ប្រជាពលរដ្ឋភូមិព្រះទន្លេ មានប្រតិកម្មចំពោះក្រុមហ៊ុនជីករណ្តៅដីយកអាចម៍ដីលក់ បានធ្វើសកម្មភាពជីករណ្តៅដីដោយកាយផ្លូវភ្លោះ ដែលជាផ្លូវប្រជាពលរដ្ឋធ្វើដំណើរទៅច្រូតកាត់ ធ្វើឱ្យខូចប្រវែងប្រមាណ៨០ម៉ែត្រ មិនអាច
ខេត្តស្វាយរៀង ៖ ប្រជាពលរដ្ឋភូមិព្រះទន្លេ មានប្រតិកម្មចំពោះក្រុមហ៊ុនជីករណ្តៅដីយកអាចម៍ដីលក់ បានធ្វើសកម្មភាពជីករណ្តៅដីដោយកាយផ្លូវភ្លោះ ដែលជាផ្លូវប្រជាពលរដ្ឋធ្វើដំណើរទៅច្រូតកាត់ ធ្វើឱ្យខូចប្រវែងប្រមាណ៨០ម៉ែត្រ មិនអាចចេញចូលយកគ្រឿងចក្រទៅច្រូតស្រូវបានឡើយ។ ហើយការដឹកដីវិញធ្វើឲ្យបាក់ស្រុតផ្លូវប្រឡាយជារណ្តៅក្រហេងក្រហូងពិបាកធ្វើដំណើរ និងដឹកដីលើសទ្រុង ធ្វើឱ្យជ្រុះធ្លាក់លើផ្លូវជាតិលេខ១៣ បង្កហានីភ័យគ្រោះថ្នាក់ដល់អ្នកធ្វើដំណើរ។ លុះពេលមានភ្លៀងធ្លាក់ធ្វើឱ្យផ្លូវរអិល ពេលថ្ងៃក្តៅធ្វើឱ្យហុយទ្រលោមនាំឱ្យប៉ះពាល់ដល់សុខភាពរបស់ប្រជាពលរដ្ឋដែលរស់នៅជិតផ្លូវជាតិលេខ១៣នេះទើបប្រជាពលរដ្ឋនាំគ្នាតវ៉ាសុំឲ្យអាជ្ញាធរសង្កាត់សង្ឃរ័ ជួយអន្តរាគមន៍ និងដោះស្រាយ។
បើតាមប្រជាពលរដ្ឋបានលើកឡើងទៀតថា កន្លងមក មានក្រុមអាជីវកម្មជីករណ្តៅដីយកអាចម៍ដីលក់ នៅជាប់រណ្តៅដីថ្មីនេះ គឺជីកទំហំធំជិត២ហិកតា ជម្រៅ៨ម៉ែត្រ ជីកជាប់ភ្លឺស្រែរបស់ប្រជាពលរដ្ឋ បច្ចុប្បន្នគឺបាក់ដី ជិតដល់ដីស្រែរបស់ពួកគាត់ ទើបប្រជាពលរដ្ឋមានការព្រួយបារម្ភ។
ករណីប្រជាពលរដ្ឋតវ៉ាខាងលើនេះ បានកើតឡើងកាលពីថ្ងៃទី១០ ខែវិច្ឆិកា រហូតមកដល់ថ្ងៃទី១២ ខែវិច្ឆិកា ឆ្នាំ២០២២ ស្ថិតនៅភូមិព្រះទន្លេ ក្នុងសង្កាត់សង្ឃ័រ ក្រុងស្វាយរៀង ដោយពុំទាន់មានដំណោះស្រាយឡើយ។
បើតាមលោកមេភូមិព្រះទន្លេ បានឲ្យដឹងថា ករណីខាងលើនេះ លោកបានទទួលពាក្យបណ្តឹងពីប្រជាពលរដ្ឋដែលទទួលរងផលប៉ះពាល់នោះ ហើយក៏បានរាយការណ៍ជូនលោកស្រីចៅសង្កាត់សង្ឃ័រ ដើម្បីដោះស្រាយ។
ទាក់ទិនករណីនេះដែរ លោកស្រីចៅសង្កាត់សង្ឃ័រ បានមានប្រសាសន៍តាមទូរស័ព្ទឱ្យដឹងថា លោកស្រីទើបតែទទួលបានព័ត៌មានពីលោកមេភូមិព្រះទន្លេ នៅថ្ងៃទី១២ ខែវិច្ឆិកា ឆ្នាំ២០២២នេះ ហើយចំពោះក្រុមហ៊ុនជីករណ្តៅដីលក់នោះ គឺមាន២ក្រុមហ៊ុន។ ក្នុងនោះក្រុមហ៊ុន «ជុំ ខាន់» ដែមានលម្ចាស់អាជីវកម្មឈ្មោះ ជុំ ខាន់ នៅភូមិក្តុយ ឃុំស្តើងជ័យ ស្រុកជើងព្រៃឈរ ខេត្តកំពង់ចាម បានយកច្បាប់ធ្វើអាជីវកម្មមកជម្រាបជូនរដ្ឋបាលសង្កាត់សង្ឃ័រ និងបានធ្វើកិច្ចសន្យាជួសជុលផ្លូវជូនប្រជាពលរដ្ឋវិញ រីឯក្រុមហ៊ុនមួយទៀត គឺលោកស្រីមិនស្គាល់ទេ ដោយយកគ្រឿងចក្រមកធ្វើសកម្មភាព ដោយមិនបានសុំច្បាប់ ឬជូនដំណឹងដល់អាជ្ញាធរសង្កាត់សង្ឃ័រ បានដឹងទេ គ្រាន់តែបានឮថា ម្ចាស់ក្រុមហ៊ុនអាជីវកម្មនោះមានឈ្មោះ សាន មេការតំបន់សេដ្ឋកិច្ចពិសេស «ជីលូ»។
