ថៃស្លាប់៣០នាក់នៅឆ្នាំនេះដោយសារកម្ដៅហក់ឡើងខ្ពស់, ក្រសួងឧតុនិយមទាយទុកថាកម្ដៅនឹងហក់ឡើងដល់៥២អង្សានៅរយៈពេលប៉ុន្មានថ្ងៃទៀត។ ដូច្នេះ ក្រសួងសំណូមពរយ៉ាងទទូចទៅបងប្អូនប្រជាពលរដ្ឋបើគ្មានការចាំបាច់ខ្លាំងទេសូមកុំចេញទៅក្រៅផ្ទះ។ សម្ងំនៅក្នុងផ្ទះ និងបើកកង្ហារ ឬម៉ាស៊ីនត្រជាក់ជាការប្រសើរជាង។ អ្នកដទៃទៀតគ្មានម៉ាស៊ីនត្រជាក់អាចផឹកទឹកឱ្យបានច្រើនលីត្រក្នុងមួយថ្ងៃៗក៏អាចជួយបានខ្លះៗដែរ។
ទីក្រុងបាងកក៖ ប្រទេសថៃសព្វថ្ងៃនេះកំពុងទទួលរងកម្ដៅខ្លាំងមែនទែន។ នៅតំបន់ខ្លះក្ដៅស្ទើរឆេះដល់ថ្នាក់អាជ្ញាធរចេញសេចក្ដីប្រកាសអាសន្នពីឱ្យប្រុងប្រយ័ត្នខ្ពស់បំផុតនារយៈពេលប៉ុន្មានថ្ងៃទៅមុខទៀត។ ក្រសួងឧតុនិយមប្រកាសថាស្រុកជាង៣០នៅទូទាំងប្រទេសថៃទទួលរងកម្ដៅដ៏ខ្លាំងមិនធ្លាប់មាននៅក្នុងខែមេសានេះ។ ពោលគឺក្ដៅមិនចាញ់ឆ្នាំ១៩៥៨ទេ។
កម្ដៅឡើងលើសពី៤០អង្សានៅក្នុងខេត្តចំនួន២៦។ ខេត្តឡាំផាំងនៅភាគខាងជើងមានសីតុណ្ហភាពអតិបរមា៤៤,២អង្សា។ មានន័យថាតិចជាងតែបន្តិចបន្តួចប៉ុណ្ណោះពីតំបន់ដែលមានអាកាសធាតុក្ដៅបំផុតរហូតដល់៤៤,៦អង្សា។ ដូច្នេះ រោងចក្រផលិតអគ្គិសនីរបស់ថៃត្រូវតែបញ្ឆេះម៉ាស៊ីនទាំងយប់ទាំងថ្ងៃដើម្បីរត់ឱ្យទាន់តម្រូវការជាក់ស្ដែងនៅពេលមនុស្សបើកកង្ហារ, កង្ហារត្រជាក់ និងម៉ាស៊ីនត្រជាក់យ៉ាងពេញទំហឹង។ កាលពីថ្ងៃចន្ទ ថៃប្រើអគ្គិសនីទូទាំងប្រទេសអស់៣៦៦៩៩មេហ្កាវ៉ាត់។
ក្រសួងឧតុនិយមថ្លែងបន្តទៀតថាប្រជាជនគួរណាស់សម្ងំនៅតែក្នុងផ្ទះ ហើយគួរញ៉ាំទឹកឱ្យបានច្រើនតាមដែលអាចធ្វើទៅបានដើម្បីទប់ទល់នឹងកម្ដៅ។ កាលណាយើងមានកម្លាំងទប់ទល់ពីខាងក្នុង ទោះបីកម្លាំងវាយលុកពីខាងក្រៅក៏មិនងាយចូលចុះដែរ។ ឧទាហរណ៍ករណីឡើងកម្ដៅខ្លាំង បើយើងផឹកទឹកត្រជាក់ឱ្យបានញឹកញាប់មិនងាយមានបញ្ហាសុខភាពទេ។
