សោកស្តាយ! បន្តរកឃើញក្រុមហាលអាវពី World Cup 2022 បន្ទាប់ពីម្ចាស់ផ្ទះកាតា
កាតា ៖ ក្រុមជម្រើសជាតិកាណាដា បានក្លាយជាក្រុមទី២ បន្ទាប់ពីម្ចាស់ផ្ទះកាតា ដែលហាលអាវពី
កាតា ៖ ក្រុមជម្រើសជាតិកាណាដា បានក្លាយជាក្រុមទី២ បន្ទាប់ពីម្ចាស់ផ្ទះកាតា ដែលហាលអាវពី
កាតា ៖ ក្រុមជម្រើសជាតិកាណាដា បានក្លាយជាក្រុមទី២ បន្ទាប់ពីម្ចាស់ផ្ទះកាតា ដែលហាលអាវពីព្រឹត្តិការណ៍ FIFA World Cup 2022 នៅត្រឹមការប្រកួតវគ្គជម្រុះក្នុងពូលជុំទី២ ដោយគ្មានពិន្ទុរាប់ បើទោះបីជាពួកគេបានបង្កើតប្រវត្តិសាស្ត្រសម្រាប់ខ្លួនឯងនៅព្រឹត្តិការណ៍លំដាប់ពិភពលោកមួយនេះ យ៉ាងណាក៏ដោយ។ គួររំលឹកថា អាហ្សង់ទីនបន្តសង្ឃឹមនៅ World Cup ខណៈបារាំងក្រុមដំបូងឡើងទៅវគ្គបន្តដោយស្វ័យប្រវត្តិ
កាណាដា រងបរាជ័យយ៉ាងចាស់ដៃក្រោមថ្វីជើងក្រុមអណ្តាតភ្លើងក្រូអាត ដោយលទ្ធផល ៤-១ នៅឯកីឡដ្ឋាន Khalifa International កាលពីថ្ងៃទី២៧ ខែវិច្ឆិកា កន្លងទៅ ដែលជាការប្រកួតជុំទី២ ក្នុងពូល F។ កាណាដាបើកការនាំមុខមុនតាំងពីនាទី២ ដោយក្លាយជាគ្រាប់បាល់លឿនបំផុតនៅ World Cup 2022 ដែលសម្រេចបានដោយខ្សែបម្រើស្លាប Alphonso Davies ហើយក៏ជាគ្រាប់បាល់លើកដំបូងបំផុតរបស់ក្រុមបាល់ទាត់បុរសកាណាដាក្នុងប្រវត្តិសាស្ត្រ World Cup ផងដែរ។
ទោះយ៉ាងណា អ្វីៗបានចប់សព្វគ្រប់ នៅពេលក្រូអាតបានវាយបកយកឈ្នះរហូតដល់ទៅ៤គ្រាប់ ដែលសម្រេចបានដោយកីឡាករ Andrej Kramarić ២គ្រាប់ម្នាក់ឯង ហើយនឹងកីឡាករ Marko Livaja និង Lovro Majer ម្នាក់១គ្រាប់។
នៅក្នុងពូល F មានការប្រកួតប្រជែងកាន់តែខ្លាំង ដោយត្រូវរង់ចាំអ៊ុតលទ្ធផលនៅការប្រកួតជុំទី៣ ដែលជាការប្រកួតចុងក្រោយ។ បន្ទាប់ពីក្រូអាតឈរកំពូលតារាងមាន៤ពិន្ទុស្មើគ្នាជាមួយម៉ារ៉ុក ដែលបានយកឈ្នះលើបែលហ្ស៊ិក ដែលមាន៣ពិន្ទុ នៅឯកីឡដ្ឋាន Al Thumama ដោយលទ្ធផល ២-០។
