ខេត្តស្វាយរៀង ៖ រឿងស្ត្រីម្នាក់ឈ្មោះ សេង រតនា ថាបានពពោះ១០ខែ សម្រាលកូនមក ត្រូវពស់ចម្លែក មកពាំកូនយកទៅបាត់នោះអាជ្ញាធរចេញមកប្រតិកម្ម ហើយបញ្ជាក់ច្បាស់ថា…
ខេត្តស្វាយរៀង ៖ រឿងស្ត្រីម្នាក់ឈ្មោះ សេង រតនា ថាបានពពោះ១០ខែ សម្រាលកូនមក ត្រូវពស់ចម្លែក មកពាំកូនយកទៅបាត់នោះអាជ្ញាធរចេញមកប្រតិកម្ម ហើយបញ្ជាក់ច្បាស់ថា ស្ត្រីរូបនេះ ប្រឌិតរឿងចង់បានប្រាក់ខែពីរោងចក្រ ។
ករណីអាជ្ញាធរប្រតិកម្មនេះ បានកើតឡើងនៅព្រឹកថ្ងៃទី១៥ វិច្ឆិកា ២០២២ ដោយយលោក ថាន់ បូរ៉ា អភិបាលរងស្រុកស្វាយទាប បានដឹកនាំកម្លាំងក្រុមប្រឹក្សាឃុំរមាំងថ្កោល លោកមេភូមិរមាំងថ្កោល អធិការនគបាលស្រុក ប៉ុស្ត៍រដ្ឋបាលឃុំ និងក្រុមគ្រូពេទ្យ ស្រុកប្រតិបត្តិស្វាយទាបចុះទៅដល់ផ្ទះរបស់ឈ្មោះ សេង រតនា នៅភូមិរមាំងថ្កោល ឃុំរមាំងថ្កោល ហើយធ្វើការសាកសួរ អំពីបញ្ហាមានផ្ទះពោះ ១០ខែ ហើយពេលសម្រាលកូន ថាត្រូវសត្វពោះចម្លែកពាំយកទៅបាត់ នោះថា ជារឿងប្រឌិតទេ ។ ក៏ប៉ុន្តែស្ត្រីឈ្មោះ សេង រតនា និងក្រុមគ្រួសារ នៅតែបញ្ជាក់ថា ជាការពិត! ។
លោក ថាន់ បូរ៉ា អភិបាលរងស្រុកស្វាយទាប បានបញ្ជាក់ថា លោកជឿតាមការស្រាវជ្រាវលទ្ធផល ក្រោយការសិក្សាស្រាវជ្រាវ តាមវិទ្យាសាស្ត្រ របស់គ្រូពេទ្យ គឺបញ្ជាក់ថា ស្ត្រីឈ្មោះ សេង រតនា រូបនេះមិនមានផ្ទៃពោះទេ ។
លោកបានបញ្ជាក់ទៀតថា ការពិនិត្យអេកូ នៅមន្ទីរពេទ្យបង្អែកស្រុក ប្រតិបត្តិស្វាយទាប នៅថ្ងៃទី១៣ ខែមិថុនា ឆ្នាំ២០២២ របស់លោកវេជ្ជបណ្ឌិត សរ សុខចំរើន គឺបញ្ជាក់ថា នាងសេង រតនា គ្មានផ្ទៃពោះទេ ។ ការពិនត្យអេកូ នៅថ្ងៃទី២៦ ខែតុលា ឆ្នាំ២០២២ នៅក្លីនិកឯកជន របស់លោកវេជ្ជបណ្ឌិត ចាន់ ថន គឺបញ្ជាក់ថា មិនមានផ្ទៃពោះទេ មិនត្រឹមតែប៉ុណ្ណោះនាង សេង រតនា បានសុំឲ្យលោកវេជ្ជបណ្ឌិត ចាន់ ថន បញ្ជាក់ថា មានផ្ទៃពោះថែមទៀតផង ក៏ប៉ុន្តែលោកវេជ្ជបណ្ឌិត មិនបានធ្វើតាមសំណូមពរនេះទេ ។ ហើយនៅថ្ងៃទី០៨ ខែវិច្ឆិកា ឆ្នាំ២០២២ ដែលក្រុមគ្រួសារបញ្ជូនឈ្មោះ សេង រតនា ទៅសង្គ្រោះនៅមន្ទីរពេទ្យខេត្តស្វាយរៀង ហើយប្រាប់គ្រូពេទ្យថា