ប្រជាពលរដ្ឋចំនួន៣០គ្រួសារ តំណាងឲ្យប្រជាពលរដ្ឋ៣៧០គ្រួសារ នៅឃុំឆែប១ ស្រុកឆែប ខេត្តព្រះវិហារ កំពុងរងការបំពានពីក្រុមហ៊ុនវិនិយោគរបស់ចិនមួយ ដែលធ្វើសកម្មភាពកាយប្រឡាយដាំបង្គោលថ្ម បិទផ្លូវ និង
ខេត្តព្រះវិហារ ៖ ប្រជាពលរដ្ឋចំនួន៣០គ្រួសារ តំណាងឲ្យប្រជាពលរដ្ឋ៣៧០គ្រួសារ នៅឃុំឆែប១ ស្រុកឆែប ខេត្តព្រះវិហារ កំពុងរងការបំពានពីក្រុមហ៊ុនវិនិយោគរបស់ចិនមួយ ដែលធ្វើសកម្មភាពកាយប្រឡាយដាំបង្គោលថ្ម បិទផ្លូវ និងដាក់បារ៉ាស់កៀបថ្លៃកសិផល ដែលកសិករផលិតបានឲ្យមានតម្លៃទាបជាងទីផ្សារ។
ការបំពានដែលចាត់ទុកថា ជាការកេងប្រវ័ញ្ចលើញើសឈា.មកសិករនេះ ត្រូវបានប្រជាពលរដ្ឋ៣០គ្រួសារខាងលើ ដាក់ពាក្យបណ្តឹងទៅលោកអភិបាលស្រុកឆែប ចុះថ្ងៃទី២៥ ខែតុលា ឆ្នាំ២០២២ ដោយប្តឹងទៅលើឈ្មោះ សៀវ ឈិន, ឈ្មោះ យឹម ម៉េង, ឈ្មោះ រឿង គង់ និង ឈ្មោះ យូ ចាន់រី ជាអ្នកជួលដីឲ្យក្រុមហ៊ុនចិន និងជួលបន្តទៅឲ្យប្រជាពលរដ្ឋសម្រាប់ដាំដំឡូងមី និងដំណាំស្រូវរយៈពេល១ឆ្នាំពេញ គឺឆ្នាំ២០២២ ដោយប្ដឹងចូលទៅលោកអភិបាលស្រុកឆែបថា នៅថ្ងៃទី៨ ខែតុលា ឆ្នាំ២០២២ មានគ្រឿងចក្ររបស់ក្រុមហ៊ុនចិន បានកាយផ្តាច់ផ្លូវរបៀងចេញចូលជុំវិញបរិវេណក្រុមហ៊ុន «ហេង យូ» និងដាក់បារ៉ាស់មិនឲ្យពួកគាត់ដឹកកសិផលចេញពីក្នុងតំបន់ដែលពួកគាត់ដាំដុះបាន និងកំពុងចាប់ផ្តើមប្រមូលផលនោះទេ។
ក៏ប៉ុន្តែពាក្យបណ្តឹងនេះ រហូតមកដល់ថ្ងៃទី៥ ខែវិច្ឆិកា ឆ្នាំ២០២២ គឺមានរយៈពេលជិតមួយខែក៏គេពុំទាន់ឃើញអាជ្ញាធរមូលដ្ឋាន និងរដ្ឋបាលឃុំ ស្រុក ខេត្ត ចុះមកត្រួតពិនិត្យ និងដោះស្រាយសម្រួលផ្តល់ធម្យោបាយជូនប្រជាពលរដ្ឋនៅឡើយទេ រហូតដល់ប្រព័ន្ធផ្សព្វផ្សាយអំពីសកម្មភាពត្រូវបែកធ្លាយ ហើយទុកឲ្យខាងក្រុមហ៊ុនកាយលុបប្រឡាយ ដកបង្គោលចេញពីផ្លូវឲ្យប្រែក្លាយទៅជាសភាពដើមវិញ ទើបមានខាងក្រុមការងារថ្នាក់ខេត្ត ចុះមកដល់នៅថ្ងៃបន្ទាប់ គឺព្រឹកថ្ងៃទី៦ ខែវិច្ឆិកា ឆ្នាំ២០២២នេះ ហើយក៏មានការបកស្រាយយ៉ាងរំភើយថា មិនមានសកម្មភាពណាមួយកើតឡើងដូចបណ្តឹងការចោទប្រកាន់ និងបណ្តាញផ្សព្វផ្សាយនោះឡើយ។