ក្រឡេកទៅកាន់ការប្រកួតនៅក្នុងពូល E ក៏មានការប្រកួតប្រជែងគ្នាយ៉ាងខ្លាំងផងដែរ ដោយត្រូវរង់ចាំអ៊ុតលទ្ធផលនៅការប្រកួតជុំទី៣។ ដោយនៅក្នុងថ្ងៃជាមួយគ្នានោះ ក្រុមសាំម៉ូរ៉ៃជប៉ុន ដែលបង្កភាពភ្ញាក់ផ្អើលបំផុតនៅ World Cup 2022 កាលពីការប្រកួតជុំទី១ តាមរយៈការយកឈ្នះលើក្រុមឥន្ទ្រីដែកអាល្លឺម៉ង់នោះ បែរជាភ្លាត់ចាញ់ក្រុមកូស្តារីកា ដោយលទ្ធផល ១-០ នៅឯកីឡដ្ឋាន Ahmad bin Ali ទៅវិញ។ ខណៈដែលក្រុមរហស្សនាម «ទាហានមរណៈ» មួយនេះ កាលពីការប្រកួតជុំទី១ ត្រូវបានក្រុមគោជល់អេស្ប៉ាញលុតយ៉ាងចាស់ដៃ ដោយលទ្ធផល ៧-០។
នៅក្នុងពូលនេះ អេស្ប៉ាញកំពុងកាន់កាន់កំពូលតារាងដោយមាន៤ពិន្ទុ បន្ទាប់ពីបានត្រឹមស្មើគ្នា ១-១ ទល់នឹងក្រុមអាល្លឺម៉ង់។ ជប៉ុនឈរនៅលេខ២ មាន៣ពិន្ទុស្មើគ្នាជាមួយកូស្តារីកា ដែលឈរនៅលេខ៣ ចំណែកឯជើងខ្លាំងអាល្លឺម៉ង់ ក្នុងនាមជាក្រុមឈ្នះជើងឯក World Cup ច្រើនលំដាប់ទី២ក្នុងប្រវត្តិសាស្ត្រ ពោលគឺចំនួន៤សម័យកាល បន្ទាប់ពីប្រេស៊ីល ដែលឈ្នះច្រើនជាងគេបំផុត៥សម័យកាលនោះ បែរជាឈរនៅបាតតារាងដោយមានត្រឹម១ពិន្ទុប៉ុណ្ណោះ។
ជប៉ុន ត្រូវបានគេមើលឃើញថា នឹងជួបការលំបាក ដើម្បីអាចឡើងទៅកាន់វគ្គបន្ត ដោយសារប្រកួតបន្ទាប់ពួកគេត្រូវប៉ះអេស្ប៉ាញ ខណៈអាល្លឺម៉ង់ដែលនៅបាតតារាង ហាក់មានទឹកមាត់លេបច្រើនជាងបន្តិច ដោយសារពួកគេត្រូវប៉ះកូស្តារីកា នៅការប្រកួតចុងក្រោយ ដើម្បីកាត់សេចក្តីរក២ក្រុមឡើងទៅវគ្គ១៦ក្រុមចុងក្រោយ។
គិតរហូតមកទល់នេះ មានតែក្រុមមាន់គកបារាំងប៉ុណ្ណោះ ដែលបានកក់កៅអីវគ្គ១៦ក្រុមចុងក្រោយដោយស្វ័យប្រវត្តិ ត្រឹមការប្រកួតជុំទី២ បន្ទាប់ពីបានយកឈ្នះទាំង២ប្រកួត មាន៦ពិន្ទុពេញឈរកំពូលតារាងពូល D តាមពីក្រោយដោយក្រុមត្រូវប្រកួតប្រជែងសម្រាប់ការប្រកួតជុំទី៣ រួមមាន អូស្ត្រាលីមាន៣ពិន្ទុ និងដាណឺម៉ាក និងទុយនេស៊ី ដែលមាន១ពិន្ទុដូចគ្នា។
ដោយឡែក ការប្រកួតនៅក្នុងថ្ងៃទី២៨ ខែវិច្ឆិកា ឆ្នាំ២០២២ នេះវិញ រួមមាន
-ពូល G ៖ កាមេរូន ត្រូវប៉ះ ស៊ែប វេលាម៉ោង ០៥:០០នាទីល្ងាច (ម៉ោងនៅកម្ពុជា)
-ពូល H ៖ កូរ៉េខាងត្បូង ត្រូវប៉ះ ហ្គាណា វេលាម៉ោង ០៨:០០នាទីយប់
-ពូល G ៖ ប្រេស៊ីល ត្រូវប៉ះ ស្វីស វេលាម៉ោង ១១:០០នាទីយប់
-ពូល H ៖ ព័រទុយហ្គាល់ ត្រូវប៉ះ អ៊ុយរ៉ូហ្គាយ វេលាម៉ោង ០២:០០នាទីរំលងអាធ្រាត្រឈានចូលថ្ងៃទី២៩ ខែវិច្ឆិកា ឆ្នាំ២០២២៕
ចែករំលែកព័តមាននេះ