ប្តីរងរបួសធ្ងន់ ប្រពន្ធរបួសស្រាល ក្នុងហេតុការណ៍គ្រោះថ្នាក់ចរាចរណ៍មួយដែលកើតឡើងរវាងម៉ូតូបុកជាមួយគោយន្តកន្ត្រៃ បង្កឱ្យមានការភ្ញាក់ផ្អើលកាលពី
ខេត្តបន្ទាយមានជ័យ ៖ ប្តីរងរបួសធ្ងន់ ប្រពន្ធរបួសស្រាល ក្នុងហេតុការណ៍គ្រោះថ្នាក់ចរាចរណ៍មួយដែលកើតឡើងរវាងម៉ូតូបុកជាមួយគោយន្តកន្ត្រៃ បង្កឱ្យមានការភ្ញាក់ផ្អើលកាលពីវេលាម៉ោង០៧និង០៥នាទីយប់ ថ្ងៃទី០៧ ខែវិច្ឆិកា ឆ្នាំ២០២២ នៅលើផ្លូវខេត្តលេខ 2561 A ស្ថិតក្នុងភូមិតេជោភ្នំឆ័ត្រ ឃុំស្វាយចេក ស្រុកស្វាយចេក ខេត្តបន្ទាយមានជ័យ ។
បើតាមនគរបាលបានឲ្យដឹងថា ជនរងគ្រោះជាប្តីមានឈ្មោះ វឿត សារិត ភេទប្រុស អាយុ២៤ឆ្នាំ រងបួសធ្ងន់ និងប្រពន្ធមានឈ្មោះ វិន សុធា អាយុ២៥ឆ្នាំ រងរបួសស្រាល ជនរងគ្រោះទាំង០២នាក់ រស់នៅភូមិតាសុងឃុំ គោករមៀត ស្រុកថ្មពួក ខេត្តបន្ទាយមានជ័យ ។
នគរបាលបានបញ្ជាក់ថា នៅមុនពេលកើតហេតុ មានបុរសម្នាក់ឈ្មោះ ម្រះ កាត អាយុ៣៣ឆ្នាំ មានលំនៅភូមិតេជោភ្នំឆ័ត្រ ឃុំស្វាយចេក ស្រុកស្វាយចេក ខេត្តបន្ទាយមានជ័យ បានបើកបរគោយន្តកន្ត្រៃ០១គ្រឿង ក្នុងទិសដៅកើតទៅលិច លុះមកដល់ត្រង់ចំណុចកើតហេតុ ក៏បានប្តូរគន្លងទិសផ្លូវបំរុងចូលផ្ទះ ស្របពេលនោះ ក៏មានអ្នកបើកម៉ូតូម៉ាកវ៉េវ អាវកាច់ ពណ៌ឈាមជ្រូក គ្មានស្លាកលេខ ដឹកប្រពន្ធពីក្រោយ បើកក្នុងទិសដៅពីលិចទៅកើតក្នុងល្បឿនលឿន រួចក៏បុកចំទ្រុងគោយន្ដផ្នែកខាងក្រោយចំហៀងខាងស្ដាំ បណ្តាលឲ្យប្តីជាអ្នកបើកម៉ូតូរងរបួសធ្ងន់ ត្រូវបានដឹកទៅសង្គ្រោះនៅមន្ទីរពេទ្យបង្អែកមង្គលបូរី និងប្រពន្ធរបួសស្រាល។ ចំណែកម៉ូតូទាំង០២គ្រឿងខូចខាតស្រាល ត្រូវបានសមត្ថកិច្ចយករក្សាទុកនៅអធិការដ្ឋាននគរបាលស្រុកស្វាយចេក ដើម្បីរង់ចាំធ្វើការដោះស្រាយនៅពេលក្រោយ៕
ចែករំលែកព័តមាននេះ