ចំពោះការកាយប្រឡាយបិទផ្លូវ ដាក់កុងត្រូលបង្កើតសៃឡូ ជញ្ជីង ក្នុងក្រុមហ៊ុននោះ ឈ្មោះ យឹម ម៉េង តំណាងអ្នកជួលពីក្រុមហ៊ុនចិន បានបំភ្លឺតាមទូរស័ព្ទរៀងស្ទាក់ស្ទើរនៅរសៀលថ្ងៃទី៤ ខែវិច្ឆិកា ឆ្នាំ២០២២នេះថា «ខ្ញុំមិនដឹងទេ អាហ្នឹងសួរទៅក្រុមហ៊ុនគេទៅ។ អត់មានការពាក់ព័ន្ធអីនឹងខ្ញុំទេ ខ្ញុំមានសិទ្ធិឯណា ខ្ញុំជាប្រជាពលរដ្ឋហ្នឹង។ ឯជញ្ជីងសៃឡូនោះ ខ្ញុំបានជួលឲ្យក្រុមហ៊ុនវិញហើយ ឯដីក៏មិនមានការជួលដែរ គឺជាការសហការដាំដុះជាមួយនឹងក្រុមហ៊ុន ខណៈដែលរូបលោកផ្ទាល់ ក៏បានដាំដំឡូងមីចំនួន៧០ហិកតាដែរ»។
ទោះបីជាមានការនិយាយដោះសារបែបនេះក៏ដោយ តែប្រភពក្រៅផ្លូវការមួយបាននិយាយថា លោក យឹម ម៉េង ជាអ្នកកាន់កា.ប់គ្រប់គ្រងលើការដ្ឋានចំនួន២ គឺការដ្ឋានទី៤ និងការដ្ឋានទី៨។
ដោយឡែកលោកស្រី យូ ចាន់រី ដែលរងបណ្តឹងរបស់ប្រជាពលរដ្ឋដែរនោះ ក៏បានបំភ្លឺតាមទូរស័ព្ទដែរថា ការកាយដី កាយអី ជាគម្រោងរបស់ក្រុមហ៊ុន ខ្ញុំអត់ដឹងទេ សួរទៅខាងក្រុមហ៊ុនដោយសារតែដីហ្នឹង ជាដីសម្បទានរបស់រដ្ឋឲ្យទៅក្រុមហ៊ុន ហើយគម្រោងរបស់ក្រុមហ៊ុន គឺកាយក្រវ៉ាត់ព្រំដី។ គេអត់បានផ្តល់ដំណឹងដល់ខ្ញុំទេ ព្រោះខ្ញុំអត់មានសិទ្ធិអីនៅក្នុងដីនោះផង គោលគឺខ្ញុំមើលការខុសត្រូវ៣ការដ្ឋាន គឺការដ្ឋានទី៥ ទី៩ និងទី១០ យើងសហការជាមួយក្រុមហ៊ុន មិនមែនជាប្រភេទជួលទេ ប៉ុន្តែរូបភាពមួយដែលយើងមិនអាចនិយាយបាន ដោយសារតែពាក្យជួលហ្នឹង គឺជាពាក្យដែលមិនគួរប្រើ ដោយប្រើពាក្យសហការធ្វើ ព្រោះជាដីសម្បទាន ខាងពួកក្រុមហ៊ុនក្ស័យធន គាត់រត់រកដៃគូរសហការ ដើម្បីវិនិយោគលើដំណាំកសិកម្ម។
