ប៉ូឡូញដឹកដៃអាហ្សង់ទីន ឡើងវគ្គបន្តទាំងបុកពោះ ខណៈម៉ិកស៊ិកធ្លាក់ទាំងឈឺចាប់បំផុត
កាតា ៖ ព្រឹត្តិការណ៍ World Cup 2022 នៅប្រទេសកាតា បានរកឃើញ៤ក្រុមបន្ថែមទៀតហើយ
កាតា ៖ ព្រឹត្តិការណ៍ World Cup 2022 នៅប្រទេសកាតា បានរកឃើញ៤ក្រុមបន្ថែមទៀតហើយ ចេញពីពូល C និង D ដែលត្រូវឡើងទៅតទល់គ្នានៅវគ្គ១៦ក្រុមចុងក្រោយ បន្ទាប់ពីបញ្ចប់ការប្រកួតជុំទី៣ ដែលជាការប្រកួតចុងក្រោយសម្រាប់វគ្គជម្រុះក្នុងពូល កាលពីថ្ងៃទី៣០ ខែវិច្ឆិកា ឆ្នាំ២០២២ កន្លងទៅ។
នៅក្នុងពូល C បានក្លាយជាពូលមានការប្រកួតប្រជែងដ៏ខ្លាំងក្លាបំផុត ហើយបើទោះបីជាមានម្ខាងចាញ់ ម្ខាងឈ្នះ ក៏ដោយ ក៏អាហ្សង់ទីន និងប៉ូឡូញ បានដឹកដៃគ្នាបន្តឡើងទៅវគ្គ១៦ក្រុមចុងក្រោយ។
ការប្រកួតដែលធ្វើឡើងនៅឯកីឡដ្ឋាន Stadium 974 ក្រុមមេឃខៀវ អាហ្សង់ទីន បានយកឈ្នះលើក្រុមឥន្ទ្រីស ប៉ូឡូញ ដោយលទ្ធផល ២-០ ដែលជ័យជម្នះនេះ រកបានដោយប្រធានក្រុម Lionel Messi និងខ្សែបម្រើ Enzo Fernández ។
ការបានឡើងទៅវគ្គ១៦ក្រុម ប៉ូឡូញ ត្រូវអរគុណក្រុមស្ទាំងបៃតង អារ៉ាប៊ីសាអូឌីត ដែលបញ្ឈប់ដំណើរក្រុមទ័ពបីពណ៌ ម៉ិកស៊ិក តាមរយៈការស៊ុតបញ្ចូលទី១គ្រាប់ នៅម៉ោងបន្ថែមវគ្គទី២ បើទោះជាពួកគេចាញ់ក្នុងលទ្ធផល ២-១ យ៉ាងណាក៏ដោយ ក៏ប៉ូឡូញ គឺជាអ្នកឡើងទៅវគ្គបន្ទាប់ ព្រោះឈ្នះគ្រាប់បាល់ចំណេញលើម៉ិកស៊ិក។
ការធ្លាក់ចេញពី World Cup 2022 គឺជាការខកចិត្តយ៉ាងខ្លាំងជាទីបំផុត សម្រាប់ប្រជាជាតិម៉ិកស៊ិក ហើយក៏ជាការធ្លាក់ចេញត្រឹមវគ្គជម្រុះក្នុងពូលជាលើកដំបូងរបស់ពួកគេ ចាប់តាំងពីឆ្នាំ ១៩៩៤។
ដោយឡែក ពូល D ក្រុមមាន់គក បារាំង រួមដំណើរជាមួយនឹងក្រុមកង់ហ្គូរូ អូស្ត្រាលី ឡើងទៅវគ្គ១៦ក្រុម ដោយមាន៦ពិន្ទុដូចគ្នា។ បារាំង ដែលជាក្រុមដំបូងគេនៅ World Cup 2022 ដែលកក់កៅអីវគ្គ១៦ក្រុម បានភ្លាត់ចាញ់ក្រុមឥន្ទ្រីដែនឧត្តរ ទុយនេស៊ី នៅការប្រកួតជុំទី៣ ដោយលទ្ធផល ១-០ ស្របពេលអូស្ត្រាលី បានយកឈ្នះទាំងលំបាកលើក្រុមទ័ពរំសេវ ដាណឺម៉ាក ដោយលទ្ធផល ១-០ ផងដែរ។
រហូតមកទល់ពេលនេះ ក្រុមចំនួន១០ហើយ បានកក់កៅអីវគ្គ១៦ក្រុមចុងក្រោយ រួមមាន ៖ បារាំង ប្រេស៊ីល ព័រទុយហ្គាល់ ហូឡង់ អង់គ្លេស អាហ្សង់ទីន សេណេហ្គាល់ សហរដ្ឋអាមេរិក ប៉ូឡូញ និង អូស្ត្រាលី។
ខាងក្រោមនេះ ជាក្រុមដែលត្រូវប៉ះគ្នា នៅវគ្គ១៦ក្រុមចុងក្រោយ រួមមាន ៖
-នៅថ្ងៃទី០៣ ខែធ្នូ ៖ ហូឡង់ ក្រុមកំពូលតារាងពូល A ត្រូវប៉ះ សហរដ្ឋអាមេរិក ក្រុមចំណាត់ថ្នាក់លេខ២ ពូល B វេលាម៉ោង ១០:០០នាទីយប់ (ម៉ោងនៅកម្ពុជា)
-នៅថ្ងៃទី០៣ ខែធ្នូ ៖ អាហ្សង់ទីន ក្រុមកំពូលតារាងពូល C ត្រូវប៉ះ អូស្ត្រាលី ក្រុមចំណាត់ថ្នាក់លេខ២
ពូល D វេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០៤ ខែធ្នូ
-នៅថ្ងៃទី០៤ ខែធ្នូ ៖ ក្រុមការពារតំណែងជើងឯក បារាំង ក្រុមកំពូលតារាងពូល D ត្រូវប៉ះ ប៉ូឡូញ ក្រុមចំណាត់ថ្នាក់លេខ២ ពូល C វេលាម៉ោង ១០:០០នាទីយប់
-នៅថ្ងៃទី០៤ ខែធ្នូ ៖ អង់គ្លេស ក្រុមកំពូលតារាងពូល B ត្រូវប៉ះ សេណេហ្គាល់ ក្រុមចំណាត់ថ្នាក់លេខ២
ពូល A វេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០៥ ខែធ្នូ។
ដោយឡែក ខាងក្រោមនេះ គឺជាការប្រកួតនៅក្នុងថ្ងៃទី០១ ខែធ្នូ ឆ្នាំ២០២២ ដែលជាការប្រកួតជុំទី៣ រួមមាន
ពូល F លេងនៅវេលាម៉ោង ១០:០០នាទីយប់ ៖
-ក្រូអាត ត្រូវប៉ះ បែលហ្ស៊ិក
-កាណាដា ត្រូវប៉ះ ម៉ារ៉ុក
ពូល C នៅវេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០២ ខែធ្នូ ៖
-ជប៉ុន ត្រូវប៉ះ អេស្ប៉ាញ
-កូស្តារីកា ត្រូវប៉ះ អាល្លឺម៉ង់៕ (ដកស្រង់ចេញពី FIFA)
ចែករំលែកព័តមាននេះ