ខេត្តបាត់ដំបង ៖ អតីតទណ្ឌិតចំនួន២នាក់ដែលទើបចេញពីពន្ធនាគារ ពេលនេះត្រូវកម្លាំងសមត្ថកិច្ចឃាត់ខ្លួនជាថ្មី កាលពីព្រឹកថ្ងៃទី០៥ ខែវិច្ឆិកា ឆ្នាំ២០២២ ស្ថិតនៅភូមិកណ្ដាលជើង ឃុំគោកឃ្មុំ ស្រុកថ្មគោល ក្រោយពីជនសង្ស័យនេះបានរួមគំនិតគ្នាលួចយកលុយរាប់ម៉ឺនបាតនិងគ្រឿងអលង្ការរបស់ជនរងគ្រោះ២នាក់ប្ដីប្រពន្ធ ដែលគាត់លាក់ទុកនៅក្រោមខ្នើយ ខណៈពេលគាត់កំពុងតែសំរាន្តលង់លក់។
បើតាមរបាយការណ៍សមត្ថកិច្ចបានឲ្យដឹងថា ជនសង្ស័យទាំង២នាក់ខាងលើនោះ ម្នាក់ឈ្មោះ ឆាយ សៅ ហៅជី អាយុ២៤ឆ្នាំ នៅភូមិចំណុចកើតហេតុ (ធ្លាប់ជាប់ពន្ធនាគារពីបទលួច) និង ម្នាក់ទៀតឈ្មោះ មាន វុទ្ធី អាយុ៤០ឆ្នាំ នៅភូមិច្រនៀង ឃុំគោកឃ្មុំ (ធ្លាប់ជាប់ពន្ធនាគារពីបទល្មើសគ្រឿងញៀ.ន)។ ពួកគេទាំង២នាក់ទើបចេញពីពន្ធនាគារកាលពីប៉ុន្មានខែកន្លងទៅនេះ។
របាយការណ៍ដដែលបានបញ្ជាក់ថា អតីតទណ្ឌិតទាំង២នាក់នេះ ត្រូវបានកម្លាំងជំនាញធ្វើការស្រាវជ្រាវឃាត់ខ្លួនជាថ្មីទៀត ក្រោយពីជាប់សង្ស័យថា បានរួមដៃគ្នាលួចយកប្រាក់ និងគ្រឿងអលង្ការរបស់ជនរងគ្រោះឈ្មោះ ទេព ញ៉ន ភេទស្រី អាយុ៥៧ឆ្នាំ នៅភូមិកណ្ដាលជើង ឃុំគោកឃ្មុំ ស្រុកថ្មគោល។
យោងតាមពាក្យបណ្ដឹងរបស់ជនរងគ្រោះឈ្មោះ ពេទ ញ៉ន ដែលបានប្ដឹងទៅកាន់សមត្ថកិច្ចបានឲ្យដឹងថា ប្រាក់របស់គាត់ចំនួន៤២,០០០បាត និងខ្សែ.កមាសទម្ងន់០៦ជី លាក់ទុកនៅក្រោមខ្នើយក្បាលដំណេក ហើយក៏ត្រូវជនមិនស្គាល់មុខលួចយកទៅអស់គ្មានសល់ កាលពីវេលាម៉ោងជាង៣ទៀបភ្លឺឈានចូលថ្ងៃទី០៤ ខែវិច្ឆិកា ឆ្នាំ២០២២ ខណៈពេលគាត់ និងស្វាមីកំពុងតែសំរាន្តលក់លើគ្រែក្រោមផ្ទះ។
ជនរងគ្រោះបានបញ្ជាក់ថា ជាទូទៅពេលយប់ ប្ដីប្រពន្ធគាត់តែងតែសំរាន្តលើគ្រែក្រោមផ្ទះ ហើយលុយ និងគ្រឿងអលង្ការទាំងនោះ គាត់លាក់ទុកនៅក្រោមខ្នើយរហូតមក។ ជនរងគ្រោះនិយាយបន្តថា ប្រាក់ចំនួនជាង៤ម៉ឺនបាត និងគ្រឿងអលង្ការ០៦ជីនោះ បានមកពីការសន្សំដែលកូនគាត់ធ្វើការនៅប្រទេសថៃ រួចផ្ញើមកឲ្យច្រើនឆ្នាំកន្លងមកនេះ។ គាត់បានដាក់ក្នុងកាបូបជុំគ្នា ហើយតែងតែលាក់ទុកនៅក្រោមខ្នើយកើយ តែនៅព្រឹកថ្ងៃកើតហេតុ ពេលគាត់ភ្ញាក់ពីដំណេកបើកខ្នើយរកកាបូបលុយ ស្រាប់តែប្រហោងពោះធ្លុង ព្រោះបាត់អស់រលីងក៏ផ្អើលឆោឡោ ទើបគាត់រូសរាន់ទៅប្ដឹងនៅប៉ុស្ដិ៍រដ្ឋបាលតែម្ដង។