ចំណែកប្រភពព័ត៌មានក្រៅផ្លូវការដែលគេទទួលបានវិញបាននិយាយថា លោកស្រី យូ ចាន់រី គ្រប់គ្រងការដ្ឋានចំនួន៣ គឺការដ្ឋនទី៥ ដងផ្លិតមានចំនួនជិត៥០០ហិកតាជួលដាំដំឡូង, ការដា្ឋនទី៩ ដងផ្លិត មានជាង៥០០ហិកតាជួលដាំដំឡូងអស់ នៅដីស្រែតិចតួច និងការដា្ឋនទី១០ដងផ្លិត យូ ចាន់រី ជាអ្នកកាន់មានចំនួនជាង៥០០ហិកតាទៀត ជួលឲ្យគេទាំងអស់។
ជាមួយគ្នានេះ បើតាមការបែកធ្លាយ គឺលោកស្រី យូ ចាន់រី ធ្លាប់បានផ្ញើសារជាសម្លេងទៅឲ្យអ្នកកាន់កា.ប់គ្រឿងចក្រថា «ពូយ៉ាតអើយ ពូឯងមានទៅភ្ជូរដីជាមួយអាឡោះ នៅការដ្ឋានទី៩ ទី១០ ទី៥ ទេដែរឬទេ? ពូយ៉ាតឯងកុំទៅធ្វើជាមួយវាអី ព្រោះដីការដ្ឋានទី៩ ទី៥ និងទី១០ ហ្នឹងបានមកខ្ញុំជាអ្នកធ្វើ ហើយការដ្ឋានទី៨ និងទី៤ បានទៅពូម៉េង ឯការដ្ឋានទី៧ បានទៅអាវ៉ៃ។ ពូយ៉ាតឯង មានការអីអាចទាក់ទងមកខ្ញុំបាន ណាពូលេខនៅហ្នឹង សួរខ្ញុំច្បាស់ កុំអាលទៅធ្វើ នាំប្រឆាំងគ្នា ព្រោះអីវាអត់មានអ្នកណាសម្រេចឲ្យវាគ្រប់គ្រងការដ្ឋានណាមួយទេ។ ចំណែកពួកខ្ញុំ គឺបានសិទ្ធិពីលោកអភិបាលស្រុកចាស់ ហើយនឹងក្រុមហ៊ុនរួចហើយ»។
ប្រភពដដែលបានបង្ហើបឲ្យដឹងថា បន្ទាប់ពីបែកធ្លាយតាមប្រព័ន្ធផ្សព្វផ្សាយលើករណីបណ្តឹងពីប្រជាពលរដ្ឋជំទាស់ទៅនឹងការកាយប្រឡាយដាំបង្គោលថ្ម បិទផ្លូវ ដាក់បារ៉ាស់ កៀបបញ្ចុះតម្លៃដំឡូងមីនោះ ស្រាប់តែគេឃើញខាងក្រុមហ៊ុនយកគ្រឿងចក្រចូលទៅឈូសលុបប្រឡាយកាយរបងថ្មចេញ ហើយរៀបចំឲ្យទៅរកទម្រង់ដើមវិញ ក្នុងបំណងបំភ័ន្តភ្នែកក្រុមការងារថ្នាក់ស្រុក ខេត្ត ចុះទៅត្រួតពិនិត្យដើម្បីបង្ហាញថា ពួកគេគ្មានកំហុស។
ទីបំផុត នៅថ្ងៃទី៦ ខែវិច្ឆិកា ឆ្នាំ២០២២ លោក អ៊ុង វុទ្ធី អភិបាលរងខេត្តព្រះវិហារ ដែលឃើញរូបភាពខាងក្រៅបានផ្ដល់បទសម្ភាសន៍ដូចគេសូត្រមេលេខយ៉ាងពីរោះរណ្ដំថា ខាងក្រុមហ៊ុនមិនបានកាយដីដាំបង្គោលថ្ម បិទផ្លូវ ដូចការចុះផ្សាយចោទប្រកាន់នោះឡើយ ហើយក៏មិនបានដាក់បារ៉ាស់យកលុយពីកសិករដែរ។ តែនៅក្នុងន័យនេះ ក្នុងពាក្យបណ្តឹង និងការផ្សព្វផ្សាយនោះពុំមានការចោទប្រកាថា ដាក់បារ៉ាសយកលុយនោះទេ គឺកៀបតម្លៃទិញ។