លោកស្រីចៅសង្កាត់សង្ឃ័រ បន្តថា ហើយក្រុមហ៊ុននេះ បានជីកកកាយផ្លូវ ភ្លឺភ្លោះ របស់ប្រជាពលរដ្ឋខូចអស់ប្រវែង៨០ម៉ែត្រ ដាក់គ្រឿងចក្របិទផ្លូវប្រជាពលរដ្ឋ មិនអាចយកគ្រឿងចក្រចូលទៅច្រូតស្រូវបាន ខណៈស្រូវទុំពេញស្រែ។ ហើយរថយន្តដឹកអាចម៍ដីនេះ បានបើកកិនស្រូវរបស់ប្រជាពលរដ្ឋខូចខាតអស់មួយចំនួន និងបានស្រុតផ្លូវ និងដឹកដីខុសបច្ចេកទេស )ដឹកលើសទ្រុង) គ្មានគ្របបង្កឲ្យអាចម៍ដីជ្រុះធ្លាក់លើផ្លូវជាតិលេខ១៣ បង្កហានីភ័យគ្រោះថ្នាក់ដល់អ្នកធ្វើដំណើតាមដងផ្លូវទៀតផង ហើយអាជ្ញាធរបានឲ្យក្រុមហ៊ុនដឹកដីនោះកៀរដីដែលធ្លាក់លើផ្លូវជាតិលេខ១៣ នោះរួចហើយ។
ទាក់ទិនករណីខាងលើនេះដែរ មិនអាចរកការបំភ្លឺពីឈ្មោះ សាន មេការតំបន់សេដ្ឋកិច្ចពិសេសជីលូបានទេ គឺមានឈ្មោះ ផុន បានឆ្លើយតាមទូរស័ព្ទថា «មេគាត់ជាប់រវល់»។ ចំណែកលោក ជុំ ខាន់ ម្ចាស់អាជីវកម្ម «ជុំខាន់» បានប្រាប់ឲ្យដឹងថា ក្រុមហ៊ុនលោកមានច្បាប់ធ្វើអាជីវកម្ម ជីករណ្តៅដីទំហំ៤,០០០មែត្រការ៉េស្មើ៤០អា ជីករណ្តៅដីជម្រៅ០៦ម៉ែត្រ។
ប្រភពដដែលបន្តទៀតថា រណ្តៅដីជាក់ស្តែង អាចជីកជម្រៅ០៨ម៉ែត្រ ដោយខ្លួនទិញដីថ្លៃ ហើយលោកប្រធាមន្ទីររ៉ែ និងឋាមពលខេត្តស្វាយរៀង បានប្រាប់ថា បើជីកលើសពីច្បាប់កំណត់បាន តែត្រូវបង់សួយសាករបន្ថែម។ ហើយអ្វីដែលខុសប្រកតីនោះ ម្ចាស់អាជីវកម្ម «ជុំខាន់» បានប្រើក្មេងប្រុសម្នាក់ឈ្មោះ ស៊ីកា អាយុ១៤ឆ្នាំ ជាសិស្សថ្នាក់ទី៦ មានទីលំនៅភូមិរការ ឃុំស្វាយយា ស្រុកស្វាយជ្រំ ខេត្តស្វាយរៀង មកធ្វើការជាកម្មករ «ប្រ៊ូ» បើកអេស្កាវ៉ាក់ទ័រ ជីកអាចម៍ដីរយៈពេល០៣ខែមកហើយ (កេងកម្លាំងពលកម្មលើកុមារ)។
បើតាមលោក ប៉ាត់ សាក់ ប្រធានការិល័យធនធានរ៉ែ នៃមន្ទីររ៉ែ និងឋាមពលខេត្ត បានមានប្រសាសន៍ថា ករណីក្រុមហ៊ុនអាជីវកម្មជីករណ្តៅដីចំនួន២ នៅចំណុចភូមិព្រះទន្លេ សង្កាត់សង្ឃ័រ គឺសុំច្បាប់សាលាក្រុងស្វាយរៀង ដោយថ្នាក់ជាតិធ្វើប្រតិភូកម្មឲ្យថ្នាក់ស្រុក-ក្រុង អនុញ្ញាតិធ្វើអាជីវកម្មចល័តលើផ្ទៃដីក្រោម១ហិកតា ជម្រៅ០៣ម៉ែត្រ ចំណែកមន្ទីរគ្រាន់តែពិនិត្យលើបច្ចេកទេស និងបង់សួយសាករប៉ុណ្ណោះ ។
ប៉ុន្តែច្បាប់ជីកត្រឹម០៣ម៉ែត្រ ប៉ុន្តែជាក់ស្តែងជីកដល់ក្បាលប្រេត សូមអាជ្ញាធរខេត្ត ចុះពិនិត្យមើលផងទាន។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព។
ចែករំលែកព័តមាននេះ