ភ្នំពេញ៖ គិតត្រឹម​ម៉ោងជាង ៨យប់ ថ្ងៃទី៩ ខែវិច្ឆិកា​ ឆ្នាំ២០២២ នេះ មានមេដឹកនាំប្រទេសអាស៊ាន ចំនួន ៥ប្រទេសហើយ បានមកដល់ភ្នំពេញ ដើម្បីចូលរួម​កិច្ចប្រជុំកំពូលអាស៊ាន និងកិច្ចប្រជុំ​ពាក់ព័ន្ធ ដែលនឹងចាប់ផ្តើម​នៅថ្ងៃទី១០ ដល់ថ្ងៃទី១៣ ខែវិច្ឆិកា ឆ្នាំ២០២២ ដែលកម្ពុជា ធ្វើជាម្ចាស់ផ្ទះ​​។

លោក ផាម មិញជិញ (Pham Minh Chinh) នាយករដ្ឋមន្រ្តី នៃសាធារណរដ្ឋសង្គមនិយមវៀតណាម បានមកដល់ភ្នំពេញ កាលពី​រសៀលថ្ងៃទី០៨ ខែវិច្ឆិកា ឆ្នាំ២០២២ ដើម្បី​បំពេញទស្សនកិច្ចផ្លូវការ ហើយបន្តស្នាក់នៅកម្ពុជា ដើម្បី​ចូលរួមកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ​។

ចំណែក​ព្រះចៅស៊ុលតង់ ហាជី ហាលសាណាល់ បុលគីយ៉ាស់ មុយអ៊ីហ្សាឌីន វ៉ាឌូឡាហ៍ (Haji Hassanal Bolkiah Mu’izzaddin Waddaulah) ព្រះមហាក្សត្រ នៃប្រទេសព្រុយណេដារូហ្សាឡឹម ដែលជានាយករដ្ឋមន្ត្រីព្រុយណេ បាន​ដឹកនាំគណៈប្រតិភូ យាងមកដល់​ភ្នំពេញ នារសៀលថ្ងៃទី០៩ ខែវិច្ជិកា ឆ្នាំ២០២២ នេះ ដើម្បីចូលរួមកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធ។

រីឯលោក​ Phankham Viphavanh នាយករដ្ឋមន្រ្តី នៃសាធារណរដ្ឋប្រជាធិបតេយ្យប្រជាមានិតឡាវ និងលោកជំទាវ បាន​អញ្ជើញដឹកនាំគណៈប្រតិភូ មកដល់​ភ្នំពេញ នាល្ងាចថ្ងៃទី០៩ ខែវិច្ឆិកា ឆ្នាំ២០២២ នេះ ដើម្បីចូលរួមកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធ។

​លោក ហ្វឺឌីណាន់ ម៉ាកូស ជេអរ (Ferdinand Marcos Jr) ប្រធានាធិបតី នៃប្រទេសហ្វីលីពីន និងលោកជំទាវ បាន​អញ្ជើញដឹកនាំគណៈប្រតិភូមកដល់ព្រលានយន្តហោះអន្តរជាតិភ្នំពេញ នាយប់ថ្ងៃទី០៩ ខែវិច្ឆិកា ឆ្នាំ២០២២ នេះ ដើម្បីចូលរួមកិច្ចប្រជុំកំពូលអាស៊ាន លើកទី៤០ និងទី៤១ និងកិច្ចប្រជុំកំពូលពាក់ព័ន្ធ នៅព្រះរាជាណាចក្រកម្ពុជា។

​ដោយឡែកលោក ចូកូ វីដូដូ (Joko Widodo) ប្រធានាធិបតី នៃសាធារណរដ្ឋឥណ្ឌូនេស៊ី និងលោកជំទាវ បាន​អញ្ជើញដឹកនាំគណៈប្រតិភូមកដល់ព្រលានយន្តហោះអន្តរជាតិភ្នំពេញ នាយប់ថ្ងៃទី០៩ ខែវិច្ឆិកា ឆ្នាំ២០២២ នេះ ដើម្បីចូលរួមកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធ នៅព្រះរាជាណាចក្រកម្ពុជា។

តាមកម្មវិធី ដែលបានគ្រោងទុក មេដឹកនាំអាស៊ាន​ នឹងបន្ត​ធ្វើដំណើរ​មកកម្ពុជា នាព្រឹកថ្ងៃទី១០​វិច្ឆិកាស្អែកនេះ ដើម្បីចូលរួម​កិច្ចប្រជុំ​កំពូលអាស៊ាន និងកិច្ចប្រជុំពាក់ព័ន្ធ។ ក្នុងនោះ នៅសល់តែ​មេដឹកនាំថៃ សឹង្ហបុរី និង​ម៉ាឡេស៊ីប៉ុណ្ណោះ ព្រោះ​មេដឹកនាំ​យោធា​​មីយ៉ាន់ម៉ា មិនត្រូវបាន​អាស៊ាន អញ្ជើញ​ឱ្យចូលរួម​ប្រជុំ​ឡើយ ដោយសារតែមីយ៉ាន់ម៉ា មិនបានធ្វើតាម​កិច្ចព្រមព្រៀង ៥ចំណុចរបស់អាស៊ាន​។

