រាជធានីភ្នំពេញ ៖ កម្លាំងសមត្ថកិច្ចឃាត់ខ្លួនស្ត្រីម្នាក់ បន្ទាប់ពីមកទារលុយកូនបំណុលដែលជំពាក់ បែរជាទាស់ពាក្យសម្តីគ្នា ដែលជាហេតុធ្វើឲ្យស្ត្រីម្ចាស់លុយខឹងបានយកដុំថ្មគប់ទៅលើរថយន្ត បណ្ដាលឲ្យបែកកញ្ចក់ និងក្រពឹតទ្វាររថយន្ត២គ្រឿង ។ ហេតុការណ៍នេះ កើតឡើងកាលពីវេលាម៉ោង១៤និង៣០នាទី ថ្ងៃទី២០ ខែវិច្ឆិកា ឆ្នាំ២០២២ នៅចំណុចមុខផ្ទះ លេខ១៨៦ ផ្លូវ២F ភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
សមត្ថកិច្ចបានឲ្យដឹងថា ជនរងគ្រោះជាកូនបំណុលឈ្មោះ ដួង អក្ខរា ភេទប្រុស អាយុ៤១ឆ្នាំ ជាអាជីវករ ស្នាក់នៅផ្ទះកើតហេតុ។ ចំណែកជនសង្ស័យឈ្មោះ ហុង សុកដ្ឋា ភេទស្រី អាយុ២៥ឆ្នាំ ជាអ្នកលក់ដូរ ស្នាក់នៅភូមិវាលស្បូវ សង្កាត់វាលស្បូវ ខណ្ឌច្បារអំពៅ ។
ប្រភពពីសមត្ថកិច្ចដដែលបានបន្តថា មុនពេលកើតហេតុ ជនរងគ្រោះបានខ្ចីប្រាក់ជនសង្ស័យ១,៥០០ដុល្លារ ដើម្បីយកទៅរកស៊ីដោយសន្យាសងជនសង្ស័យទាំងដើមទាំងការ សរុប២,១០០ដុល្លារ តែជនរងគ្រោះពុំបានសងប្រាក់ទៅជនសង្ស័យវិញទេ ។
លុះដល់ថ្ងៃទី២០ វិច្ឆិកា ២០២២ វេលាម៉ោង១៤និង៣០នាទី ជនសង្ស័យបានទៅផ្ទះជនរងគ្រោះ ដើម្បីទារប្រាក់ដែលជនរងគ្រោះជំពាក់ខាងលើ ពេលនោះក៏ទាស់ពាក្យសម្តីគ្នា រួចជនសង្ស័យក៏យកដុំថ្មគប់ទៅលើរថយន្តម៉ាក Toyota Land Cruiser ពណ៌ខ្មៅ គ្មានស្លាកលេខបែកកញ្ចក់ខាងក្រោយ, ក្រពឹតទ្វារក្រោយខាងឆ្វេង ហើយគប់រថយន្តជនរងគ្រោះ០១គ្រឿងទៀត ម៉ាក Toyota Pruis ពណ៌ទឹកមាស ផ្លាកលេខ ភ្នំពេញ 2AJ-5584 បណ្តាលឲ្យក្រពឹតទ្វារមុខ-ក្រាយខាងស្តាំ ពេលនោះជនរងគ្រោះក៏រាយការណ៍ប្រាប់សមត្ថកិច្ចចុះទៅឃាត់ខ្លួនជនសង្ស័យតែម្តង។
ក្រោយពេលកើតហេតុ សមត្ថកិច្ចជំនាញបានឃាត់ខ្លួនជនសង្ស័យ យកមកអធិការដ្ឋាននគរបាលខណ្ឌច្បារអំពៅ ដើម្បីធ្វើការសួរនាំ និងដោះស្រាយតាមនីតិវិធី៕ ដោយ៖ រដ្ឋា
ចែករំលែកព័តមាននេះ