម្មការិនីរោងចក្រទឹកកក ស្ថិតនៅក្បែរកន្លែងកើតហេតុ និងមានមានស្រុកកំណើតនៅភូមិទួលតារី ឃុំជ្រេស ស្រុកមេសាង ខេត្តព្រៃវែង ហើយខ្សែ.ករបស់គាត់ដែលត្រូវជនសង្ស័យឆក់នោះ គឺប្លាទីនទម្ងន់៤ជី ប៉ុន្តែត្រូវជនសង្ស័យឆក់យកបានតែបន្តោងប៉ុណ្ណោះ ហើយក៏ត្រូវជនសង្ស័យដែលឆក់បានបន្ដោងរត់គេចខ្លួនយកទៅបាត់។
ស្ត្រីរងគ្រោះបាននិយាយថា នៅមុនពេលកើតហេតុ គាត់បានជិះម៉ូតូម៉ាកហុងដាឌ្រីម សេ១២៥ ពណ៌ខ្មៅ១គ្រឿង ពាក់ស្លាកលេខ កំពង់ធំ 1I-8905 តាមផ្លូវបេតុងខាងលើ ក្នុងទិសដៅពីលិចទៅកើត ដើម្បីទៅរកទិញម្ហូប។ លុះពេលទៅដល់ត្រង់ចំណុចកើតហេតុ ក៏បានឃើញជនសង្ស័យរូបនោះ ជិះម៉ូតូម៉ាកហុងដាស្កូបពី ១គ្រឿង ពណ៌ស ពាក់ស្លាកលេខ ភ្នំពេញ 1JJ-0540 ក្នុងទិសដៅបញ្ច្រាស់ទិសគ្នាពីកើតទៅលិច ដោយមានបក្សពួក២នាក់ទៀតជិះម៉ូតូម៉ាកហុងដាឌ្រីមសេ១២៥ មួយគ្រឿង ឌុបគ្នាផ្សេងទៀត។
ជនរងគ្រោះបានប្រាប់ឲ្យដឹងបន្តទៀតថា លុះពេលជិះហួសបន្តិច ជនសង្ស័យក៏បត់ត្រឡប់ក្រោយវិញ រួចឆក់យកខ្សែ.កប្លាទីនទម្ងន់៤ជី តែត្រូវគាត់ស្រវ៉ាចាប់បានខ្សែមកវិញ ចំណែកជនសង្ស័យយកបានបន្តោង១ប៉ុណ្ណោះ។ បន្ទាប់មកជនសង្ស័យបាននាំគ្នាជិះម៉ូតូរត់គេចខ្លួន ហើយគាត់បានស្រែកឆោឡោបង្កឲ្យមានការភ្ញាក់ផ្អើល ទើបកម្លាំងនគរបាលប៉ុស្តិ៍កាកាបទី២និងប្រជាការពារភូមិ តាមស្ទាក់ចាប់បានម្នាក់ រីឯបក្សពួក២នាក់ទៀតគេចខ្លួនបាត់ស្រមោល។
នើតាមនគរបាលបានប្រាប់ថា ក្រោយពេលចាប់ខ្លួនជនសង្ស័យ កម្លាំងដកហូតបានម៉ូតូម៉ាកហុងដាស្កូបពី១គ្រឿង ពណ៌ស ពាក់ស្លាកលេខ ភ្នំពេញ 1JJ-0540 ដែលជាមធ្យោបាយជនសង្ស័យជិះធ្វើសកម្មភាពឆក់ បន្ទាប់មកក៏បាននាំទៅសាកសួរ ដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