អធិការរងទទួលផ្នែកព្រហ្មទណ្ឌ លោក ហៀង ប៊ុនថា បាននិយាយដែរថា បើតាមប្រវត្តិជនសង្ស័យឈ្មោះ មាន វុទ្ធី និងឈ្មោះ ឆាយ សៅ ហៅជី នេះ ជាអតីតទណ្ឌិត ទើបចេញពីពន្ធនាគារថ្មីៗ។ លោកបានបន្តថា កម្លាំងជំនាញរបស់លោកបានកំណត់មុខសញ្ញាភ្លាមៗ ក្រោយស្ដាប់ការបំភ្លឺរបស់ជនរងគ្រោះ។
លោកអធិការរងបានបញ្ជាក់ថា ជនរងគ្រោះបានប្រាប់ថាមុនពេលកើតហេតុមួយថ្ងៃ (ល្ងាចថ្ងៃទី០៣ ខែវិច្ឆិកា) គាត់បានឃើញសកម្មភាពជនទាំងពីរនាក់នេះ បានដើរមកឆ្វែលផ្ទះគាត់ជាញឹកញាប់យ៉ាងចម្លែក តែគាត់មិនបានចាប់អារម្មណ៍នោះទេ។
លោកអធិការរងបញ្ជាក់បន្តថា ដោយសារមានតម្រុយបែបនេះ ម្យ៉ាងជនទាំងពីរនាក់ជាមុខសញ្ញាចាស់ទើបចេញពីពន្ធនាគារផង ហើយថែមទាំងមានសាក្សីបំភ្លឺបន្ថែមទៀតថា គេបានប្រទះឃើញជនទាំងពីរនាក់ចាយសុទ្ធតែលុយបាតថៃ និងមានគ្រឿងអលង្ការផ្គាប់ចិត្តស្រីកំណាន់ចិត្តទៀត ទើបយើងសុំយោបល់លោកស្នងការ និងលោកព្រះរាជអាជ្ញា ដើម្បីតាមឃាត់ខ្លួនជនទាំងពីរនាក់យកមកសួរនាំតែម្ដង។ នេះបើតាមការបញ្ជាក់ពីលោក ហៀង ប៊ុនថា អធិការរង។
ជាមួយនឹងការឃាត់ខ្លួនយកមកសួរនាំ ជនសង្ស័យឈ្មោះ មាន វុទ្ធី និងឈ្មោះ ឆាយ សៅ ហៅជី បានសារភាពថា ពួកគេទាំងពីរនាក់ពិតជាបានរួមគំនិតគ្នាលួចយកទ្រព្យសម្បត្តិរបស់ជនរងគ្រោះទាំងពីរនាក់ប្ដីប្រពន្ធខាងលើនេះមែន។ក្រោយពីលួចបានលុយ ជនសង្ស័យឈ្មោះ មាន វុទ្ធី បានយកគ្រឿងអលង្ការទៅប្ដូរនៅកន្លែងលក់ ដោយយកជាខ្សែដៃផង និងចិញ្ចៀនផង យកទៅឲ្យស្រីកំណាន់ចិត្ត។ នេះបើតាមលោក ហៀង ប៊ុនថា ដែលបានសួរនាំផ្ទាល់។
លោកបានប្រាប់ថា ក្រោយឃាត់ខ្លួន មន្ត្រីជំនាញបានដកហូតនូវគ្រឿងអលង្ការដែលជននេះបានបាត់មកវិញគ្រប់ចំនួនហើយ។ ប៉ុន្តែចំពោះប្រាក់ចំនួន៤២,០០០បាត ជនសង្ស័យទាំងពីរនាក់អះអាងថា ពួកខ្លួនលួចបានត្រឹមតែចំនួន៣៣,០០០បាតប៉ុណ្ណោះ តែប្រាក់នេះពួកខ្លួនទិញបានទូរស័ព្ទមួយគ្រឿង ក្រៅពីនេះចែកគ្នាលេងល្បែ.ងចាញ់អស់គ្មានសល់មួយបាតទេ។ យ៉ាងណាក្ដី ពេលនេះមន្ត្រីកំពុងសួរនាំ និងចាត់ការតាមនីតិវិធីច្បាប់ហើយ៕
ចែករំលែកព័តមាននេះ