សម្រាលកូន ហើយត្រូវសត្វពស់ចម្លែកពាំកូនយកទៅបាត់ ក្រុមគ្រូពេទ្យមិនជឿ ក៏យកទៅពិនិត្យអេកូ លទ្ធផលការពិនិត្យអេកូ របស់លោកគ្រូពេទ្យនៅមន្ទីរពេទ្យបង្អែកខេត្តស្វាយរៀង ក៏បញ្ជាក់ថា គ្មានផ្ទៃពោះដែរ ជាធម្មតាស្ត្រីទើបឆ្លងទន្លេភ្លាម ត្រូវមានឈាមធ្លាក់ មានធ្លាក់សុខ ហើយក្នុងពោះ ក៏មានឈាមធ្លាក់មិនអស់ដែរ ដោយគ្រូពេទ្យមិនអស់ចិត្ត ក៏ពិនិត្យទ្វាមាស លទ្ធផលទ្វាមាសក៏អត់មានដាច់រលាត់ គឺធម្មតា ដែរមិនគួរឲ្យជឿ ។
ដូច្នេះអាជ្ញាធរ សុំបដិសេធករណីនេះ គឺជាការប្រឌិត និងជាព័ត៌មានមិនពិតនោះទេ ។ ចំពោះរូបភាពអេកូ ឃើញរូបទារិកាក្នុងផ្ទៃ ដែលឳពុករបស់ឈ្មោះ សេង រតនា ឈ្មោះ សំអុល អតីតជាមន្ត្រីនគបាល ឋានៈ វរសេនីយ៍ត្រីយ៍ នៅអធិការដ្ឋាននគបាលក្រុងស្វាយរៀង ចូលនិវត្ស បានថតនៅក្នុងអេក្រង់កុំព្យូទ័រ មកបង្ហាញអ្នកសារព័ត៌មាននោះ ក្រុមគ្រួសារថា បាត់ឯកសារដើម ហើយនៅកន្លែងថតអេកូ ក៏បានប្រាប់ថា បានបាត់ឯកសារដែរ ។
ទោសបីយ៉ាងណាក៏ដោយ ក្រុមគ្រួសារ និងអ្នកភូមិរមាំងថ្កោល និងសាច់ញាតិ នៅតែអះអាងថា ពួកគេពិតជាបានឃើញនាង សេង រតនា ពិតជាមានផ្ទៃពោះ ពិតប្រាកដមែន ហើយពោះនោះទៀតសោធ គឺខ្ទាតធំ ដូចជាផ្ទៃពោះមានកូនភ្លោះ អ៊ីចឹង ។
ចំណែកមិត្តភក្តិរួមការងាររោងចក្រ ជាមួយស្ត្រីខាងលើ បាននិយាយថា ពួកគេបានឃើញនាង សេង រតនា មានផ្ទៃពោះដែរ បើគ្មានផ្ទៃពោះ និងគ្មានសំបុត្របញ្ជាក់ពីការពិនិត្យផ្ទៃពោះរាល់ខែ ខាងរោងចក្រក៏មិនអនុញាតិច្បាប់ ឲ្យឈប់សម្រាល និងបើកប្រាក់ខែ៥០% ឲ្យនោះដែរ ។ ហើយចំពោះ ពេលសម្រាលកូនមក ត្រូវសត្វពស់ចម្លែកពាំកូនទៅបាត់ នេះក៏ពិបាកនិយាយដែរថា នេះជារឿងអបីយ៍ជំនឿ ដែលតាំងពីដើមឡើយធ្លាប់តែឮ ជារឿងព្រេងនិទាន ។
សូមរំលឹកផងដែរ នៅថ្ងៃទី០៧ វិច្ឆិកា ២០២២ មានរឿងមិនគួរឲ្យជឿ ដោយនាងសេងរតនា មានផ្ទៃពោះ១០ខែ ពេលសម្រាលត្រូវពស់ចម្លែកពាំកូនយកទៅបាត់ ធ្វើឲ្យមានការភ្ញាក់ផ្អើលដល់មហាជន និងអ្នកសារព័ត៌មាន ទៅថតរូបភាព និងចុះផ្សាយព័ត៌មាន តាមអ្វីដែលក្រុមគ្រួសារស្ត្រីឈ្មោះ សេង រតនា បញ្ជាក់ប្រាប់តែប៉ុណ្ណោះ ៕
ចែករំលែកព័តមាននេះ