អ្នកផ្គូផ្គងគូប្រដាល់ ពន្យល់មូលហេតុមិនដាក់កីឡាករជម្រើសជាតិឱ្យប្រកួតនៅសង្វៀន
រាជធានីភ្នំពេញ ៖ លោក នាង ស៊ីវុត្ថា ប្រធានផ្គូផ្គងគូប្រកួតប្រដាល់នៅសង្វៀនទូរទស្សន៍បាយ័ន
រាជធានីភ្នំពេញ ៖ លោក នាង ស៊ីវុត្ថា ប្រធានផ្គូផ្គងគូប្រកួតប្រដាល់នៅសង្វៀនទូរទស្សន៍បាយ័ន បានពន្យល់មូលហេតុមិនយកកីឡាករជម្រើសជាតិគុនខ្មែរមកប្រកួតនៅសង្វៀនរបស់ខ្លួន ខណៈសង្វៀនទី៧«អ្នកប្រយុទ្ធគុនខ្មែរ ស្រាបៀរម៉ាទ្រីដ» បានលេចមុខឡើងសប្ដាហ៍ទី១កាលពីថ្ងៃអាទិត្យ ទី៦ ខែវិច្ឆិកា ឆ្នាំ២០២២ វេលាម៉ោង១ រសៀលតទៅ។
លោក នាង ស៊ីវុត្ថា បានថ្លែងក្នុងសម្ដីដើមក្នុងសន្និសីទសារព័ត៌មានថា«ចេតនារបស់ខ្ញុំគឺចង់ទុកឱកាសឲ្យកីឡាករជម្រើសជាតិយើងគាត់បានហ្វឹកហាត់ពេញលេញក្នុងជំរំហ្វឹកហាត់ ព្រោះថា ការប្រកួតនៅទីនេះគឺត្រូវប្រកួតឲ្យអស់សមត្ថភាព ហើយខ្ញុំគិតថាមកដល់ពេលនេះវាកៀកនឹងស៊ីហ្គេមនៅកម្ពុជាយើងទៅហើយ ។ ដូច្នេះ បើសិនជាខ្ញុំយកពួកគាត់មកប្រកួត លោតែមានបញ្ហាធ្ងន់ធ្ងរខ្លាចវាប៉ះពាល់ដល់ប្រយោជន៍ធំគឺស៊ីហ្គេមយើងតែម្ដង ទើបខ្ញុំសម្រេចថា មិនយកកីឡាករជម្រើសជាតិយើងមកប្រកួតនៅទីនេះទេ គឺទុកឲ្យថ្នាក់ដឹកនាំសហព័ន្ធឯកឧត្ដម តែម ម៉ឺន លោកគ្រប់គ្រងចុះ»។
លោកបន្ថែមថា ទាក់ទងការបង្កើតកម្មវិធីបន្ថែមទៀត បាយ័ន ក៏មានគម្រោងក្នុងការបន្ថែមដែរ ពោលគឺបច្ចុប្បន្នមានក្រុមហ៊ុនមួយកំពុងទាក់ទងចង់បានមួយសង្វៀនទៀតដែរ ដូច្នេះប្រសិនបើបង្កើតទៀតនោះនៅបាយ័ននឹងមាន៨សង្វៀន ។ យ៉ាងណាក៏ដោយ ស្ថានីយទូរទស្សន៍បាយ័នក៏មិនទាន់សម្រេចថា នឹងបង្កើតទៀតឬអត់ទេ ព្រោះថាបច្ចុប្បន្នម៉ោងសម្រាប់ការផ្សាយនៅលើស្ថានីយទូរទស្សន៍គឺមានភាពពេញលេញទៅហើយ ដូច្នេះមានតែរង់ចាំការសម្រេចជាចុងក្រោយថា ត្រូវជ្រើសរើសម៉ោងណា ដើម្បីបង្កើត ឬក៏មិនបង្កើតតែម្ដង។
ទន្ទឹមនឹងនោះដែរ ទាក់ទងការពង្រីកសង្វៀនបាយ័នស្ទឹងមានជ័យវិញ ប្រិយមិត្តអ្នកស្នេហាគុនខ្មែរពិតជាបានដឹងហើយថា សង្វៀនបាយ័នស្ទឹងមានជ័យ តែងខ្វះកៅអីសម្រាប់អ្នកចូលទស្សនាផ្ទាល់ ព្រោះថាពេញៗសង្វៀនតែម្ដងរៀងរាល់សប្ដាហ៍។ ប្រសិនបើសួរថា តើពេលណាស្ថានីយគិតចង់ពង្រីកកន្លែងអង្គុយនោះគឺលោកមិនហ៊ានឆ្លើយឡើយ ព្រោះថាចំណុចនេះវាហួសដែនសមត្ថកិច្ចរបស់លោក ។
យ៉ាងណាលោកក៏ជឿថា ប្រិយមិត្តអ្នកស្នេហាគុនខ្មែរ ពិសេសអ្នកធ្លាប់មកទស្សនាផ្ទាល់ ដែលរកកន្លែងអង្គុយមិនបាន សូមមេត្តាអធ្យាស្រ័យ ព្រោះកន្លងមកស្ថានីយក៏បានដោះស្រាយដូចជាដាក់ផ្ទាំង LED ខ្នាតយក្សនៅខាងក្រៅស្ថានីយជូនបងប្អូនអ្នកទស្សនាផងដែរ៕
ចែករំលែកព័តមាននេះ