អត្តពលិកល្បីឈ្មោះ4រូបកំពុងឡើងកូដក្នុងអាជីពភាពយន្ត
រាជធានីភ្នំពេញ ៖ ក្នុងចំណោមអត្តពលិកល្បីៗក្នុងប្រទេស គេកត់សម្គាល់ថា អត្តពលិក៤រូបបានក្លាយជាតារាសម្ដែងល្បីឈ្មោះ ខណៈការសម្ដែងរបស់ពួកគេត្រូវបានមហាជនទទួលស្គាល់
រាជធានីភ្នំពេញ ៖ ក្នុងចំណោមអត្តពលិកល្បីៗក្នុងប្រទេស គេកត់សម្គាល់ថា អត្តពលិក៤រូបបានក្លាយជាតារាសម្ដែងល្បីឈ្មោះ ខណៈការសម្ដែងរបស់ពួកគេត្រូវបានមហាជនទទួលស្គាល់សមត្ថភាពមិនអន់ជាងស្នាដៃក្នុងវិស័យកីឡានោះផង ។ ក្រៅពីនោះ ក៏មានអត្តពលិកផ្សេងទៀតបានក្លាយជាតារាសម្ដែងផងដែរ ដោយគ្រាន់តែ
អ្នកខ្លះបានបោះបង់ការសម្ដែង ឬលែងមានទីផ្សារ បើធៀបនឹងអត្តពលិកទាំង៤រូបនាពេលចុងក្រោយ គឺកន្ត្រាក់បានទីផ្សារសម្ដែងច្រើនជាងគេ ។
ប្រាក់ មុន្នីឧត្តម ៖ គឺជាកីឡាករល្បីឈ្មោះក្នុងពិភពបាល់ទាត់ បានក្លាយជាតារាសម្ដែងក្នុងតំណែងជាតួឯករឿង«មេកប់ស៊េរី»តែម្ដង។ ក្រោយបានសម្ដែងរឿងនេះ លោកទទួលបានការទាក់ទងឱ្យសម្ដែងរឿងបន្តបន្ទាប់ពីសំណាក់ក្រុមផលិតករក្នុងស្រុក រហូតដល់ថ្នាក់ប្រកាសមិនទទួលថតវិញដើម្បីកុំឱ្យប៉ះពាល់ដល់ការហ្វឹកហាត់បាល់ទាត់ប្រចាំថ្ងៃ ។ លោកថា ការសម្ដែងមួយរឿងបានធ្វើឱ្យលោកទទួលបានក្រេឌីតហួសពីការស្មាន ហើយឱកាសថតស្ពតក៏មានជាហូរហែផងដែរ ដោយម្ចាស់ក្រុមហ៊ុនទាំងនោះបានអះអាងថា លោកអាចក្លាយជាតារាសម្ដែងបានមិនអន់ជាងតារាសម្ដែងអាជីពនោះទេ ។ យ៉ាងណាក៏ដោយលោកថា មិនហ៊ានឈោងចាប់យកអាជីពសម្ដែងទេ ដោយសារតែការសម្ដែងរឿងមិនមែនជាចំណូលចិត្ត ហើយអ្វីដែលលោកពិបាកទទួលគឺការសម្ដែងមួយរឿងៗប៉ះពាល់យ៉ាងខ្លាំងដល់ការហ្វឹកហាត់បាល់ទាត់របស់លោក ។ លោកបានសម្រេចផ្អាកទទួលថតភាពយន្ត តែមិនមានន័យថាលោកបោះបង់ការសម្ដែងរឿងនោះទេ ដោយសារតែការសាកល្បងមួយរឿងក្នុងរឿង «មេកប់ស៊េរី » ក៏ធ្វើឱ្យលោកល្បីឈ្មោះ ។ លោកអាចនឹងទទួលយកការងារសម្ដែងជាលើកទី២ប្រសិនបើការហ្វឹកហាត់បាល់ទាត់មានភាពរយាលបន្តិច ជាពិសេសពេលការប្រកួតបាល់ទាត់ធំៗត្រូវបានបញ្ចប់ ។ លោកថា ពេលទំនេរសម្រាប់ការសម្ដែងភាពយន្តមិនដឹងថាមានជាថ្មីពេលណានោះទេ ក្នុងពេលដែលលោកនៅស៊ប់នឹងអាជីពបាល់ទាត់ដូចសព្វថ្ងៃ ។ លោកថា ផលិតករច្រើននាក់ទាក់ទងឱ្យលោកសម្ដែង តែលោកទទួលយកមិនបានដោយសារតែករណីដូចរៀបរាប់ខាងលើនេះឯង ។
សុវណ្ណ គីរី ៖ ជាកីឡាករនិងគ្រូការ៉ាតេដូដែលឈ្នះមេដាយក៏ក្លាយជាតារាសម្ដែងមានឈ្មោះបោះសំឡេងណាស់ដែរ តាមរយៈការសម្ដែងជាតួវាយតប់ និងក្រមិចក្រមើមរាប់មិនអស់ ។ បើទោះមិនមានឱកាសបានសម្ដែងជាតួឯក ក៏កីឡាករជម្រើសជាតិ និងជាគ្រូការ៉ាតេដូរូបនេះ បានក្លាយខ្លួនជាតារាសម្ដែងយ៉ាងមានមុខមាត់ ។ លោកត្រូវគេកត់សម្គាល់ថាបានក្លាយជាតារាសម្ដែងដែលមានទីផ្សារខ្ពស់ជាងកីឡាករផ្សេងទៀតដែលបានក្លាយខ្លួនជាតារាសម្ដែងអាជីព ។ តម្លៃខ្លួនរបស់លោកនៅក្នុងពិភពសិល្បៈ ក៏បានឈានឡើងមិនចាញ់តារាល្បីៗផងដែរនាពេលចុងក្រោយ ជាពិសេសបន្ទាប់ពីលោកបានក្លាយជាពិធីកររបស់ទូរទស្សន៍បាយ័នកាលពីមួយរយៈមុន ។ លោកមានឈ្មោះល្បីល្បាញតាមរយៈភាពយន្តរឿង«ភូមិខ្ញុំស្រស់ឆើតឆាយ» និងរឿងជាច្រើនទៀតដែលលោកបានសម្ដែងជាតួលេចធ្លោនៅក្នុងភាពយន្ត ។ យ៉ាងណាមិញ លោកបានប្រកាសថា មិនចោលអាជីពកីឡានោះទេ ទើបក្នុងតារាងកីឡាករល្បីឈ្មោះដែលមានទីផ្សារសម្រាប់ការសម្ដែងគឺលោកមានឈ្មោះក្នុងបញ្ជីតែម្ដង បើធៀបនឹងកីឡាករផ្សេងទៀតដែលសម្ដែងបានមួយខ្យល់ហើយក៏បោះបង់កីឡា លុះដល់វិស័យកីឡាធ្លាក់ចុះក៏បាត់ទាំងអាជីពដើមតែម្ដង ។
សម ថារ័ត្ន ៖ នៅក្នុងវិស័យកីឡាល្បុក្កតោ កីឡាការិនីរូបនេះនៅតែជាតួអង្គសំខាន់ បើទោះជានាងត្រូវគេឃើញទទួលយកការសម្ដែងសឹងតែរកពេលទំនេរគ្មាន ។ នាងនៅតែបង្ហាញមុខហ្វឹកហាត់ និងចេញមុខតំណាងកម្ពុជាសម្រាប់ការប្រកួតល្បុក្កតោសំខាន់ៗ និងតំណាងកម្ពុជាទៅប្រកួតប្រដាល់ដាក់ទ្រុងនៅពេលមានការប្រកួតធំៗមកដល់ ។ នាងថា ហេតុផលដែលនាងមមាញឹកខ្លាំងនឹងការសម្ដែង គឺដោយសារតែខាងសហព័ន្ធល្បុក្កតោមិនមានកម្មវិធីឱ្យនាងចេញមុខប៉ុណ្ណោះប៉ុន្តែបើមានការប្រកួតគឺនាងសុខចិត្តចោលការសម្ដែងដោយមិនឱ្យបាត់មុខទេ ។ នាងបង្ហើបថា សម្រាប់ការប្រកួតដែលមិនចាំបាច់ នាងក៏ផ្ដល់ឱកាសឱ្យកីឡាករ-កីឡាការិនីផ្សេងទៀតចេញមុខជំនួសក្រោយពេលនាងបានក្លាយជាតួសម្ដែង ។ នាងត្រូវបានគេស្គាល់ខ្លាំងតាមរយៈរឿង«មុនដំបូងគេសម្លាប់ឪពុករបស់ខ្ញុំ» រឿង«Jailbreak ការពារឧក្រិដ្ឋជន» និងរឿងជាច្រើនទៀតដែលបានបញ្ចាំងនៅតាមរោងភាពយន្ត ។
លី វ៉ាហេទ ៖ គឺជាសមាសភាពកីឡាករបាល់ទាត់ល្បីឈ្មោះថ្មី ដែលបានជាប់ឈ្មោះជាតារាសម្ដែងមានទីផ្សារបន្ទាប់ពីរឿង«ខូចចិត្តអាជីព»ដែលលោកសម្តែងជាតួឯកត្រូវបានបើកសម្ពោធកាលពីថ្ងៃទី៩ ឧសភា ។ លោកត្រូវគេឃើញទាក់ទាញអ្នកគាំទ្រតែម្ដង ដោយសារតែលោកក៏មានព័ត៌មានថា ជាគូសេ្នហ៍ថ្មីរបស់អ្នកនាងសុខ សោម៉ាវត្តី នៅក្រៅឆាកសម្ដែង។កីឡាករជម្រើសជាតិដែលលេងឱ្យក្រុមបឹងកេតរូបនេះ មានទេពកោសល្យសម្ដែងល្អគួរឱ្យសរសើរ ទើបខាងផលិតករគ្រាន់តែឃើញខ្សែរឿងបើកឆាករបស់លោក ក៏បានប្រកាសអញ្ជើញឱ្យលោកទទួលយកការសម្ដែងបន្តបន្ទាប់ ប៉ុន្តែលោកមិនទាន់ហ៊ានទទួលទេដើម្បីកុំឱ្យប៉ះពាល់ដល់ការហ្វឹកហាត់បាល់ទាត់ ។ លោកថា ការសម្ដែងគឺជាចំណូលចិត្តតែបើឱ្យទទួលយកហើយចោលបាល់ទាត់លោកមិនធ្វើទេ ដោយសារតែបាល់ទាត់អាចជាឆ្នាំងបាយ និងជាអ្វីដែលលោកស្រឡាញ់ជាង ។ លោកនិយាយថា ខ្លួនសម្ដែងបានល្អក៏ដោយសារតែបានរៀមច្បង និងក្រុមផលិតករបង្ហាត់បង្ហាញផងដែរ បើតាមតែលោកគឺមិនសូវដឹងថាភាពយន្តត្រូវសម្ដែងយ៉ាងណានោះទេ ។ លោកសប្បាយចិត្តដែលការសម្ដែងមួយរឿង«ខូចចិត្តអាជីព»បានជួយឱ្យលោកលេចធ្លោ ហើយមានអ្នកនិយាយច្រើនពីការសម្ដែងរបស់លោកនៅក្នុងវិស័យភាពយន្ត ៕
ចែករំលែកព័តមាននេះ