ខេត្តបាត់ដំបង ៖ បុរសម្នាក់រពឹសដៃយកឌុយដោតហ្វ្រីភ្លើងខុសបច្ចេកទេស បណ្ដាលឲ្យទុស្សេក្លាយជាអណ្ដាតភ្លើងឆាបឆេះដល់ដបសាំងដែលនៅក្បែរ រហូតឆាបឆេះទាំងខ្លួនឯងរលាកពេញខ្លួនទៀត កាលពីវេលាម៉ោង៥ល្ងាចថ្ងៃទី ២៨ វិច្ឆិកា នៅចំណុចភូមិតាង៉ែន ឃុំតាគ្រាម ស្រុក
បាណន់។
សេចក្ដីរាយការណ៍បានឲ្យដឹងថា បុរសរងគ្រោះឈ្មោះ ស៊ន សូ អាយុ៣៩ឆ្នាំ រស់នៅចំណុចកើតហេតុ។ បុរសនេះ បានរងរបួសលាកពេញរាងកាយ ដោយសារអណ្ដាតភ្លើងដែលផ្ដើមចេញពីការ
ទុស្សេហ្វ្រីដោតភ្លើង ហើយរាលដាលឆេះដល់ដបសាំងដែលនៅក្បែរនោះ ក៏បង្កជាអគ្គិភ័យតែម្ដង តែសំណាងល្អមិនឆេះផ្ទះ ។ នាយប៉ុស្តិ៍រដ្ឋបាល ឃុំតាគ្រាម លោក ទេស ប៊ុនធឿន បានប្រាប់កោះសន្តិភាពថា ជនរងគ្រោះជាមនុស្សប្រើប្រាស់គ្រឿងញៀនផង ។
ជននេះបានយកឌុយតចូលហ្វ្រីភ្លើង តែមិនដឹងយ៉ាងម៉េច ស្រាប់តែទុស្សេបង្កជាអណ្ដាតភ្លើងឆាបឆេះដល់ដបសាំងដែលនៅក្បែរនោះ រួចឆេះទាំងខ្លួនឯងទៀត បណ្ដាលឲ្យរងរបួសធ្ងន់។ បើតាមក្រុមគ្រួសារថា មុនពេលកើតហេតុ ឈ្មោះ ស៊ន សូ បានទិញសាំងមួយដបបំរុងចាសក់ម៉ូតូ តែមិនទាន់បានចាក់ក៏ទុកក្បែរនោះសិន។
ប្រភពដដែលបញ្ជាក់ថា ពេលនោះ ស៊ន សូ បានតហ្វ្រីភ្លើង តែតខុសបច្ចេកទេស បណ្ដាលឲ្យ
ទុស្សេបែកផ្កាភ្លើង ខណៈដបសាំងនៅក្បែរនោះក៏ឆាបឆេះសាំងសន្ធោរសន្ធៅមួយរំពេច ហើយឆេះដោយទាំងខ្លួនឯងរលាកពេញខ្លួនទៀតផង។
ប៉ុន្តែសំណាងល្អ គេចេះនាំគ្នាជួយពន្លត់ទាន់ពេល បើមិនដូច្នេះទេ អគ្គិភ័យអាចនឹងឆេះដោយទាំងផ្ទះទៀតអស់គ្មានសល់ទេ។ លោក ទេស ប៊ុនធឿន មេប៉ុស្តិ៍តាគ្រាម បានបញ្ជាក់ថា ជនរងគ្រោះស្ថិតក្នុងស្ថានភាពរងរបួសធ្ងន់ធ្ងរ ហើយត្រូវក្រុមគ្រួសារដឹកទៅកាន់មន្ទីរពេទ្យភ្លាមៗដែរ ក្រោយពេលកើតហេតុ។ ពេលនេះជនរងគ្រោះកំពុងស្ថិតនៅមន្ទីរពេទ្យនៅឡើយទេ។
ចែករំលែកព័តមាននេះ