នៅថ្ងៃអង្គារនេះ សីតុណ្ហភាពហក់ឡើងលើសពី៤០អង្សានៅគ្រប់ទីកន្លែងទូទាំងប្រទេសថៃ។ គួរឱ្យសោកស្ដាយ ជនជាតិថៃយ៉ាងតិច៣០នាក់បានស្លាប់យ៉ាងអាណោចអាធ័មដោយសារកម្ដៅនៅឆ្នាំនេះ។ នេះបើតាមការប្រកាសរបស់ក្រសួងសុខាភិបាល។ រដ្ឋបាលទីក្រុងបាងកកប្រកាសតាមហ្វេសប៊ុកថានៅថ្ងៃអង្គារកម្ដៅលើសពី៥២អង្សាដែលជាចំណុចគ្រោះថ្នាក់បំផុត។
មិនថាត្រឹមតែនៅប្រទេសថៃប៉ុណ្ណោះទេដែលទទួលរងអាកាសធាតុក្ដៅខ្លាំងដោយសារឥទ្ធិពលនៃការប្រែប្រួលអាកាសធាតុ និងបាតុភូតអែលនីញ៉ូ។ បើគេក្រឡេកទៅមើលប្រទេសហ្វ៊ីលីពីនឯណោះវិញ កម្ដៅក្ដៅស្ទើរខ្លោចសាច់។ នៅតំបន់ខ្លះនៃប្រទេសហ្វ៊ីលីពីន រោងចក្រអគ្គិសនីរត់លែងចង់រួចនឹងការផ្គត់ផ្គង់តម្រូវការជាក់ស្ដែង។ ពេលខ្លះត្រូវបិទរោងចក្រម្ដងៗដោយសារម៉ាស៊ីនត្រូវបញ្ឆេះទាំងយប់ទាំងថ្ងៃគ្មានពេលឈប់សម្រាក។ នេះបើយោងតាមការអះអាងរបស់ធានាធិបតីហ្វ៊ីលីពីន។
លោកថ្លែងបន្តទៀតថាមនុស្សប្រើប្រាស់ភ្លើងអគ្គិសនីកាន់តែច្រើនដោយសារអាកាសធាតុក្ដៅខ្លាំងពេក។ ដូច្នេះ រដ្ឋាភិបាលត្រូវបន្តតាមដានដំណើរការផ្គត់ផ្គង់អគ្គិសនី។ លោកថ្លែងថាអាជ្ញាធរត្រូវទប់ស្កាត់ករណីឈ្មួញលួចដំឡើងថ្លៃភ្លើង។
នៅឥណ្ឌា សីតុណ្ហភាពក៏ហក់ឡើងខ្ពស់លើសពី៤០អង្សាគ្រប់ទីកន្លែង។ គេទទួលដំណឹងថាមនុស្សទើបតែស្លាប់ថ្មីៗ២នាក់នៅរដ្ឋកេរ៉េឡាដោយសារកម្ដៅហក់ឡើងយ៉ាងគំហុកមួយរំពេច។ កាលពីមុននេះ មនុស្ស២នាក់នៅរដ្ឋអូឌីសា (Odisha) ក៏បានស្លាប់ផងដែរដោយសារកម្ដៅ។ រីឯនៅប្រទេសបង់ក្លាដែស កម្ដៅក៏ហក់ឡើងខ្ពស់លើសពី៤០អង្សាដូចគ្នា។ ទាំងហ្វ៊ីលីពីន និងបង់ក្លាដែសសម្រេចចិត្តបិទទ្វារសាលារៀនជាច្រើនកន្លែងដោយសារគ្រូ និងសិស្សគ្មានអារម្មណ៍រៀន និងបង្រៀនទេ៕
ចែករំលែកព័តមាននេះ