ខេត្តបាត់ដំបង៖ កាលពីថ្ងៃព្រហស្បតិ៍ ទី១៧ ខែវិច្ឆិកា ឆ្នាំ២០២២ ក្រុមការងារចម្រុះ ដឹកនាំដោយ​ក្រសួងកសិកម្ម រុក្ខាប្រមាញ់ និងនេសាទ បានជួបប្រជុំ​ជាមួយភាគីពាក់ព័ន្ធ រួមមាន លោកឧកញ៉ា ភូ ពុយ អគ្គនាយកនៃរោង​ម៉ាស៊ីនកិនស្រូវបៃតង ​តំណាងមន្ទីរកសិកម្ម រុក្ខាប្រមាញ់ និងនេសាទ តំណាងមន្ទីរពាណិជ្ជកម្ម តំណាងធនាគារអភិវឌ្ឍន៍កសិកម្ម និងជនបទ ព្រមទាំងអភិបាលស្រុក មេឃុំ​ តំណាង​រោងម៉ាស៊ីនកិនស្រូវ និងអ្នកប្រមូលទិញស្រូវផ្គត់ផ្គង់ ទៅរោងម៉ាស៊ីនកិនស្រូវ។

ជាលទ្ធផល ក្រោយកិច្ចប្រជុំ ដើម្បីធានាស្ថិរភាពតម្លៃស្រូវ លោកឧកញ៉ា ភូ ពុយ បាន​សម្រេច​​​​កំណត់យកថ្លៃគោល សម្រាប់ស្រូវផ្ការំដួល ប្រភេទលេខ១ (ស្រូវសើម) មិន​ក្រោម ៩បាត ក្នុង ១គីឡូក្រាម ឬស្មើនឹង ១០៤០រៀល ក្នុង ១គីឡូក្រាម។ តម្លៃស្រូវនេះ ត្រូវអនុវត្តនៅខេត្តបាត់ដំបង និងខេត្តបន្ទាយមានជ័យ ដែលខេត្តទាំងពីរនេះ តម្លៃស្រូវបានធ្លាក់ចុះក្នុងខែវិច្ឆិកានេះ។

ក្រុមការងារចម្រុះ ក៏បានអំពាវនាវ​ដល់​ម្ចាស់រោងម៉ាស៊ីន​ស្រូវ និងឈ្មួញប្រមូលទិញស្រូវ ក្នុងខេត្តបាត់ដំបង និងខេត្ត​បន្ទាយមានជ័យ ឱ្យចុះប្រមូលទិញស្រូវ​ ដោយអនុវត្តតាមថ្លៃ ដែលបានកំណត់ ចាប់ពីរសៀលថ្ងៃទី១៧ ខែវិច្ឆិកា ឆ្នាំ២០២២ តទៅ។

ក្រុមការងារចម្រុះ បានបន្ថែមថា ក្នុងករណីមានបញ្ហា ដោយ​អ្នកទិញស្រូវ​ អនុវត្តមិនត្រឹមត្រូវ សូមប្រជាកសិករ មេត្តាទាក់ទងជាមួយមេឃុំ ឬ​មន្ទីរកសិកម្ម រុក្ខាប្រមាញ់ និងនេសាទ ខេត្ត​ដើម្បីទទួលបានការអន្តរាគមន៍​ កុំឱ្យ​ស្រូវ​លក់​ ក្នុងតម្លៃទាបជាង ១០៤០​៛ ក្នុង ១គីឡូក្រាម​៕