តាមកម្មវិធី ដែលបានគ្រោងទុក​ នៅព្រឹកថ្ងៃទី១០វិច្ឆិកា មេដឹកនាំអាស៊ាន ត្រូវចូល​ក្រាបបង្គំគាល់​ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី នៅក្នុងព្រះបរមរាជវាំង មុននឹង​ចូលរួម​កិច្ចប្រជុំ​ដាច់ដោយឡែក​ពីគ្នា ជាមួយតំណាង​អន្តរសភាអាស៊ាន AIPA ​​កិច្ចប្រជុំ​ជាមួយតំណាង​យុវជន​អាស៊ាន និង​កិច្ចប្រជុំ​ជាមួយ​ក្រុម​ប្រឹក្សា​ធុរកិច្ចអាស៊ាន ​នៅពេលរសៀល​ នៅសណ្ឋាគារ សុខា ភ្នំពេញ​។

​ដោយឡែក នៅព្រឹកថ្ងៃទី១១ ខែវិច្ឆិកា ឆ្នាំ២០២២ កិច្ចប្រជុំ​កំពូលអាស៊ាន លើកទី៤០ និងលើកទី៤១ នឹងប្រារព្ធពិធីបើកកិច្ចប្រជុំ ដែលដឹកនាំដោយ​សម្តេចតេជោ នាយករដ្ឋមន្ត្រី ហ៊ុន សែន ក្នុងនាមជាប្រធានអាស៊ាន​ នៅឆ្នាំ២០២២ នេះ។

បន្ទាប់មក នៅរសៀលម៉ោង ២ ថ្ងៃទី១១វិច្ឆិកា គឺ​កិច្ចប្រជុំ​អាស៊ាន-ចិន លើកទី២៥។ កិច្ចប្រជុំ​កំពូលអាស៊ាន-កូរ៉េខាងត្បូង លើកទី២៣។ កិច្ចប្រជុំ​អាស៊ាន-អង្គការសហប្រជាជាតិ លើកទី១២។

ដោយឡែក នៅព្រឹកថ្ងៃទី១២ ខែវិច្ឆិកា ឆ្នាំ២០២២ កិច្ចប្រជុំ​កំពូល​អាស៊ាន បូក ៣ ( ចិន-កូរ៉េ-ជប៉ុន) លើកទី២៥។ កិច្ចប្រជុំកំពូល​អាស៊ាន-ឥណ្ឌា លើកទី១៩​។ កិច្ចប្រជុំ​អាស៊ាន-អូស្ត្រាលី លើកទី២​។ នៅពេលរសៀល ថ្ងៃទី១២វិច្ឆិកា នឹងមានកិច្ចប្រជុំ​កំពូលអាស៊ាន-ជប៉ុន លើកទី២៥​។ កិច្ចប្រជុំ​កំពូលអាស៊ាន-អាមេរិក លើកទី១០​។ កិច្ចប្រជុំ​អាស៊ាន-កាណាដា​​។ នៅយប់​ថ្ងៃទី១២វិច្ឆិកា សម្តេចតេជោ ហ៊ុន សែន នឹងដឹកនាំពិធីលៀងសាយភោជន៍​ជូន​មេដឹកនាំអាស៊ាន និងមេដឹក​នាំប្រទេស​ដៃគូអាស៊ាន ដែលបានចូលរួម​កិច្ចប្រជុំ​។

ដោយឡែក កម្មវិធីនៅព្រឹកថ្ងៃទី១៣ ខែវិច្ឆិកា រួមមាន វេទិកា​​​សន្ទនា​អាស៊ាន​ លើកទី២ និង​កិច្ចប្រជុំ​កំពូលអាស៊ី​បូព៌ា លើកទី១៧​។​

នៅម៉ោង ១២ និង ៣០នាទី រសៀលថ្ងៃទី១៣វិច្ឆិកា នឹងមានពិធី​បិទកិច្ចប្រជុំកំពូលអាស៊ាន លើកទី៤០ និងលើកទី៤១ រួមទាំង​កិច្ចប្រជុំ​កំពូលពាក់ព័ន្ធ ហើយ​សម្តេចតេជោ ហ៊ុន សែន នឹងប្រគល់​ញញួរ​ជូន​ប្រធានាធិបតីឥណ្ឌូនេស៊ី ដែល​ត្រូវ​ធ្វើជាប្រធានអាស៊ានប្តូរវេន នៅឆ្នាំ២០២៣​។

នៅម៉ោង ៣ និង ៤០នាទីរសៀលថ្ងៃអាទិត្យ ទី១៣ ខែវិច្ឆិកា ឆ្នាំ២០២២ សម្តេចតេជោ ហ៊ុន សែន នឹងធ្វើសន្និសីទកាសែត ប្រកាសពីលទ្ធផល​នៃកិច្ចប្រជុំកំពូលអាស៊ាន លើកទី៤០ និងលើកទី៤១ រួមទាំង​កិច្ចប្រជុំ​ពាក់ព័ន្ធ​ ដែល​កម្ពុជា​ ធ្វើជាម្ចាស់​ផ្ទះ​នាពេលនេះ៕​