ពលរដ្ឋ២ស្រុកចង់ដាក់ដាយបង្កង និងដាយត្រីលិញ តែមិនដឹងនីតិវិធីដាក់ពាក្យស្នើសុំ ខណៈជនជាតិវៀតណាមដាក់បានរាល់ឆ្នាំ
- ព្រៃវែង
ប្រជាពលរដ្ឋមួយចំនួនដែលរស់នៅតាមដងទន្លេតូច ក្នុងស្រុកព្រះស្តេច និងស្រុកពាមជរ និយាយថា
ខេត្តព្រៃវែង ៖ ប្រជាពលរដ្ឋមួយចំនួនដែលរស់នៅតាមដងទន្លេតូច ក្នុងស្រុកព្រះស្តេច និងស្រុកពាមជរ និយាយថា ពួកគាត់ឃើញជនជាតិវៀតណាមចំនួន២ក្រុម មានគ្នាជាង១០នាក់ដាក់ដាយបង្កង និងដាយត្រីលិញនៅក្នុងទន្លេតូចរៀងរាល់ឆ្នាំ ដែលមួយក្រុមដាក់នៅចំណុចខាងក្រោមផ្សារដីក្រហម ក្នុងឃុំរាធរ ស្រុកព្រះស្តេច និងមួយក្រុមទៀតដាក់នៅចំណុចដើមរកា ក្នុងឃុំស្វាយភ្លោះ ស្រុកពាមជរ ។
ដាយទាំង២កន្លែងនេះ បានប្រមូលចាប់យកបង្កងនិងត្រីតូចធំគ្រប់ប្រភេទក្នុង១ឆ្នាំៗរាប់សិបតោន យកទៅលក់នៅលើទីផ្សារ ប្រមូលលុយរាប់សិបលានរៀលយ៉ាងងាយស្រួល ។ ពលរដ្ឋទាំងនោះបញ្ជាក់ថា ពេលឃើញជនជាតិវៀតណាមទាំងនោះដាក់ដាយបង្កង ដាយត្រីងាយៗបែបនេះ ពួកគាត់ក៏ចង់ដាក់ដែរ ប៉ុន្តែសុំច្បាប់អនុញ្ញាតពីអាជ្ញាធរ និងមន្ត្រីជំនាញមិនបានសោះ ចំណែកជនជាតិវៀតណាមទាំងនោះវិញ ហេតុម៉េចក៏ដាក់ពាក្យដេញថ្លៃបានរាល់ៗឆ្នាំស្រួលៗម្ល៉េះ? តើគេមានខ្សែទុយោធំៗមែនទេ ?
ចំណែកក្រុមជនជាតិវៀតណាមដែលកំពុងដាក់ដាយបង្កងនៅចំណុចទាំង២ខាងលើនេះ និយាយថា ពួកគេដាក់ដាយបង្កងនៅក្នុងទន្លេតូចនេះជិត១០ឆ្នាំហើយ ។ ការដាក់ដាយនេះ គឺពួកគេដេញថ្លៃបានពីខណ្ឌរដ្ឋបាលជលផលព្រៃវែង ដោយក្នុង១ឆ្នាំំៗពួកគេត្រូវបង់ថវិកាជូនរដ្ឋចំនួន២លាន៤សែនរៀលសម្រាប់ដាយបង្កងមួយកន្លែង ហើយបើសរុបទាំង២កន្លែងនេះ គឺចំនួន៤លាន៨សែនរៀល ។
ដោយឡែក មន្ត្រីជលផលខេត្តព្រៃវែង បានបកស្រាយថា ពុំមានការអនុញ្ញាតឱ្យជនជាតិវៀតណាមដេញថ្លៃ និងដាក់ដាយបង្កង ដាយត្រីលិញ ដូចការលើកឡើងនោះទេ ។ ដាយបង្កងទាំង២កន្លែងខាងលើនោះ គឺជនជាតិខ្មែរចំនួន២នាក់ជាអ្នកដេញបាន គឺដាយខាងលើនៅឃុំរាធរ ស្រុកព្រះស្តេច អ្នកដេញបានឈ្មោះ ចាន់ ទី ភេទស្រី ។ ចំណែកដាយខាងក្រោមនៅដើមរកា ស្រុកពាមជរ អ្នកដេញបានឈ្មោះ ផល្លា ភេទប្រុស នៅអ្នកលឿង ។ រីឯជនជាតិវៀតណាមទាំងនោះ គឺជាអ្នកបច្ចេកទេសដែលម្ចាស់ដាយជួលធ្វើការឱ្យគេប៉ុណ្ណោះ ។
ជុំវិញរឿងរ៉ាវនេះដែរ មានមន្ត្រីជំនាញ និងអាជ្ញាធរខ្លះ បានលួចបង្ហើបប្រាប់ថា តាមច្បាប់ជលផល ការដាក់ពាក្យដេញថ្លៃដាយបង្កង និងដាយត្រីលិញនៅទូទាំងប្រទេស គឺមិនអនុញ្ញាតឱ្យជនបរទេសដាក់ពាក្យដេញថ្លៃនោះទេ មានតែជនជាតិខ្មែរមួយគត់ដែលមានសិទ្ធិធ្វើ ។ សម្រាប់ដាយបង្កង គឺគេមិនឱ្យដាក់ក្រឡាញឹកទេ ដើម្បីកុំឱ្យត្រីតូចល្អិតជាប់ ។ ប៉ុន្តែការធ្វើជាក់ស្តែង គឺមានជនជាតិខ្មែរជាអ្នកឈរឈ្មោះដេញថ្លៃពីរដ្ឋ ។ ពេលដេញបានហើយ ក៏លក់បន្តឱ្យទៅជនជាតិវៀតណាមជាអ្នកធ្វើផ្ទាល់ ។ ពេលមានអ្នកសួរនាំ គេឆ្លើយថា ជនជាតិវៀតណាមទាំងនោះជាអ្នកបច្ចេកទេសដែលគេជួលមក ហើយគេប្រើដាយក្រឡាញឹកចាប់យកទាំងបង្កង និងត្រីតូចធំគ្រប់ប្រភេទគ្មានគេចរួចទេ គឺផ្ទុយពីច្បាប់ជលផលទាំងអស់ ។
សម្រាប់ខេត្តព្រៃវែងទាំងមូល មិនមែនមានតែស្រុកព្រះស្តេច និងស្រុកពាមជរប៉ុណ្ណឹងទេ ដែលមានជនជាតិវៀតណាមធ្វើការនេសាទបានដោយស្របច្បាប់នោះ ។ នៅឯឃុំបាបោង ស្រុកពាមរក៍ឯណោះវិញ ក៏មិនខុសគ្នាដែរ នៅតាមព្រែកមួយចំនួន ដែលជាអតីតដែនឡូត៍នេសាទលេខ៥ និងលេខ៧ ដែលគ្រប់គ្រងដោយសហគមន៍នេសាទបាបោង ក៏មានជនជាតិវៀតណាមកំពុងដាក់របាំងព្រួលស្បៃមុង ចាប់ប្រមូលយកបង្កង ត្រីតូចធំ គ្រប់ប្រភេទ បានយ៉ាងស្រួលផងដែរ ។ ចំណែកខាងសហគមន៍នេសាទបាបោង ក៏បានឆ្លើយដូចគ្នាដែរថា ជនជាតិវៀតណាមទាំងនោះ គឺជាអ្នកបច្ចេកទេសដែលសហគមន៍ជួលឱ្យធ្វើទេ (Sic) ៕
ចែករំលែកព័តមាននេះ