ឯការផ្តល់បទសម្ភាសន៍របស់លោកអភិបាលរងខេត្តបកស្រាយផ្ទុយស្រឡះពីប្រជាពលរដ្ឋមួយរូប គាត់ឈ្មោះ គឹន លៀម រស់នៅភូមិឆែបកើត ឃុំឆែបមួយ ស្រុកឆែប ខេត្តព្រះវិហារ នៅវេលាម៉ោងប្រហែល៨ព្រឹក ថ្ងៃទី៦ ខែវិច្ឆិកា ឆ្នាំ២០២២ មុនក្រុមការងាថ្នាក់ខេត្តចុះទៅដល់ប្រហែលជា២ម៉ោងបានប្រាប់ថា រូបគាត់ជួលដីពីក្រុមហ៊ុនមួយហិកតា៤៥ម៉ឺនរៀល ក្នុងនោះមាន២ហិកតារយៈពេលមួយឆ្នាំ ហើយគេកាយផ្លូវផ្តាច់មិនឲ្យប្រជាពល់រដ្ឋដើរផ្លូវផ្សេងទេ ឲ្យដើរផ្លូវតែមួយ ថ្ងៃណាគេលុបស្រេចតែគេ។
បើតាមមីងម្នាក់គាត់ឈ្មោះ វណ្ណ ឡុម ក៏បានប្រាប់ដែរថា គេកាយបិទផ្លូវនោះ មិនឲ្យយកទៅលក់ឲ្យអ្នកដទៃឲ្យលក់ឲ្យ យឹម ម៉េង គឺធ្វើឲ្យពួកគាត់ពិបាកធ្វើដំណើរណាស់រាល់ថ្ងៃដើរផ្លូវវៀង គេឲ្យដើតែមួយច្រក សុំធ្វើស្ពានមិនឲ្យធ្វើទេ។ គាត់បន្តថា មិនឲ្យធ្វើស្ពាន គាត់បានអីទៅរកស៊ីរកចុក ខាងក្រោយគាត់អត់មានកន្លែងរកស៊ីរកចុកទេ ហើយគាត់បានសំណូមពឲ្យលោកអភិបាលខេត្ត បើកផ្លូវឲ្យគាត់វិញ គាត់ថា មិនចង់ឲ្យលក់កន្លែងផ្សេងទិញថោកបានចង់ទៅរកកន្លែងផ្សេងទីផ្សារខាងក្រៅតម្លៃ៤៤០ ខាងក្រុមហ៊ុនឲ្យតែតម្លៃ៣០០ ឬ៣២០រៀលប៉ុណ្ណោះហើយគាត់ក៏បានបញ្ជាក់ថា រូបគាត់បានជួលដីពីក្រុមហ៊ុន ៨ហិកតាក្នុងតម្លៃ៤៥ម៉ឺនរៀលផងដែរ។
បើស្ដាប់តាមការរៀបរាប់របស់លោក អ៊ុង វុទ្ធី ទំនងដូចជានៅក្នុងមូលដ្ឋាននេះ មិនមានប្រជាពលរដ្ឋម្នាក់ណា រងការឈឺចាប់ ដោយការរំលោ.ភបំពាននោះទេ ពោលគឺមើលទៅដូចជាមានភាពសុខុដុមរមនាខ្លាំងបំផុត ប៉ុន្តែធាតុពិតកិច្ចការរបស់លោកពេលនេះ បើនិយាយជាភាសាបារាំង គឺហ្សេរ៉ូ ព្រោះលោកបានត្រឹមតែជួបផឹក តែហូបស្ករជាមួយតំណាងក្រុមហ៊ុន តែមិនបានចុះស្រង់មតិ ដើម្បីដឹងពីសុខទុក្ខពីប្រជាពលរដ្ឋនៅមូលដ្ឋានឡើយ៕
ចែករំលែកព័តមាននេះ