ខេត្តស្វាយរៀង ៖ យោងតាមរដ្ឋបាលស្រុកស្វាយទាប បានអោយដឹងនៅថ្ងៃទី១៥ ខែវិច្ឆិកា ឆ្នាំ២០២២នេះថា ពាក់ព័ន្ធករណីមានស្ត្រីសម្រាលកូន រួចមានសត្វពស់១ក្បាល មកពាំយកទារកទៅបាត់ដោយមិនដឹងមូលហេតុនោះ គឺជារឿងប្រឌិតទេ ។
ក្រោយពីទទួលបានព័ត៌មាននេះភ្លាម លោក ផាន់ បូរ៉ា អភិបាលរងស្រុកស្វាយទាប បានដឹកនាំក្រុមការងារចម្រុះដោយមានការចូលរួមពី លោកនាយករដ្ឋបាលស្រុក អធិការរងនគរបាលស្រុក លោកអនុប្រធានការិយាល័យសុខាភិបាលស្រុកប្រតិបត្តិស្រុក លោកប្រធានមន្ទីរពេទ្យបង្អែកស្រុក មន្ត្រីឆ្មប ប្រធានការិយាល័យពាក់ព័ន្ធ ក្រុមប្រឹក្សាឃុំ ប៉ុស្តិ៍រដ្ឋបាលឃុំមេភូមិ បានចុះទៅពិនិត្យស្រាវជ្រាវដល់ទីតាំងកើតហេតុ ស្ត្រីដែលសម្រាកកូននោះមានឈ្មោះ សេង រតនា អាយុ ២៨ឆ្នាំ ជាកម្មកររោងចក្រ មានប្ដីឈ្មោះ នុត ចិន្តា អាយុ២៦ឆ្នាំ មុខរបរ កម្មកររោងចក្រ រស់នៅភូមិរមាំងថ្កោល ឃុំរមាំងថ្កោល ស្រុកស្វាយទាប ។
បន្ទាប់ពីបានសាកសួរ ពីក្រុមការងារជំនាញ រួមមានក្រុមគ្រូពេទ្យ ជាអ្នកវិនិច្ឆ័យផ្ទាល់ បានបញ្ជាក់ថា ស្ត្រីខាងលើនេះ មិនមានផ្ទៃពោះទេ ដោយយោងករណីដូចខាងក្រោម ៖
-កាលពីថ្ងៃទី១៣ ខែមិថុនា ឆ្នាំ២០២២ បានមកពិនិត្យអេកូ ផ្ទៃពោះ នៅមន្ទីរពេទ្យបង្អែកស្រុកស្វាយទាប លទ្ធផលបញ្ជាក់ពីលោកវេជ្ជបណ្ឌិត សរ សុខចំរើន ប្រធានមន្ទីរពេទ្យ គឺមិនមានផ្ទៃពោះទេ ។
-កាលពីថ្ងៃទី២៦ ខែតុលា ឆ្នាំ២០២២ ឈ្មោះ សេង រតនា បានមកពិនិត្យផ្ទៃពោះ នៅគ្លីនិក ១កន្លែង ស្ថិតនៅភូមិទួលអង្គប់ ឃុំសំបួរស្រុកស្វាយទាប តាមការបញ្ជាក់របស់ វេជ្ជបណ្ឌិត ចាន់ ថន ស្ត្រីខាងលើនេះ គឺមិនមានផ្ទៃពោះទេ តែឈ្មោះ សេង រតនា សូមឲ្យលោកវេជ្ជបណ្ឌិត ចាន់ ថន ជួយបញ្ជាក់ថា គាត់មានផ្ទៃពោះ ប៉ុន្តែលោកវេជ្ជបណ្ឌិត ចាន់ ថន មិនបានធ្វើតាមសំណូមពរគាត់ទេ ។
-កាលពីថ្ងៃទី០៨ ខែវិច្ឆិកា ឆ្នាំ២០២២ ក្រោយកើតហេតុ ក្រុមគ្រួសារបាននាំយកទៅមន្ទីរពេទ្យខេត្តស្វាយរៀង ដើម្បីពិនិត្យអាការៈ ។ ក្រោយពីការពិនិត្យរបស់ក្រុមគ្រូពេទ្យជំនាញ បានវាយតម្លៃថា អាការស្ត្រី ឈ្មោះ សេង រតនា គឺមិនមានផ្ទៃពោះទេ ដោយអាការដូចស្ត្រីធម្មតា (មិនមានការធ្លាក់ឈាមស្បូនធម្មតា ទ្វារមាសគ្មានការដាច់រលាត់ គ្មានទឹកដោះ…) ។ អាស្រ័យដូច្នេះ ស្ត្រីរូបនេះបានប្រឌិតរឿងឡើង គឺមិនពិតនោះទេ ។
សូមរម្លឹកថា ស្ត្រីខាងលើបានប្រឌិត«រឿងសឹងមិនគួរជឿថា ៖ សត្វពស់ពាំកូនង៉ែតយកទៅបាត់ស្រមោលនៅស្រុកស្វាយទាប» ៕
ចែករំលែកព័តមាននេះ